Rom 10 8-13

BAHAN SERMON JAMITA TU MINGGU INVOCAVIT, 6 MARET 2022 ROM 10:8-13 "Malua do Ganup na Manjou Goar ni Tuhan i"

Patujolo:

Godang do sipasingot dipasahat Apostel Paulus tu huria na di Rom, borhat do I sian arsak ni rohana marnida parngoluon ni halak Kristen namarharoroan sian Jahudi na sai rongking manghangoluhon ruhut-ruhut hajahudion tarlumobi ma taringot tu patik-patik. Tarlumobi ma molo adong na sian duru ni halak Jahudi nanaeng Kristen, mansai godang ruhut-ruhut na ingkon siulaon asa tarjala nasida gabe dongan sa huria. Hinorhon ni ruhut-ruhut I gabe hira pangambat di roha ni nanaeng gabe Kristen na ro sian duru ni halak Jahudi, nang pe nian hibul do nasida mangihuthon Hata ni Debata. Di situasi na songon I boi do gabe partuktuhan/parbolaton naboi mansegai Huria ni Tuhan i. Dipaingot apostel Paulus asa anggiat nasida manjanghon haluaon nabinoan ni Tuhan Jesus Kristus jala manghaporseai holan marhite Tuhan Jesus Kristus do ungkap jala rade dalan pajumpang dohot Debata. Molo taparrohahon adong piga-piga hali jumpang hita hata "porsea" di turpuk on. Marhite sian I boi dohononta tarmasuk namangondolhon hinaringkot ni haporseaon do turpuk on. Ndang apala na imbaru be nian hata porsea di hita, ai ganup ari minggu ita bege jala tahatindanghon do "haporseaonta". Alai joujou tu hita di ombas on anggiat nian imbaru panindangionta taringot tu Tuhan i.

Hatorangan:

Ay.8; Pemahaman ni halak Jahudi taringot tu patik (ingkon) gabe mambahen madabu tu legalistic. Logika berpikir dohot roha na so ungkap mangarajai ngolu nasida gabe ambat-ambat manjalo hasintongan na di bagasan Jesus Kristus. Ndang mampu manjalo ia Tuhan Jesus ima hagogok ni patik ni Debata. Dipangke apostel Paulus do sian 3 Musa 18:5 dohot 5 Musa 30: 12-14 taringot tu namangulahon Hata I, ima asa "Mangolu". Alai ndang siat tu roha ni halak Jahudia ia Tuhan Jesus ima Mesias, jala Ibana do hagogok ni patik i. Nang pe sai dipaimaima halak Jahudi do Mesias I, jala sai di sigati do sian Padan Narobi. Hot sai mangkirim do nasida na ro Mesias I di duru ni Tuhan Jesus.

Ay. 9-10; On do ojahan ni haporseaon ni huria naparjolo, ai ingkon jaloon jala hatindanghononhon nasida do Jesus Kristus do Tuhan, naung pinahehe ni Debata sian angka namate. Di pasahat si Paulus ayat on laho patandaphon tu halak Jahudi di hasalaanna. Nungga dipatorang si Paulus ia dalan tu Debata ndada ala ni parulaon, manang usaha dohot na mangulahon patik, alai Alani haporseaon sambing do. la haporseaon I ima pos ni roha, jala haporseaon I ima tu Tuhan Jesus Kristus.

Ay. 11-13; Lam dipabagas apostel Paulus do taringot tu haporseaon dalan masuk tu hatigoran. Alani haporseaonna do ganup halak ndang be maila. Jala Alani haporseaonna I do bolong ma dorpi parholangan (diskriminasi) ndang mardiaimbar be Jahudi manang Gorik. Laos di si ma jumpang haluaon, songon naung ni dok ni panurirang Joel marratus taon andorang so si Paulus (Joel 3:5) "Alai nasa namanjou Goar nin Jahowa, malua do...". Haporseaon do dipatujolo apostel Paulus di turpuk on. Ai ndang mungkin jouon ni na so porsea Tuhan i.

Pokok-pokok sijamitahononhon:

1. Angka na porsea di Tuhan Jesus Kristus ndang mangasahon pingkiranna mangulahon hatigoran; on do jotjot dihalupahon jolma. Atiha di bagasan hapogoson dope jolma 1, sai di jou dope Tuhan I, mangido pangurupion dohot pasupasuNa. Dung dioloi jala dijalo pasupasuNa I dipardagingon dohot dipartondion, torop do jolma I jala cenderung manghalupahon Tuhan I, jala pingkiranna nama na mangarajai dirina dohot sude angka panggulmitonna. Tung marimbar situtu do tu si Abraham (1 Musa 15:1-6). Dung dilehon Debata padan Na, ingkon songon bintang dohot rihit pinompar ni si Abaraham, gabe porsea do ibana di Jahowa. Jala gabe hatigoran ni si Abraham do I dietong Jahowa (pat. Rom 4:3; Galatia 3:6; Jak 2:23). Jotjot do I dihatahon Tuhan Jesus tu angka na ro tu Ibana mangido ragam ni pangidoan "haporseaonmi do pangoluhon ho....." Asa nang hita pe haporseaonta do paluahon dohot mangalehon na ringkot I di hita songon natarsurat di Ulaon 16:31 "Haporseai ma Tuhan Jesus asa malua ho dohot isi ni bagasmi...." Patik ni Debata na sampulu I, ingkon rajumanta do 1 songon sorminan, napataridahon angka dosa, pangalaosion na taulahon, jala gabe siparorot do 1 mamboan/mangonjar hita tu Kristus,mangido hasesaan ni dosa. Ido haporseaon I, jala molo dung porsea hita di Debata, ido dirajumi Debata gabe hatigoranta songon na masa tu ompu ni naporsea si Abraham.

2. Logika berpikir dohot roha hatangkangon jotjot do gabe ambat-ambat mananda lomo n iroha ni Debata dohot pambahenanNa, jala sundat nang mangulahon Hat ani Debata. Gabe ditubuhon ma fanatisme dohot fundamentalis na keliru. Hape talpe do Hata I di bagasan pamanganmu dohot di bagasan roham (ay.8). Alani sipasidingon ni halak na porsea do roha diri (egosentris) alai naeng ma ingkon torus "mansoadahon diri".

3. Dibasabasahon Tuhan ido hamoraonNa tu angka namanjou goarNa. Nian girgir do hita mandok "mauliate" tu Tuhan I, paboa Ibana do namangalehon nasa na adong di hita. Alai jotjot do I holan di hata manang di mulana sambing. Anggo dung leleng gabe hasomalan sambing nama, jala gabe ro ma sibolis mamanggarmanggar dirinta, mandok "Alani malonta, Alani gogonta, ala ni hepengta, Alani dekkingta do umbahen songon I". Dung masuk jarum ni sibolis I madabu ma hita tu ginjang n iroha laos sian I ma mandao huhut maninggalhon Tuhan i. Lam bagas ma muse, mangolu ma di hadirion namansuasaehon tingki, gogo, hahipason, sihumisik, jala menyalah gunahon tu na so hasea; mamangke obat-obat terlarang, mabuk-mabuk dohot martogel/juji. Molo nga sahat jolma I tu na songon I mansai bagas ma hadadabuna ala nungga talpe tu lombang, ima na paro ila, haurahon, jea tu ibana sandiri. Alani dijouhon ma tu hita, paboa Tuhan ido namambasabasahon angka naadong di hita i.

4. Ngolu natarpasupasu jala gabe pasupasu ima ngolu na porsea dipangaramotion ni Tuhan Jesus. Ngolu na sonang di lambung ni Tuhan Jesus, ngolu napatulushon sangkap dohot lomo n iroha ni Debata di panggulmiton ni ngoluna. Dipataridahon Debata do na Ibana do paradehon, padungohon, pasaorhon asi ni rohaNa di angka naporsea jala nasai manjou GoarNa. Laos dihobasi do ngolu ni naporsea I gabe ngolu namarpanarihon tu donganna, ai dipasupasu asa gabe pasupasu, dungi tumorop ma manghatindanghon Tuhan Jesus Kristus ido Sipalua na singkop.

(Pdt. Herlina Simbolon)

Lukas 3 1-6

Bahan Sermon Parhalado HKBP Ressort Panai Hilir

Minggu Advent II, 05 Desember 2021

Muba Ma, Parade Ma Dalan di Tuhan i

Lukas 3:1-6

I. Patujolo Ni Turpuk

Advent lapatanna haroro manang haroro ni Tuhan I manopot bangsoNa. Somal do di masa Advent tapatupa angka perayaan-perayaan Natal diganup hurianta laho manghalashon haroro ni Tuhan Jesus ima marhite ari hatutubuNa i. Mangarade hita marningot haroroNa na parjolo I di Betlehem huhut mangarade hita diharoroNa na paduahalihon. Marragam do tahe na somal taida haradeon ni halak Kristen molo nungga jumpang perayaan Advent-Natal. Alai na ringkot sipahusorhusoronta, aha do na parjolo dohot narumingkot siparadeonta? Boi do dohonon halak Kristen mangarade diri manomu haroro ni Tuhan I marhite persiapan natal alai rohana ndang porsea dope tu Tuhan i. Alani, marhite turpuk jamita on, disoarahon Johanes Pandidi do taringot tu haroro ni Tuhan I jala aha do na rumingkot siparadehonon ni angka na porsea tu Ibana. Mansai tangkas do dipatorang Evangelium Lukas on taringot tu hajongjongan ni Johanes Pandidi hatihai ima di masa ni harajaon ni Kesar Tiberius… (ayat1-2). Di si ma ro Johanes Pandidi mamboan Hata ni Debata ima di humalianh batang aek Jordan. Sian on Johanes Pandidi marbarita Nauli taringot tu haroro ni Mesias hombar tu baga-baga ni Debata di Padan Na Robi di Jesaya 40. Alani, taida ma Hata Ni Debata na pinasahat ni Johanes Pandidi marhite turpuk jamita on. 

II. Hatorangan Ni Turpuk

1) Pandidion Na Badia: Dalan Laho mangido hasesahan ni dosa (ay.3). arga do hita pandidion na badia  na ung tajalo sian tongatonga ni hurianta. Asa dung tardidi hita disi ma hita gabe nampuna ni Debata merhite Jesus Kristus. Nungga gabe panean be hita diharajaon ni Debata. Jala angka naung tardidi tu bagasan goar ni Debata Ama, Anak dohot Tondi Porbadia ndang sarombang be dohot portibion. Lapatanna ingkon dihangoluhon angka na porsea I do pandidion naung jinalona marhite haporseaon na polin tu Debata. ido umbahen disoarahon Johanes Pandidi taringot tu Pandidion on asa saluhut angka siihuthon Kritus pasahathon dirina gabe nampuna Debata marhite Pandidion Na Badia. 

2) Parade Dalan Tu Debata (ay.4). Johanes Pandidi ima sahalak panurirang na mansoarahon hamubaon ni roha ni angka na porsea laho manomu haroro ni Tuhan I marihite pandidion laho pasesahon dosa. Hata “hamubaon”  turpuk on disalin sian hata Gorik/Yunani ima metanoia lapatanna paiashon roha dohot pingkiran. Marhamubaon ndada aadiruhut pardudu, ndada di penampilan alai sian roha parbogason do ima na so manghaporseai Tuhan Jesus gabe muba manghaporseai Tuhan i/ pangoloi Tuhan i. Ringkot do bangso i paubahon roha ala naung songgop harajaon ni banua ginjang. Hamubaon ni roha na binaritahon ni Johanes Pandidi marpadomuan do I tu dosa ni jolma dohot Asi ni roha ni Debata. Sadalan do hamubaon ni roha dohot asi ni roha ni Debata. Alani do disoarahon si Johanes Pandidi ma taringot tu hamuboan ni roha marhite hata na mandok, “Pature hamu ma dalan di Tuhan I, pahornop hamu ma sidalananNa”. Molo laho hita tu sada huta pasti do na parjolo tabereng boha do dalan tu huta I bagak do manang na sega do. Kualitas jalan bisa menjadi semangat bagi kita untuk datang berkunjung ke suatu tempat. Lapatanna ringkot do dalan i diparngoluan ni jolma. Gombaron do on di pasahat Johanes Pandidi laho manungguli roha ni angka bangso Jahudi laho manomu haroro ni Mesias i. Hata “pature hamu ma dalan di Tuhan i..” mansoarahon hamubaon ni roha laho manjanghon haroro ni Mesias ima Jesus Kristus. Asa mangarade ma nian bangso  diharoro ni Harajaon Banua Ginjang i. Marhite Advent II on, dijou do hita asa paradehon dalan tu Debata marhite haporseaon dohot panghirimon na togu na ro do Tuhan i manopot bangsoNa diportibion. 

3) Manjanghon Kristus dibagasan haserepon ni roha (ay.5-6).  Diayat 5 diuduti do taringot tu ngolu ni halak na paradehon dalan di Tuhan i. Ndada holan mangarade sambaing angka na porsea I alai huhut do ingkon adong hataridaan ni hamubuaon ni roha ni jolma i. Lapatanna ingkon tangkas do hamubaon ni rohanta laho manjanghon Kristus i. didok diayat 5 “ingkon gohan do nasa rura jala diparejeton do nasa dolok dohot buntulbuntul”. Gombaron ginjang ni roha/kesombongon do na naeng dohonon ni Johanes Pandidi. Ala dipanghilalahon bangso i do bangso na pinillit ni Debata nasida gabe ndang tama be bangso na asing laho manjanghon Mesias i. Ido umbahen didok Johanes Pandidi diayat 5 asa unang marginjang ni roha bangso Israel dipamilitton ni Debata di bangso i asa bongot Kristus I dibagasan rohanasida. Suang songon i do nang hita angka halak Kristen na patupahon perayaan-perayaan di masa Advent-Natal on, unang gabe I dalanta laho patuduhon ginjang ni rohanta marhite patuduhon angka hinauli ni paheanta. Ingkon tangkas do tarajumi hadirionta diadopan ni Debata songon pardosa hita jala molo tahalashon pe saluhut na marhite perayaan-perayaan I naeng ma nian laho patuduhon parsitutuonta manombah Kristus I songon Sipalua di hita. Haluaon na tajanghon I naeng I gabe dasar sian saluhut ulaon perayaan-perayaan i. 

III. Panimpuli

Pangibulan sian jamita ni si Johanes Pandidi ima hamubaon ni roha. Songon soara ni Topik Mingguta ima, Muba ma, Parade Dalan di Tuhan. Roha na ias ido na mambaen hita laho paubahon dirinta manjanghon Kristus i. Alani taparade ma rohanta manomunomu Ibana di bagasan haporseaon, dame dohot holong nang las ni roha. Tatadinghon ma angka na mangambati hita laho manjanghon haluaon na binoan ni Tuhan i tu portibion asa tiur dalan ni Tuhan I manopot hita. Panagamonta diharoro ni Tuhan I mamboan hita tu panghirimon na mangolu tu Debata. Parade Ma dirim, Ro nama Kristus i. Tajanghon ma Ibana dibagasan haporseaon asa unang adong na tading nanggo sada sian hita. Amen. 

(C. Bvr. Irma Gultom)

Psalmen 36 6-11

BAHAN SERMON PARHALADO SARESORT LINTONGNIHUTA HABINSARAN 

TU MINGGU 16 JANUARI 2022

EV. PSALMEN 36 : 6 – 11 1 KORINT. 12 :  1- 11

“DEBATA PARASI ROHA NA MANONTONG”

PATUJOLO

Turpuk on ima ungkapan pamujion ni Raja Daud marnida sude denggan basa ni Debata di bagasan ngoluna. Tarlumobi mai di namanguluhon bangso Israel ibana gabe sada bangso na balga. Molo tajaha turpuk on secara keseluruhan ayat 1 – 12 tangkas situtu do disagi psalmen 36 on gabe dua bagian. Na parjolo (1 - 5) gombaran ni ni hajahaton (kefasikan manusia) ni jolma na so manghabiari Debata Jahowa, na paduahon (6 -12) hapapatar ni asi ni roha ni Jahowa. Tangkas situtu do digombarhon di turpuk on perbedaan ni hajahaton ni jolma dohot asi ni roha ni Debata Jahowa. Dipangke raja Daud do di turpuk on gaya bahasa na manggombarhon hajahaton ni jolma I, dohot gaya bahasa na uli situtu manggombarhon Debata Jahowa. Digombarhon raja Daud do sifat-sifat ni Debata marhitehite angka fenomena alam dohot marhite angka pengalaman ni jolma. Alai hombar tu turpuk di ari minggu (Minggu II Dung hapapatar) tangkas laho manggombarhon hapapatar ni denggan basa ni Debata na di paandar ni Raja Daud marhite turpuk  Psalmen 36 : 6 – 11 on.

HATORANGAN NI TURPUK

Marhite turpuk on adong ma tolu hataridaan ni hapapatar ni denggan basa ni Debata di ngolunta jolma ima:

Ayat 6 -7 “Habalgaon ni asi ni roha ni Debata”. Tangkas situtu dipatorang Raja Daud sifat ni asi ni roha ni Debata na so adong na boi mangatasi saluhutna. Hatimboon dohot habalgaon ni asi ni roha ni Debata mambahen marpamuati rohaNa mida pangalo ni angka jolma na mardosa i. mulak do rohaNi Debata nang pe mardosa jolma I jala ndang dihabiari Debata. “ndang hapalang balga ni asi ni roha ni Debata, sai mulak do rohaNa siala holong ni rohaNa I tu angka na tinompaNa. Manontong do asi ni roha ni Debata sian mulana sahat tu ujungni hasiangan on. Siala ni ido pangongkuhonon ni raja Daud di turpuk on “ tolhas ro di langit do angka asi  ni rohaM, tolhas ro di angka ombun do hasintonganMu” laho manggombarhon habalgaon ni asi ni roha ni Jahowa na so boi di atasi manang aha, manang ise pe na adong di portibi on. Habalgaon ni asi ni roha ni Jahowa mangatasi saluhutna, jala tu saluhutna. Ndada holan tu angka jolma, alai dohot do tu angka pinahan di parmudu Debata. Habalgaon ni holong ni roha ni Debata bersifat holistic jala umum, ndang adong imbarna. Siala ni ido naeng tangkas antusan ni ganup jolma ndang adong na tuk patuhon holong ni roha songon na pinatupa ni Debata di portibi on. 

Ayat 8 – 9 “ Hapapatar ni asi ni roha ni Debata”. Di paandar Raja Daud do angka na masa tu jolma na niasian ni Debata. Maporus jala marlinggom tu habongNa do angka jolma i. Dipainumhon Debata Jahowa do angka jolma I tu batang aek ni angka hahinsaon”. Tangkas situtu do bentuk asi ni roha ni Debata Jahowa songon parmahan do Ibana di jolma I na gabe birubiruNa. Ndang dipaloas Debata jolma I mauas dohot male, diboan do jolma I tu angka jampalan na lomak jala tu batang aek na tio. Parmahanion ni Debata manogihon jolma I tu hangoluan na sonang, siala ni I patutna ma jolma I ingkon maporus jala marlinggom holan tu Debata sambing. Jolma na mangolu dibagasan asi ni roha ni Debata, malua ma ibana sian rimas ni Debata, jala ndang pasombuonna I managam ragam ni angka pangunjunan holan sasadasa. Donganan ni Debata jala patuduhonon ni Debata do laho mangadopi saluhutna jala dapotan hagogoon ma ibana di bagasan managam angka pangunjunan i. Angka na mian di bagasan asi ni roha ni Debata, di parmudu jala di dongani Debata do I laho mardalan di bagasan hasintongan asa unang lilu, di linggomi jala dipadao doi sian angka hajahaton ala tongtong jolma I marhaporusan jala marlinggom tu Debata sambing. 

Ayat 10 – 11 “Panghophopion dohot hatigoran ni Debata di bagasan asi ni rohaNa”. Dung tangkas di paandar Raja Daud pamujionna maradophon hapapatar ni asi ni roha ni Debata, di ayat 10 – 11 on dibagasan bentuk tangiang do ibana manghatahon pamujionna tu Debata. Tangkas situtu marhite pangongkuhonon ni raja Daud mandok “ Debata Jahowa do mual ni hangoluan”. Hangoluan di pardagingon nang hangoluan di partondion. Molo mangolu do jolma I manontong dilambung ni Debata Jahowa, taruli ma ibana di angka na ringkot di ngoluna, ala Debata do mual ni hangoluanna. Songon gombaran ni suansuanan na sinuan di lambung ni batang aek, songoni ma jolma I mian di lambung ni Jahowa mual hangoluan i. Manontong ma Debata manghophop ibana dibagasan hatigoranNa, jala ndang mahiang asi ni roha ni Debata maradophon i. Hatiuron ni Debata manogu jolma I mardalan di dalan na sintong jala ndang tarunjun tu dalan haholomon. Marhite I ma dibagasan turpuk on dipangidohon Raja Daud do asa dipanene Debata asi ni rohaNa dohot hatigoranNa tu angka na tumanda Ibana dohot tu angka na unjur marroha. Songon didok dibahasa Indonesia “ lanjutkanlah kasih setiaMu bagi orang yang mengenal Engkau”. Dipangidoan ni raja Daud di turpuk asa manontong ma nian asi ni roha ni Debata siala tangkas dipanghilalahon jala diparhatutu ibana hinauli dohot hinadenggan ni pandonganion ni Debata di ngoluna. 

APLIKASI

Habalgaon ni asi ni roha ni Debata Jahowa tu saluhut na tinompana I, ndang taratasi/ tarambatan ni manang ise pe na adong di portibi on. Patar doi marhite panghophoponNa di bagasan ngolu pardagingon dohot partondion ni hita jolma. Nunga patar I taida jala ta jalo marhite anakNa Tuhan Jesus Kristus. Nang pe mardosa hita jolma, alai ndang dipasombu Ibana hita manontong mangolu di bagasan dosa i. Dipalua di hita jala ditogu tu hasonangan marhite anakNa Tuhan Jesus Kristus. 

Manontong ma hita jolma mangolu, maporus, jala marlinggom tu Debata Jahowa. Unang padao dirim, ala pajonok ma dirim tongtong tu Debata Jahowa ai Ibana do mual ni hangoluanta, Ibana do hatiuron di hita, jala Ibana do na mangalinggomi hita di bagasan holong ni rohaNa. Amen.

(Oleh: Pdt. Rolan Sihombing)

ACARA MINGGU

Marende BE. No. 574 : 1 + 3

VOTUM A.IV/A.5 – D. IV.12

Marende BE. No. 13 : 9

PATIK 2 KORINT 13 : 11

Marende BE. No. 183 : 1 – 2

M. DOSA B. 5 – C. 5

Marende BE. No. 142 :  1

EPISTEL 1 KORINT 12 : 1 – 11

Marende BE. No. 128 : 1 – 2

M. HAPORSEAON

Marende BE. No. 22 : 1 – 2

JAMITA PSALMEN 36 : 6 – 11

Marende BE. No. 564 : 1 - 

Jeremia 1 4-10

BAHAN SERMON JAMITA TU MINGGU IV DUNG EPHIPANIAS 30 JANUARI 2022

JEREMIA 1: 4-10 “Dijou Laho Manghaholongi”

PATUJOLO

Dipabangkit Debata do angka panurirang laho patulushon sangkap ni Debata di sada tingki dohot tu sada ulaon. Songon i ma nang angka na porsea i, dijou jala dipabangkit Debata do ganup halak Kristen laho pararthon barita nauli, marhite ragam ni ulaon panghobasion di ngolu siganup ari. Ndang terbatas di tongatonga ni huria. Dohot hata na asing, ingkon patar ma holong dohot huaso ni Debata di tongatonga ni angka bangso parbegu, asa dohot nasida mananda dohot manghilala balga ni holong ni roha ni Debata dohot huasoNa naung manghophop portibi on. Adong do pigapiga hal na mansai gomos dipaingothon Debata tu panurirang Jeremia laho pasauthon ulaon ni Debata di portibi on.

HATORANGAN

Unang mangasahon diri, alai pangasahon ma Debata: Didok Debata do di turpuk on tu si Jeremia “Unang dok: Na bajar dope ahu....”. Naeng do dirimpu si Jeremia na boi ibana mangula ulaon ni Debata sian hadirionna (bajar=muda). Jala jotjot do portibi on songon i, na marnida sasahalak sian parduru. Boi do dibereng jolma sahalak naposo; dohot pemikiran; ai ndang pola ringkot hajongjonganna. Hape sasintongna angka naposo i do na potensial siarahononthon. Alai ido ra umbahen nunga godang sian angka natuatua, dimanang ulaon punguan dia pe i sai didok do: angka naumposo ima.  Jotjot do deba jolma mangasahon gogona; na deba pajolo gogo papudi uhum; hape natuatua mandok: dingolu on soala gogo; na marlapatan ndang holan gogonta i natapangasahon. Ingkon do tapadohot pamingkirion, panghilalaan, habisuhon, tarlumobi haporseaon di Tuhan i. (Keberhasilan seseorang dalam hidupnya diukur dari kemampuan mempergunakan: Kecerdasan intelektual; kecerdasan emosional, kecerdasan moralitas, kecerdasan budaya-sosial, kecerdasan spiritualitas). Alani angka na porsea ingkon mangasahon Tuhan i marhite kecerdasan spiritualitas di bagasan ngoluna, asa berhasil jala sukses di bagasan na mangula angka ulaonna.

Unang mabiar tu na di portibi on, alai ingkon biar tu Debata do. Gok biar do hita di portibi on; mabiar gagal, manang ndang berhasil, mabiar ndang dapotan karejo, mabiar ndang marianankhon, mabiar bencana alam, mabiar kecelakaan, mabiar ala parsahiton, mabiar mate. Didok Hata ni Tuhanta di Rom  8:31 Onpe, aha ma dohononta disi? Molo Debata donganta, ise ma alonta? Jala didok Debata do tu si Jeremia : Unang ho mabiar. (ay.8). Jala ndang sijuaon ulaon na pinasahat ni Debata tu hita. Ingkon tahalashon ma. Ai marjea jala marhangalutan bolon do angka halak na manguji manjua parsuruon ni Debata, boi tapatudos tu panurirang Jonas (Yunus). Ido umbahen angka ni jinou ni Debata patut do mangasahon hagogoon ni Debata sandiri dohot umbiaran tu Debata, diigil ma sian na tarpillit i: ingkon satia do naposo ni Debata marhite pamilliton i di bagasan na mangoloi sintongsintong na nidok ni Debata.

Songon i si Jeremia di turpuk on, dipabangkit Debata ndada holan patariashon hata ni Debata, manang asal ma dipasahat hata ni Debata marhitehite jamita, alai manang boha panghorhonna ndang dipareso? Alani mansai tangkas do ditonahon Debata siulaon ni si Jeremia. Adong ma opat bagian,  ima na ingkon rade mangadopi paraloan dohot parmaraan songon; mangurati, maniaphon, mangago, dohot mangaloha. Sude ulaon i manggombarhon borat ni siulaon ni angka na porsea laho paimbaruhon ngolu ni bangso i. Alani mansai denggan do molo tangkas angka na poso ni Debata mangarimangrimangi, manang na boha pasauthon lomo ni roha ni Debata di sada bangso manang masyarakat. Mangihuthon ulaon na nidok ni Debata (mangurati, maniaphon, mangago, mangaloha), ingkon adong do habaranion siihuthon Kristus laho patupahon perombakan total jala mendasar, jala unang gabe kompromistis.

Adong dua hal na ingkon siguruhoononthon sian turpuk on na pinasahat Debata tu si Jeremia, i ma : paulihon dohot manuan. Na dua ulaon on gabe sada tanggungjawab ni sude angka naung tarpillit sijalo haluan na sian Kristus i ima angka halak na porsea. Molo adong na hurang uli asa dipauli, molo adong na hurang unang asal dihobasi. Molo adong na hurang/na sega, na so denggan, ingkon patureon ma i sahatophatopna. Lapatanna, sai adong do i na hurang singkop di tongatonga ni parsaoran i, adong na so haru pinarrohahon gabe adong panghurangi ni roha ni dongan. Sude i, ingkon tongtong do pauliulion. Marhite sian i ma tarida hamajuon dohot haimbaruon di tongatonga ni huria.

SIPAHUSORHUSORON

Dos do hita saluhutna songon si Jeremia. Debata sandiri do na mamillit jala pabangkit angka na naeng suruonNa mangula di tongatonga huria i. Jala molo tarjou sada halak gabe siihuthon Kristus, manang gabe halak Kristen, napatuduhon naung tarjou do mangulahon lomo ni roha ni Debata. Asa Debata do na marsangkap jala Ibana do na naeng mangula siulaonNa di na jinou jala sinuruNa i angka na porsea. Molo songon i, manang na tu ulaon dia jala di jabatan dia pe hita mangula ingkon idaonta do i sian sudut kepentingan ni Debata, ndada kepentinganta sandiri manang kepentingan ni na gogo di portibi on. Nang hita saluhutna tarpillit do di angka ulaon na boi tapatupa marhitehite silehonlehon ni Debata. Ndada holan tu kepentingannta sandiri i alai tu kepentingan ni Debata doi. Molo tarajumi do i ulaon dohot kepentingan ni Debata saluhutna ia tapatupamtapatupa di bagasan holong ni Tuhan i. Ai gok haholongon do na pinatupa ni Debata di portibi on, siala ni ingkon marojahan tu si ma nang natapatupa. Tu aha do Debata manompa si Jeremia, aha do sangkap ni Debata  pauliohon ibana uju di bagasan bortian, uju so tubu dope tu hasiangan on? Alusna, asa pangkeon ni Debata ibana mangulahon, pasauthon lomo ni roha ni Debata, ndang adong na asing. Nunga dipillit Debata hita gabe anakhonna di bagasan Kristus Jesus. Aha do sangkap ni Debata tu hita? Naeng pangkeonna hita gabe ulaulana marhobas, paulihon, pasauthon ulaon ni Debata, lomo ni rohaNa di portibi on marhite ngolunta siganup ari. Dipillit hita, dipauli hita huhut do dibohali dohot gogo, hatauon, sahala, pangaramotion sahat tu na paluahon tondinta sian hamatean saleleng ni lelengna. Ndada asal na dipillit Debata si Jeremia alai didok Debata do tu ibana: Huparbadiai ho, hudangani ho, paluaonhu ho, hupasahat hatangku tu pamanganmu. Laos songon i do bohal naung tajalo di bagasan Kristus. Marpadan do Kristus tu angka na porsea: Sai ramotanhu do ho sahat ro di ajal ni hasiangan on. Ima gogo dohot pos ni roha tu angka naung jinou ni Debata laho patupahon haholongon i di portibi on. Amen.

Jesaya 55 10-13

 BAHAN SERMON JAMITA TU MINGGU ESTOMIHI 27 FEBRUARI 2022

JESAYA 55: 10-13 “Ndang Mulak Boti Hata Ni Debata”

PATUJOLO

Jesaya na marlapatan Jahowa do na paluahon. Marhite goar ni si Jesaya on patar ma tarida taringot huaso dohot hamuliaon ni Jahowa jala angka ulaon na pinatupa ni Jahowa tu bangso na niasianna. Turpuk jamita on ima buku Jesaya na masuk tu horong Deutro Yesaya (buku Jesaya na paduahon, bindu 40 - 55) ima na marisihon taringot bagabaga haluaon na pinatupa ni Jahowa tu bangso Israel (Juda) marhite naposoNa. Uju i bangso Israel talu dibahen bangso Babel, jala torop do halak Israel na tarbuang tu Babel. Habuangan na masa tu bangso Israel sada sangkap haluaon na pinatupa Jahowa. Habungan na masa tu bangso na pinarhamaol ni Jahowa on ima uhuman hinorhon ni dosa ni bangso i. Nang pe di status habuangan bangso i, alai ndang na gabe sude halak Israel hansit manang bernit panghilalaanna hinorhon ni i. Ndang na sude halak Israel gabe songon hatoban di habuangan, nang pe ndang boi diparsoadahon na adong halak Israel na hansit jala bernit panghilalaanna hinorhon na masa di ngoluna, isarana haraparon na songgop di bangso i. Sitoanonon na mansai dokdok dihilala bangso Israel ima hamagoan hadirion gabe sada bangso (kehilangan ideologi dan eksistensi sebagai suatu bangsa). Nunga tarulang tembok Jerusalem dohot bagas Joro ni Jahowa, inganan na badia, jala parmianan ni Jahowa di bangso i pe nunga marongso jala sega.

HATORANGAN

Ido umbahen di tonahon Debata tu bangso i, asa tongtong mian di nasida Barita na Uli songon bangso ni Debata nasida ingkon mian di bagasan panghirimon dohot pos ni roha. Tutu do diuhum Debata nasida marhite na tartaban tu huta Babel. Alai ndang uhuman na salelenglelengna i tu nasida alai patoguhon haporseaon nasida do i. Molo naeng paluaonNa ma nasida sian habuangan tung ala ni gogo ni Debata do dohot hasasaut ni bagabagaNa. On do hata ni Debata na pinasahat ni Panurirang Jesaya tu bangso na tongon di habuangan i, asa porsea nasida di hata ni Debata dohot di bagabagaNa nasailaon. Asa molo pe tartaban nasida alai ingkon mulak do muse nasida tu bonapasogitna. Tutu situtu do hata ni Debata nahinatahon ni panurirang i. Ala ndang piga lelengnari paruaronna do nasida sian tano Babel mulak tu Jerusalem. Suruonna do si Koresh raja ni Persia laho paruarhon nasida sian halak Babel dung ditaluhon halak Parsia bangso Babel ditaon 538 andorang so Kristus (Ezra 1:1-11). Antong dia ma hata ni Debata di turpuk jamita on?

Ayat 10: Dipatudos do hata ni Jahowa na haruar sian pamangan ni Jahowa tu udan dohot ambolas na madabu sian langit tu tano, jala mambornoki tano hadabuanna, jala ala nabornok i tano i, gabe boi ma martubuan di tano i angka suansuanan na marparbue na hasea di jolma dohot di suansuanan i. Tutu, sada tudosan na tarbatas do i. Lobi sian udan dohot ambolas i dope hagogoon, pangontak, panghorhon ni hata ni Jahowa Debata tu angka nanihonaanna. Alai asa mura tangkupon ni halak Juda na tarbuang i dohot jolma sinuaeng, dipillit ma tudosan na sederhana on. Jojal manang gabe gurun, tano bakkalbakkal do tano molo so hea tonu dibahen aek. Udan ma nahumatop manonui tano na bolak. Molo tung adong pe angka boni (bibit) ni suansuanan di tano i, ianggo so adong do aek mamornoki, ndang marlata (tubu) boni i. Taboto do tangkas na songon i nang sian barita panompaon i: “Tagan so adong dope di tano on nasa duhutduhut, jala tagan so martumbur dope nasa bulungbulung di ladang, ai ndang dope diparo Debata udan tu tano on, jala ndang adong dope jolma na mangula tano i. Alai martimpul ma uap sian tano on, gabe dibornohi sandok sisik ni tano on” (1Musa 2:5-6). Tingki i di tano Juda dang adong irigasi, tung holan udan do diarop roha ni jolma na boi mambornoki tano, jala laos udut tusi na manontuhon hadengganon ni ngolu ni jolma. 

Ayat 11: Molo ro hata ni Debata, ndang mulak boti hata ni Tuhan i tu Tuhan, so jolo dibahen lomo ni roha ni Jahowa, jala manjadi tu jolma (tu natinompa ni Jahowa) na gabe hahonaan ni hata i. Molo songon i do, siluluan on do: Aha do hata ni Jahowa Debata? Si Jeremia pasahat hata ni Jahowa na mandok tarbuang Juda 70 taon lelengna, na mandok asa bangunon ni bangso Juda kota di dia nasida maringan; adong na paboahon na mulak do bangso Israel tu tano Juda. Hira sude do isi ni buku Jesaya napaduahon on marisihon hata surirang taringot tu haluaon ni Israel/Juda dohot “pemulihan” ni Israel/Juda/Jerusalem. Sude hata ni Jahowa on pasti jala nunga tarbukti di sejarah ni Israel/Juda. 

Ayat 12-13: Ndang lomo roha ni Jahowa, bangsoNa sai torus didondoni arsak, hagaoron, jala sai holan na mangandungi. Ndang lomo roha ni Jahowa, bangso Israel/Juda torus tarbuang. Ingkon borhat bangso na i di bagasan las ni roha maninggalhon habuangan i, maninggalhon arsak, dohot pardangolan i. Halak na di bagasan las ni roha i ma halak naung dapotan panghirimon na denggan jala bersemangat laho mangeahi aha nahinirim ni rohana i. Sihirimon ni bangso Juda tingki i ima : boi mulak tu Jerusalem, boi mambangun bagas joro ni Jahowa muse; boi mambangun parik ni Jerusalem muse, boi mangatur pamarentaon na muse; boi pangoluhon parugamoon nasida muse; bahkan boi mambangun hajolmaon nasida muse. 

SIPAHUSORHUSORON

Tahangoluhon ma hata ni Jahowa, jala tabahen ma dirinta be gabe inganan HATA ni Jahowa. Di ganup partingkian naeng marsaringar ma hata ni Debata tu hita. Ido nidok ni Martin Luther hata ni Debata gabe (sola scripture) di ngolunta. Ido umbahen didok back to the Bible-mulak tu hata mi Debata. Jala Apostel Paulus mandok hata ni Debata hasea mamodai dohot maminsang hita (2 Tim 3 16-17). Aha do nanaeng peoponta sian hata ni Debata? Ima holong ni roha ni Debata na so hea maninggalhon hita na manghaporseai Ibana. Manang didia pe hita ingkon marhite hata ni Debata. Tutu godang do hamaolon na masa di ngolunta, alai ingkon boi do hita mian di bagasan hata ni Debata. Ndang sude boi jolma sanggup mangadopi hamaolon. Alai ndada gabe mambahen na so hinalomohon ni Debata. Sandok ingkon tiur pingkiranta jala mian di bagasan hata ni Debata. Hata ni Debata gabe sulusulu di ganup sidalananta siganup ari songon nidok ni parpsalmen i hataMi do sulusulu ni pathu jala hatiuron di dalanku (Psalmen 119:105).

Panghirimon na mangolu na ingkon tangkas jumpang di hita manisia. Tadalani ma ngolunta si ganup ari mardonganhon haporseaon tu Debata. Di bagasan pos ni roha do hita laho mangadopi nasa parngoluon on. Unang hita mandele jala unang hita mabiar ala Debata do mandongani hita. Ido nidokna di ayat 12: Ai ingkon di bagasan las ni roha hamu borhat, jala di bagasan hadameon hamu pataruon. Amen.

ACARA MINGGU:

BE. 14: 1+3

Votum. A.VI.6-D.V.18

BE. 743: 1

Patik. I-IV

BE. 178: 2-3

Manopoti Dosa. B.11-C.11

BE. 392: 1-2

Epistel. Mateus 13: 18-23

BE. 238: 1+7

Manghatindanghon Haporseaon

BE. 28: 1+4

Jamita. Jesaya 55: 10-13

BE. 471: 1—

Pangujungi

Jesaya 55 10-13

BAHAN SERMON JAMITA TU MINGGU ESTOMIHI 27 FEBRUARI 2022

JESAYA 55: 10-13 “Ndang Mulak Boti Hata Ni Debata”

PATUJOLO

Jesaya na marlapatan Jahowa do na paluahon. Marhite goar ni si Jesaya on patar ma tarida taringot huaso dohot hamuliaon ni Jahowa jala angka ulaon na pinatupa ni Jahowa tu bangso na niasianna. Turpuk jamita on ima buku Jesaya na masuk tu horong Deutro Yesaya (buku Jesaya na paduahon, bindu 40 - 55) ima na marisihon taringot bagabaga haluaon na pinatupa ni Jahowa tu bangso Israel (Juda) marhite naposoNa. Uju i bangso Israel talu dibahen bangso Babel, jala torop do halak Israel na tarbuang tu Babel. Habuangan na masa tu bangso Israel sada sangkap haluaon na pinatupa Jahowa. Habungan na masa tu bangso na pinarhamaol ni Jahowa on ima uhuman hinorhon ni dosa ni bangso i. Nang pe di status habuangan bangso i, alai ndang na gabe sude halak Israel hansit manang bernit panghilalaanna hinorhon ni i. Ndang na sude halak Israel gabe songon hatoban di habuangan, nang pe ndang boi diparsoadahon na adong halak Israel na hansit jala bernit panghilalaanna hinorhon na masa di ngoluna, isarana haraparon na songgop di bangso i. Sitoanonon na mansai dokdok dihilala bangso Israel ima hamagoan hadirion gabe sada bangso (kehilangan ideologi dan eksistensi sebagai suatu bangsa). Nunga tarulang tembok Jerusalem dohot bagas Joro ni Jahowa, inganan na badia, jala parmianan ni Jahowa di bangso i pe nunga marongso jala sega.

HATORANGAN

Ido umbahen di tonahon Debata tu bangso i, asa tongtong mian di nasida Barita na Uli songon bangso ni Debata nasida ingkon mian di bagasan panghirimon dohot pos ni roha. Tutu do diuhum Debata nasida marhite na tartaban tu huta Babel. Alai ndang uhuman na salelenglelengna i tu nasida alai patoguhon haporseaon nasida do i. Molo naeng paluaonNa ma nasida sian habuangan tung ala ni gogo ni Debata do dohot hasasaut ni bagabagaNa. On do hata ni Debata na pinasahat ni Panurirang Jesaya tu bangso na tongon di habuangan i, asa porsea nasida di hata ni Debata dohot di bagabagaNa nasailaon. Asa molo pe tartaban nasida alai ingkon mulak do muse nasida tu bonapasogitna. Tutu situtu do hata ni Debata nahinatahon ni panurirang i. Ala ndang piga lelengnari paruaronna do nasida sian tano Babel mulak tu Jerusalem. Suruonna do si Koresh raja ni Persia laho paruarhon nasida sian halak Babel dung ditaluhon halak Parsia bangso Babel ditaon 538 andorang so Kristus (Ezra 1:1-11). Antong dia ma hata ni Debata di turpuk jamita on?

Ayat 10: Dipatudos do hata ni Jahowa na haruar sian pamangan ni Jahowa tu udan dohot ambolas na madabu sian langit tu tano, jala mambornoki tano hadabuanna, jala ala nabornok i tano i, gabe boi ma martubuan di tano i angka suansuanan na marparbue na hasea di jolma dohot di suansuanan i. Tutu, sada tudosan na tarbatas do i. Lobi sian udan dohot ambolas i dope hagogoon, pangontak, panghorhon ni hata ni Jahowa Debata tu angka nanihonaanna. Alai asa mura tangkupon ni halak Juda na tarbuang i dohot jolma sinuaeng, dipillit ma tudosan na sederhana on. Jojal manang gabe gurun, tano bakkalbakkal do tano molo so hea tonu dibahen aek. Udan ma nahumatop manonui tano na bolak. Molo tung adong pe angka boni (bibit) ni suansuanan di tano i, ianggo so adong do aek mamornoki, ndang marlata (tubu) boni i. Taboto do tangkas na songon i nang sian barita panompaon i: “Tagan so adong dope di tano on nasa duhutduhut, jala tagan so martumbur dope nasa bulungbulung di ladang, ai ndang dope diparo Debata udan tu tano on, jala ndang adong dope jolma na mangula tano i. Alai martimpul ma uap sian tano on, gabe dibornohi sandok sisik ni tano on” (1Musa 2:5-6). Tingki i di tano Juda dang adong irigasi, tung holan udan do diarop roha ni jolma na boi mambornoki tano, jala laos udut tusi na manontuhon hadengganon ni ngolu ni jolma. 

Ayat 11: Molo ro hata ni Debata, ndang mulak boti hata ni Tuhan i tu Tuhan, so jolo dibahen lomo ni roha ni Jahowa, jala manjadi tu jolma (tu natinompa ni Jahowa) na gabe hahonaan ni hata i. Molo songon i do, siluluan on do: Aha do hata ni Jahowa Debata? Si Jeremia pasahat hata ni Jahowa na mandok tarbuang Juda 70 taon lelengna, na mandok asa bangunon ni bangso Juda kota di dia nasida maringan; adong na paboahon na mulak do bangso Israel tu tano Juda. Hira sude do isi ni buku Jesaya napaduahon on marisihon hata surirang taringot tu haluaon ni Israel/Juda dohot “pemulihan” ni Israel/Juda/Jerusalem. Sude hata ni Jahowa on pasti jala nunga tarbukti di sejarah ni Israel/Juda. 

Ayat 12-13: Ndang lomo roha ni Jahowa, bangsoNa sai torus didondoni arsak, hagaoron, jala sai holan na mangandungi. Ndang lomo roha ni Jahowa, bangso Israel/Juda torus tarbuang. Ingkon borhat bangso na i di bagasan las ni roha maninggalhon habuangan i, maninggalhon arsak, dohot pardangolan i. Halak na di bagasan las ni roha i ma halak naung dapotan panghirimon na denggan jala bersemangat laho mangeahi aha nahinirim ni rohana i. Sihirimon ni bangso Juda tingki i ima : boi mulak tu Jerusalem, boi mambangun bagas joro ni Jahowa muse; boi mambangun parik ni Jerusalem muse, boi mangatur pamarentaon na muse; boi pangoluhon parugamoon nasida muse; bahkan boi mambangun hajolmaon nasida muse. 

SIPAHUSORHUSORON

Tahangoluhon ma hata ni Jahowa, jala tabahen ma dirinta be gabe inganan HATA ni Jahowa. Di ganup partingkian naeng marsaringar ma hata ni Debata tu hita. Ido nidok ni Martin Luther hata ni Debata gabe (sola scripture) di ngolunta. Ido umbahen didok back to the Bible-mulak tu hata mi Debata. Jala Apostel Paulus mandok hata ni Debata hasea mamodai dohot maminsang hita (2 Tim 3 16-17). Aha do nanaeng peoponta sian hata ni Debata? Ima holong ni roha ni Debata na so hea maninggalhon hita na manghaporseai Ibana. Manang didia pe hita ingkon marhite hata ni Debata. Tutu godang do hamaolon na masa di ngolunta, alai ingkon boi do hita mian di bagasan hata ni Debata. Ndang sude boi jolma sanggup mangadopi hamaolon. Alai ndada gabe mambahen na so hinalomohon ni Debata. Sandok ingkon tiur pingkiranta jala mian di bagasan hata ni Debata. Hata ni Debata gabe sulusulu di ganup sidalananta siganup ari songon nidok ni parpsalmen i hataMi do sulusulu ni pathu jala hatiuron di dalanku (Psalmen 119:105).

Panghirimon na mangolu na ingkon tangkas jumpang di hita manisia. Tadalani ma ngolunta si ganup ari mardonganhon haporseaon tu Debata. Di bagasan pos ni roha do hita laho mangadopi nasa parngoluon on. Unang hita mandele jala unang hita mabiar ala Debata do mandongani hita. Ido nidokna di ayat 12: Ai ingkon di bagasan las ni roha hamu borhat, jala di bagasan hadameon hamu pataruon. Amen.

ACARA MINGGU:

BE. 14: 1+3

Votum. A.VI.6-D.V.18

BE. 743: 1

Patik. I-IV

BE. 178: 2-3

Manopoti Dosa. B.11-C.11

BE. 392: 1-2

Epistel. Mateus 13: 18-23

BE. 238: 1+7

Manghatindanghon Haporseaon

BE. 28: 1+4

Jamita. Jesaya 55: 10-13

BE. 471: 1—

Pangujungi