Ulaon Ni Apostel 9 36-43

BAHAN SERMON MINGGU JUBILATE, 08 MEI 2022

HKBP DISTRIK XVI HUMBANG HABINSARAN

TOPIK : HUASO NI DEBATA NA PANGOLUHON

EV : ULAON NI APOSTEL 9: 36-43                                                           

PATUJOLO

Mangihuthon angka pande bisuk di Padan Naimbaru , udut ni Evanggelium Lukas do buku Ulaon ni Apostel on jala sada do panurat ni dua buku on ima si Lukas sahalak sian 12 sisean ni Jesus. Molo pusat perhatian ni si Lukas di buku Ulaon ni Apostel on ima : " angka na pogos, na metmet , na gale , na martihas ,  angka na so mardihadiha".  Jamot do di surathon si Lukas buku Ulaon ni Apostel on .  Hajamoton i tarida di unsur " universalisme " barita nauli ni Tuhan Yesus .  Lapatanna , di buku an gomos do diondolhon si Lukas : " parsidohoton ni bangso parbegu tu sangkap hatuaon ( keselamatan ) nang tu harajaon ni Debata Ul. 8: 26- 39. 

Songon udut ni buku Evanggelium Lukas buku Ulaon ni Apsotel on , diondolhon panurat do  parasingan ni isi pokok pamaritahonon ni dua buku on .  Di Evanggelium Lukas diondolhon barita taringot tu hadirion ni Jesus secara menyeluruh ima na marpardomuan tu panghobasionNa saleleng di portubion, sian hatutubuNa sahar ro di hananaekNa muse tu banua ginjang. Molo di buku Ulaon ni Apostel pinargogoan ni Tondi Porbadia. Marhite ondolan on ma buku Ulaon ni Apostel gabe salah satu buku dukomen sejarah mansai ringkot laho mangantusi pertumbuhan tarlumobi perkembangan ni huria na parjoloi  tu pamaritahonon ni Barita Na Uli. Marhite angka Apostel di : " perencanaan , metode , strategi , tujuan dohot angka lan na asing (ilmu misi).  Laos sian mutiha on ma torang idaonta bagian pokok isi buku Apostel  ima : harararat ni barita na uli slan Jerusalem ( bnd , 1-5 ) , tu  sandok Judas dahot Samaria ( bnd . 6-12 ) , sahat ro di ujung ni tano on ( bnd 13-28 ) , hombar natinonahon ni Tuhan Jesus tu angka apostelNa siulaan nasida ( 1 : 8 ) Nian gaming do di buku on , barita taringot  tu pangulson ni si Paulus (13-28).

Hatorangan ni Turpuk

Dibaritahon do di turpuk on sahalak parompuan na margoar Tabita na maringan di huta Joppe. Sahalak jolma na burju marroha jala na sai radot mangulahon ulaon parasirohaon do ibana ( ay.36 ). Dohot do ibana pajongjong huria na parjolo di Joppe . Haburjuon dohot bulus ni rohana i tarbarita do jala tangkas dipanghilalahon halak naporsea suang songon i nang halak sileban . Alai marsahit do ibana laos mate (ay.37).  Marhabot ni roha do sude nasa na mananda si Tabita dung dibege barita ni parmondingna i .  Laos songon i nang angka alealena .  Hombar tu adat na somal di huta Joppe , molo adong na monding ingkon peakhonon ma bangke ni namonding i tu bilut parginjang dung jolo diburi ( diparidi ) andorang so ditanom. Torop do na manghanghamauliatehon ulaon ni si Tabita tingki dingoluna .  Alai ndang taarbahen nasida so marhabot ni roha di parmonding ni si Tabita i .  Ro do nasida mamereng bangke ni si Tabita i jala sai tumatangis songon hataridaan ni arsak dohot habot ni rohanasida suang songon i nang holong ni roha na pe .  

Ala tompu do parmonding ni si Tabita i , gabe disangkapi ma asa tibu ditanom bangkena i, unang sanga gabe sega bangkena i .  Dapot roha do na masa on , ala dihatiha i , ndang apala masa dope mayat na di formalin .  Alai andorang so sahat dope di tanom bangke ni si Tabita i di dok do di turpuk on ( ay . 38 ) paboa tongon do di huta Lidda si Petrus uju i .  Huta Lidda di jonok tu huta Joppe. Umbege i , disuru ma dua halak manopot si Petrus paboahon naung monding si Tabita , asa humatop ibana ro laho mangapoi .  Dioloi Ap.Petrus do pangidoan ni na dua halak i , jala borhat ma ibana laho marnida bangke ni si Tabita i .   Dung sahat Ap.Petrus , diarahaon nasida do apostel i mangida si Tabita naung bostang i di bilut parginjang.  Jala ro ma mandapothon ibana angka boruboru namabalu angka na sai tumatangis, laos dipatoduhon nasida do tu Apostel ulos dohot abit angka napinauli ni si Tabita andorang rap dope nasida  (ayat 39). Sian na masa on taida do sada parsaoran na uli di angka na porsea na saroha dohot sapingkiran nang pe ingkon marsirang alani hamatean. 

Masa do halongangnan  na pinatupa ni Debata marhite naposoNa Ap. Petrus (ayat 40-41) tutu do ndang tuk hamaolan dohot pingkiran ni hajolmaonta. Jotjot do masa angka na so pamingkiranta, alai marhite i di patupa Debata do laho patuduhon huasa na. alai marhite Ap. Petrus marsitutu martangiang jala pajumpang dohot Debata laos di si ma halongangan i. Di Dompakhon ma bangke I, jala di dok : O Tabita hehe ma ho! Mulak mangolu muse si Tabita naung mate I, ala huaso ni Debata na mangoloi tangiang ni di Ap. Petrus i. lapatanna sian Debata do huaso na jinalo Ap. Petrus, ndada huaso hajolmaon alai Debata sambaing do. Sar ma barita I tu saluhut pangisi ni huta Joppe, jala torop ma na gabe porsea di Tuhan i

Sipahusorhusoron

Minggunta sadari on ima na margoar Minggu Jubilate na marlapatan : Marolopolop tu Debata ma ale sandok tano on ( Psalm 66 : 1 ) .  Jala Topik ni Minggunta ima : Huaso ni Debata na pangoluhon .  Huaso dohot asi ni roha ni Debata na so dung hea mansohot jala ndang marpansadian , i do na sai mangaramoti , dohot mamasumasu ngolu ni angka na porsea tu Ibana. Jala huaso dohot asi ni roha na sian Tuhan i do nang na margogoihon dohot patauhon huhut pangoluhon saluhut na manghaporseai di Ibana. Ndang hapalang jala ndang tarasam pasupasu las ni roha nasinangkapan ni Tuhan i pasahatonNa tu ganup jolma na olo marpangolohon burju tu Ibana .  Halongangan do tahe ganup ari , ganup tingki pambahenan ni Tuhan i laho parmudumuduhon. Halongangan do na masa nang di hadirion ni si Tabita na andar di dibaritahondi turpuk on .  Ai molo di roha ni hajolmaon ala naung mate jala gabe bangke si Tabita i , na so mungkin i nian gabe mulak mangolu .  Alai sangkap hatuaon na sinangkapan ni Debata ingkon saut do i manjadi , jala ndang adong na boi manundatisa, i ma na pinatupa ni Debata marhite naposoNa Apostel Petrus.

 Dipartingkian ni ngolunta sinuaeng pe , tongtong do dipatupa Debata di hita halongangan i , marhite panarihononNa diangka na ringkot dingolunta siganup ari. Sada sian angka halongangan na balga i , i ma naung tajalo hasesaan ni dosanta marhitehite panobusionNa di hamamateNa di hau pinarsilang i .  Naung patut mate do hita nian alani pardosaonta i , alai nunga dipahehe hita sian hamatean i dibagasan panobusion na marhite mudarNa i . Sian turpuk jamita on tangkas do taida balga ni hagogoon dohot huaso ni Debata na tuk pangoluhon na mate .  Martangiang do Apostel Petrus mangasahon haporseonna na tutu situtu , laos ditangihon Debata do , jala dipatupa Debata halongangan na so tarjalo pamikiran ni jolma .  Asa molo dibagasan haporseaon na tutu situtu jala polin marurat tu Debata tapasahat sude holso ni rohanta , naeng ma tongtong marpos ni roha hita , alusan ni Debata do sude tangiangta i .  Gariada tahe , lobi sian na itahirim i lehonon ni Debata di hita . Tarjou do hita sude angka na porsea tu Debata asa manghatindanghon halongangan i , i ma Kristus naung hehe i ;  tu angka natorop dohot tu angka na so mananda Jesus i dope , asa lam rarat harajaon ni Debata di portibion ​​.  angkup ni i , sai lam ungkap ma rohanta manghangoluhon laho patupahon ulaon parasirohaon i marhitehite angka panghobasionta na lam marsitutu di adopan ni Debata di tongatonga ni huria na tahobasi i , Marhite huaso ni Debata na pangoluhon taparhatopot situtu ma , alani haporseonta nunga gabe taruli hita tu haheheon na saleleng ni lelengna .  AMEN.