Jeremia 29 10-14

Bahan Sermon Jamita 31 Desember 2021

Parpunguan Bodari Ujung Taon

(Jeremia 29:10-14)

SANGKAP HASONANGAN NA SIAN DEBATA

Patujolo 

Molo ro pangunjunan, parungkilon na masa di tonga-tonga di parngoluan ni jolma i, tontu songon na tagamon do mandele jolma i molo dang pintor ro pangurupion ni Debata di parungkilan na ni adopan nasida. Gariada molo boi nian, tor salpu ma dibahen Debata angka parungkilon i, ima molo sian pingkiran dohot pangidoan hajolmaonta di portibi on. Songon i ma tong panghilalan ni bangso Israel uju tarbuang nasida tu Babel. Pitupulu (70) taon nasida na tarbuang i, mansai dokdok jala maheu panghilalan ni bangso i manaon angka sitaonon i, jala hombar tu suhat-suhat ni hajolmaon masai leleng do bangso i manghadopi haporsuhon i, pola sampai 70 taon nasida dalam status halak na tarbuang. Alai sasintong na, nang pe dipaloas Debata bangso i tarbuang, sai tongtong do di dongani Debata jala dang hea ditadinghon Debata bangso i mangadopi haporsuhon i. Lapatanna, molo ingkon tarbuang pe bangso Israel i, cara ni Debata do i naeng mambahen gabe jora bangso Israel i asa unang mandatdati nasida mardosa. Alai dang tartaon bango i be haporsuhon i, gabe dipangido bangso i ma pangurupion sian bangso na asing asa boi hatop nasida malua sian habuangan i. Dison ma manurirangi si Jeremia tu bangso na tarbuang i, asa unang mangasahon gogo ni bangso na asing laho malua sian habuangan i, ala Debata sandiri do na manguhum bangso i, jala holan Debata do na boi paluahon bangso i sian habuangan di Babel. Ido na gabe ojahan na pinasat ni Debata marhite turpuk jamita on, baga-baga ni Debata tu bangso Israel, dung 70 taon nasida tartaban di habungan Babel. 

Hatorangan

Sintong do baga-baga ni Debata. Parhata saut jala parhata sintong do Debata. Ndang adong na boi mangambati manang manundati hasasaut ni hata ni Debata. Nunga dilumbahon Debata hian tu bangso i, na ingkon pitupulu taon ma nasida tarbuang. Didok; Jala sandok tano on gabe halonganan, gabe timbunan batu, jala parhatoban ni raja sian Babel angka bangso on pitupulu taon lelengna (Jer 25:11). Debata sandiri do na mambahen bangso Israel i tarbuang tu Babel alani pardosaon nasida, ndada alani hagogon ni harajon Babel i umbahen boi tartaban bangso i tu bagasan habuangan di Babel, alai Debata sandiri do na pasahathon nasida tu tangan ni raja Babel. Alani i, dang adong na boi paluahon nasida sian habuangan i, jala ndang adong na boi mambahen gabe hatop malua bangso i sian habuangan i, isarana asa holan dua taon songon na sinurirangkon ni panurirang pargapgap (Jer 28:2-4). Debata sandiri na marhuaso paluahon nasida, songon na pinasahat ni  Debata marhite panurirang si Jeremia. Jala dung gok pitupulu taon, ro ma Debata laho mangebati bangsoNa, dipasintong Debata ma baga-bagaNa tu bangsoNa i laho mamboan mulak tu inganan na sasintongna (ay.10). Digombarhon Debata do huasoNa na mangatasi saluhut huaso nang harajaon na adong di tano on. Ndada na gumogo harajaon Babel sain Debata umbahen na bolas nasida manaban bangso ni Debata, Alai Debata sandiri do na mangaloas masa na songon i tu bangso na pinilitNa i.    

Sangkap hasonangan do sangkap ni Debata. “Ai nunga tangkas huboto angka na husangkapi taringot tu hamu, ninna Jahowa, sangkap hasonagan do tahe ndada tu hamagoan, asa Ahu mangalehon tu hamu ujung na hinalungunhonmuna”(Ay. 11). Ndang dung disangkapi Debata na roa tu ganup jolma na tinopaNa i, nang pe tangkang jolma i dohot jotjot mangulahon hajahaton di parngoluonna, alai dang dihalomohon Debata asa tu hamagoan jolma i. Ndang dihalomohon Debata hamatean ni angka parjahat, alai mulak ma nian halak parjahat i tumadingkon dalanna asa mulak mangolu muse ibana, ido na dihalomohon Debata. Hape jotjot lam dipatangkang jolma i rohana, alai nang pe songon i tangkang ni jolma i sai marparmuati do Debata, taida ma balga ni holong ni Debata tu hita jolma na porsea. Ndang adong na tuk mangambati sangkap ni Debata. Manang songon dia pe hagogon ni nasa harajaon, haportibion na adong di tano on, jala manang songon di ape hoasi ni angka parhuaso, ndang tuk i mangambati sangkap ni Debata di tonga-tonga ni parngoluan ni jolma. Marhuaso do Debata mamangke nasa ragam ni angka na masa di portibi on laho patulushon sangkapNa. Alani i, molo naung dilehon Debata jaminan sangkap hasonangan na ingkon pasautonNa do i tu hita, tahaposi ma i, unang  pintor mandele jala ganggu rohata tu Debata. Baliksa, marsihohot ma hita tu Debata marhite sian ngolu na marpos ni roha na polin dohot manghirim tu baga-bagaNa i.    

Jou jala lulu i ma Jahowa, Ibana do pasonang ngolum. Marhite uhum na mangonai tu bangso i, dihirim Debata do gabe parsiajaran ma tu bangso i laho manopoti dosana jala mulak tu Debata. Dung ditanda dosana jala dipauba rohana, mulak ma na nasida marsomba tu Debata Songon lirik ni ende ta di BE No. 424: 1-2, “Soara ni Tondi ni Tuhanta i, jotjot dilaosi ditolak hoi. Sai tanda jaemu, pauba roham, dapothon Tuhanmu sisesa dosam. Marunduk ni roha topoti sude, pambaenanmu na torbang, jengkelmu sude. Pasahat tu Jesus sandok dirimi, sai tong pasunggulhon panghophopNa i.” Joujou martangiang ma tu Debata, ido dalan ni halak na mangadopi hamaolon dohot haporsuhon laho mangido pangurupion tu Debata asa dipalua, nada gabe mangido pangupurion tu na asing. Alai, huhut ma ditanda dosana jala dipauba rohana (bertobat) unang mangulahon dosa be, dung i ro ma joujou jala martangiang pasahat dirita tu Debata. Molo nunga jumpang tingkina hombar tu suhatsuhat ni Debata, na rade do Debata pasuanghon ganup halak na mangadopi sitaonon dohot haporsuhon i, sumuang tu hangoluan naung gabe tohapna hian. Unang ganggu rohata jala tapasahat ma sude tu Debata, ala Ibana do na pasuang ngoluta jolma na porsea di portibi on. 

Sipahusor-husoronta

On ma borngin parpudi di hita di bagasan taon 2021 on. Marpungu do hita nuaeng; parjolo naeng mandok mauliate tu Debata ala didongani hita mamolus taon on, jala paduahon mangido pangurupion ma hita sian Debata asa didongani hita bongot tu taon na imbaru. Diparpunguanta di bagasan borngin on disungguli Debata di hita marhite topik ni turpuk jamitata “Sangkap Hasonagan na sian Debata”, asa marposniroha tu Debata jala unang ganggu rohata mamongoti taon na imbaru 2022 na ro on. Atik pe ragam na taadopi hamaolon, haporsuhon nang arsak ni roha di bagasan sataon on, alai holong ni roha ni Debata na so hadodoan i sai dipapatar Debata do tu hita, diramoti do hita sahat di ujung taon on. Mandok mauliate do hita tu Debata, boi hita marpungu di parpunguan borngin on, di bagasan hahipason dohot las ni roha. Alani i, songon pos ni rohata di pangaramotion ni Debata tu hita di bagasan na sataon on, ingkon songon i do pos ni roha di pangaramotion dohot pandonganion ni Debata tu hita laho mandalani taon na imbaru 2022 on, ala sangkap Hasonangan do sangkap ni Debata tu hita. Gabe halak na marsihohot pasahaton diri tu Ibana. Amen.