Lukas 24 1-12

Bahan Sermon Parhalado HKBP Ressort Panai Hilir

Minggu Paskah I (Parningotan Ari Haheheon Ni Tuhan Jesus), 17 April 2022

Nungga Hehe Jesus i

Lukas 24:1-12

I. Patujolo Ni Turpuk 

Buku Evangelium Lukas ima buku na manggurithon pardalanan ngolu nang panghobasion ni Jesus saleleng di portibion. Jala sada sian pardalanan ni Jesus na digurithon di Evangelium Lukas on ima taringot tu hamamate dohot haheheonNa. Jala on do na gabe jamita ima taringot tu haheheon ni Kristus I sian hamateanNa. Andorang so mate dope Ibana, nungga parjolo dipaboa Ibana hian, na ingkon manaon na porsuk I do Ibana, ingkon mate do Ibana jala ingkon hehe di ari patulohon (Luk 9:22). Alai ndang diantusi angka sisean i angka hataNa i. Ido umbahen gabe adong ma biar ni roha di angka siseanNa i dung mate Jesus di hau pinarsilang i. Hamamate ni Jesus na mamboan haluaon do tu ganup halak na porsea tu Ibana dohot tu angka na naeng porsea. Alani ido di ari patoluhon I, hehe do Ibana sian angka na mate laho pasingkophon parsuruan ni Debata dibagasan hadirionNa. Alani I, tapaihuihut ma barita haheheon ni Kristus I marhite turpuk jamita di Minggu on.  

II. Hatorangan Ni Turpuk

1. Unang Mabiar, Mangolu do Tuhanta. Dung mate Jesus, gabe adong do biar ni roha di angka siseanNa i ala ndang adong be dongan nasida laho marbarita Nauli. Tarlumobi ma nang angka sisolhot ni Jesus ima si Maria Magdalena dohot donganna parompuan na paihutihut panaonon ni Jesus mamungka sian na ditangkup Ibana sahat tu na diparsilangkon Ibana. Dung ditanom bangke ni Jesus i lam lungun ma panghilalaan nasida tarlumobi angka siseanNa i. Alai, ianggo angka parompuan I laho do tu tanoman I laho mangida bangke ni Jesus songon na somal diulahon halak Jahudi na laho tu tanoman molo nungga adong tolu ari ditanom. Jala dihobasi nasida do angka na hushus laho mamiahi Jesus. Alai dung bongot nasida tu tanoman i, diida nasida ma nunga ungkap tanoman I jala nungga digulang batu na bolon i sian baba ni pintu tanoman i. Jala dirippu nasida, adong jolma na mambuat bangke ni Jesus i. Mansai jut ma rohanasida huhut mabiar nasida. Alai, di na jut I roha nasida, disi do ro suru-suruan ni Tuhan i, mandapothon nasida maribat na marlinanglinang. Gabe mabiar situtu ma nasida jala tahutan. Di na tahutan i nasida ro ma surusuruan i mandok tu nasida: “Boasa luluanmuna na mangolu di inganan ni angka na mate? Ndang dison Ibana: Nunga dipahehe Ibana”. Lapatanna ni pandohan  ima laho paboahon tu nasida, nungga mulak mangolu Jesus i songon na didok na i. Ndang diloas Tuhan I nasida lalap dihatahuton dohot biar ni roha nasida, ido umbahen  ro sururuan ni Debata laho patoguhon rohanasida asa porsea di haheheon ni Jesus i. Sian Barita on boi idaonta, dang hamatean gabe inganan na parpudi di Jesus. Suang songon I ma nang angka na porsea di Tuhan Jesus i, ndada ngolu na laho salpu on inganan parpudi.  Molo porsea do hita di Tuhan i, surgo i ma na ingkon ingananta ima hangoluan na saleleng ni lelengna. Murujung do angka na bernit i nang hamatean i marhite haheheon ni Kristus i. Suang songon do nang ngolu di halak na porsea di Kristus i, ingkon mamolus haporsuhon do jala ikkon manaon na bernit do saleleng mangolu. Alai taingot ma ndada haporsuhon i dohot hasusaan i jambarta na mangoluon. Ndada Sitaonon i na gabe ujung ni haporseaonta. Ala nungga Kristus i, na parjolo ma ngae saluhut na i jala nungga monang Ibana manaluhon haporsuhon dohot hamatean i, hita ingkon dipamonang do hita manaluhon saluhutna I molo porsea hita tu Ibana. Unang ganggu rohanta molo tung godang sitaonon i, mangolu do Tuhanta.

2. Haheheon Ni Jesus ima Barita Nauli. Haheheon ni Jesus ima sada halongangan na so tarhatahon hinasongkalna. Ndang adong haheheon songon haheheon ni Kristus sian na robi sahat di ari sogot. Haheheon ni Jesus sian na mate, ndada haheheon na somal songon halonganan na pinatupa ni Jesus na pahehe halak sian na mate. Andul marasing do haheheon ni Jesus sian na mate, sian haheheon na mate na hea masa di portibion. Haheheon ni Jesus sian na mate ima haheheon sian hamatean alani dosa ni sandok portibion jala haheheonNa I do na manghorhon hangoluan sisaleleng ni lelengna di angka na porsea. Jala on do Barita Nauli i, na ingkon pasahaton ni angka parompuan na parjolo tu angka sisean ni Jesus. Ido umbahen diayat 9 dipaboa do na pintor mulak do nasida dungkon mambege barita sian  surusuruan i. Dipasahat Debata tugas na mansai balga tu angka parompuan I, ai gabe parbarita nauli nasida, mamaritahon haheheon i tu angka siseanNa. Sian peristiwa haheheon ni Jesus on, boi do idaonta, sian na jolo nunga dipangke be parompuan I gabe parbarita nauli. Alai, ndang apala diakui i ditongatongan adat hajahudion. Ido umbahen gabe dirippu angka sisean i do holan turiturian barita na binoan ni angka parompuan i. Ndang porsea nasida dibarita i. Alai ianggo si Petrus, dung dibege Ibana barita haheheon I, hehe do Ibana laho tu tanoman I pamanathon barita ni parompuan i. Alani do gabe muli ma ibana huhut longan marnida angka na masa I jala diingot Ibana ma sude na didok ni Jesus andorang so mate Ibana. Patar ma sude diparningotan ni si Petrus taringot tu haheheon naung pinaboa ni Jesus I tu nasida. 

III. Panimpuli 

Haheheon ni Kristus ima hahomion ni Debata laho patuduhon holong ni rohaNa tu angka na hinophopNa. Alani, barita haheheon ni Jesus ndang tarpatorang i marhite pingkiranta sambing. Molo so porsea hita tu Kristus i ndang tatanda haheheonNa I jala molo so mangolu hita dibagasan HataNa i ndang boi masuk tu rohanta taringot tu haheheonNa. Songon angka siseanNa  na so porsea tu Hata Ni Jesus i, ido umbahen gabe adong keraguan di nasida taringot tu haheheon i. Alai, dung diida nasida Jesus disi pe dihaporseai nasida ma naung hehe Kristus. Alani, haheheon ni Jesus na tapestahon sadarion unang ma tabaen i holan seremonial sambing manang holan gabe turiturion na ingkon taingot alai ndang tahaporseai. Alai, marhite haheheonNa na tapestahon ganup taon naeng ma nian i dalan laho patorashon haporseaonta tu Kristus songon Sipalua di hita. Nang pe dperistiwa naung salpu I, alai na mansai ringkot taingot, mate pe Ibana jala hehe pe Ibana ndada holan tu ngolu ni halak na parjolo I alai dohot nang tu hita nuaeng na porsea di Ibana. Alani, haheheon Kristus pahehehon haporseaonta ma i laho parnindangion taringot Tu Kristus i. Halak Kristen na mangolu ima halak na olo marpanindangion, marhite hata nang angka parange. Panindangion na sintong I mangonjar rohanta laho patupahon angka na denggan di panggulmiton ni ngolunta jala sian tandaon ni portibion ma , na mangolu do Kristus jala na sai didongani Jesus do angka na porsea I di saluhut partingkian ni ngoluna. Amen. 

Cal. Bvr. Irma Gultom

Jesaya 52 13-15

Parningotan Ari Hamamate ni Tuhan Jesus, 15 April 2022

NAPOSO NI DEBATA NA TUMAON NA BERNIT (Jesaya 52 : 13 - 15)

I. Patujolo 

"Ai songon timbo ni angka langit sian tano on, songon i do tumimbo angka dalanKu sian dalan muna, jala angka pingkiranKu sian pingkiranmuna i” (Jesaya 55:9). Andul sumurung do sangkap, dalan nang pingkiran ni Tuhan i, alai sipata gabe maol diantusi jolma. Ido na masa tu bangso Israel hatiha i. Ai tongon do nasida tarbuang tu Babel, ala naung mardosa nasida dompak Debata. Di bagasan parsorion bolon do nasida. Parir jala tung mansai porsuk do ngolu nasida hatiha i. Hira so adong dalan haluaon (pangurupion) na boi hirimon. Ndang talup nasida mangalo bangso Babel na gogo i. Gabe songon na mangholom dihilala nasida parngoluan i. Alai ro ma Tuhan i mangapuli nasida. Dilehon ma bagabaga haluaon tu nasida. Disuru Tuhan i ma naposoNa paluahon nasida jala mamboan nasida mulak.

Tontu barita las ni roha do i di bangso Israel. “Nunga marujung parungkilonna, ai nunga salese dosana i” (Jesaya 40:2). Ai malua ma nasida sian habuangan i. Mulak ma nasida. Alai laos huhut do gabe tarhalomong nasida ala maol siat tu roha nasida hatorangan na pinasahat ni panurirang Jesaya taringot tu hadirion ni naposo ni Debata na disuru paluahon nasida. “Ai simbur do ibana tubu songon tumbur di adopan ni bohiNa, jala songon tunas sian tano na mahiang. Ndang adong hinauli ni rupana manang hamuliaonna, ia huida hami ibana ndang adong rupana umbahen sihalomohononhon ibana" (Jesaya 53:2). Maol siat tu roha nasida hatorangan i. Ai dihirim nasida do Mesias Sipalua i, na gogo, na sangap, na marmulia jala na gok huaso Na. Hape andul do na ro i di rohanasida. Boha do nasida manghirim haluaon marhite gombaran si songon i? So tung maon gabe tarhirim do nasida. Alani tung maol situtu do i tarjalo rohanasida. Disi ma naeng taantusi hata ni Tuhan na mandok: "Ai songon timbo ni angka langit sian tano on, songon i do tumimbo angka dalanKu sian dalanmuna i, jala angka pingkiranKu sian pingkiranmuna i” (Jesaya 35:9) asa laos i ma manunggul rohanta manghaporseai Tuhan i dohot sangkap-sangkapNa di ngolunta. Jala tutu marhapataran do i. Ndang tardodo sangkap dohot pingkiran nang dalan ni Tuhan i laho paluahon BangsoNa. Sipata suhar idaon alai andul sumurung do pingkiran ni Tunan i. I do na boi idaonta marhite turpuk on, marhite hatorangan taringot tu naposo ni Debata.

II. Hatorangan

Di turpuk on dipatorang do taringot tu hatimbulon dohor hametmeton ni naposo ni Debata. Sasintongna sai hot do Jesaya 52:13-15 on dohot Jesaya 53 laho patoranghon naposo ni Debata. Alai agak marasing do turpuk on patoranghon hadirion ni naposo ni Debata ala dipungka marhite hata panimpuli, ima parbue ni ulaonna. Ai tangkas do didok: "Ida ma, pistar do pambahenan ni naposongKu; tarhinsat do ibana jala dipatimbo gabe timbul situtu sogot” (ay.13). Ima na naeng masa tu naposo ni Debata, di ujungna. Alai andorang so i, andorang so tarhinsat jala dipatimbo ibana, andorang so patar hatimbulonna, nunga jumolo ditaon ibana parsorion bolon, ganda situtu parniahapan na sahat tu ibana.

Di bagasan turpuk jamita on ndang apala nunur dipatorang saluhut parniahapanna i. Alai boi do bagas taantusi i molo tajaha Jesaya 53. Molo di turpuk jamita on dipatorang do, pola songgot roha ni torop halak mida ibana, binahen ni hinaroa ni rupana dibahen tandina sian jolma hian. Boasa didok tarsonggot? Boi do ala ndang hea dope diida nasida jolma na mangae parsorion songon i posa. Dileai, dipasiding jolma do ibana, mangae pardangolan dohot sahit, tartullang, mabugang, dipasipal dohot lan na asing dope dipatorang disi taringot tu parsorion bolon na sahat tu ibana. Posi jala parir situtu. Alani do umbahen na tarsonggot na marnidasa. Alai boi do nasida tarsonggot, ndada holan alani parniahapan na borat i alai tarlumobi ala maol siat tu rohanasida na ingkon songon i ma masa tu sahalak na targoar naposo ni Debata. Nda marhuaso do Debata jala sun timbul do hagogoonNa? Antong boasa ma ingkon songon i masa tu naposo ni Debata? Dihirim nasida do naposo ni Debata i na marhagogoon situtu, asa talup manaluhon bangso Babel na gogo i. Hape na ro on andul do sian na dipingkiri roha nasida. Godang nari angka sungkunsungkun na solot di bagasan rohanasida taringot tu na masa i, alai ndang taralusi gabe songgot ma roha nasida marnidasa. Gabe maol ma diantusi jala tarjalo rohanasida paboa na tutu situtu do ibana naposo ni Debata. Atik tung so i? Atik ung so sintong i? Gabe lam dipalea jala ditulak nasida ma ibana.

Alai tutu ma hata ni Tuhan i: "Ai songon timbo ni angka langit sian tano on, songon i do tumimbo angka dalanKu sian dalanmuna i, jala angka pingkiranku sian pingkiranmuna i” (Jesaya 55:9). Laos gabe tarsonggot do muse nasida, gariada angka raja pe gabe hohom do ndang boi be manghuling. Ala masa ma na so hea dibege nasida, masa ma angka na maol siat tu pingkiran nang rohanasida. Ala marhite haleaon dohot hapariron ni naposoNa i do hape dipangke Debata dalan Jaho paluahon bangsoNa. Jala di ujungna dipatimbul Debata do ibana (ay. 13).

Ima na ingkon masa tu naposo ni Debata songon na disuriranghon Panurirang Jesaya tu bangso Israel. Jala ima na masa tu Jesus Kristus, Mesias na ro tu portibi on laho paluahon jolma manisia. Marhite parningotan di ari hamamate ni Tuhan Jesus sadari on tangkas do tapaingotingot saluhut parniapanan na niae ni Tuhan Jesus laho manghophop hita jolma. Dipillit Ibana do dalan haleaon. Olo do Ibana gabe metmet jala manaon haporsuhan godang holan laho manobus hita sian dosa dohot hamatean i. Nunga tapaihutihut sude barita partinaonan i (via dolorosa). Naeng ma parningotan i lam manunggul rohanta mangargahon holongNa i. Unang marisuang tabahen holongNa i asa unang be tadatdati mardosa.

III. Siparhusorhusorhon 

Alai udut tusi laos disunggul do nang rohanta asa lam porsea hita tu Ibana. Ai nunga monang Ibana, nunga ditaluhon hamatean dohot sibolis i. Ndang hamatean i ujungna, alai haheheonNa do. Tangkas do i dipatorang di turpuk on; “Tarhinsat do Ibana jala dipatimbo, gabe timbul situtu sogot.” HatimbulonNa, ido na gabe panimpuli. Alani ndang adong be sidalianta sumurut manghaporseai Ibana. Di saluhut na masa di ngolunta, tarlumobi di parsorion na taadopi, tongtong marhaposan ma hita tu Ibana, ai tuk do huasoNa laho mangurupi jala paluahon hita. Nang pe sipata angka na masa di ngolunta i maol tapingkiri jala suhar di rohanta, alai unang sumurut rohanta sian Ibana, unang tatadinghon Ibana, unang tatundalhon Ibana. Ingkon pos do rohanta, ragam do dalan dibahen jala dipatupa Ibana laho mangasii hita. “Ai taboto do, saluhut do manumpak tu na denggan di angka na marholong ni roha di Debata, angka na jinouNa sian tahiNa hian" (Rom 8:28).

Cal. Pdt. Frido Nainggolan

Psalmen 118 19-29

Bahan Sermon Parhalado HKBP Ressort Panai Hilir

Minggu Palmarum, 10 April 2022

PINASUPASU MA NA RO DI BAGASAN GOAR NI TUHAN I

Psalmen 118:19-29

1. Psalmen 118 ima na marrumang ende pujipujian tu Jahowa dung mulak bangso Israel sian habuangan Babel. Dipatomutomu do ende on laho manghalashon dohot manghamauliatehon pamgurupion ni Debata na paluahon bangso I sian habuangan. Jala mangihut tusi gabe ende pujipujian ni bangso ma on uju nangkok bangso I marpesta di Jerusalem. Jala endehon nasida ma secara responsoria (marsialusalusan). Dibagasan turpuk on, dihatindanghon do hagogoon ni Jahowa do mual pangurupion di na porsea i.  Ala nungga malua Jerusalem sian huaso ni musu I jala marujung parungkilon nasida. Alani do, marhobas ma nasida borhat tu bagas joro laho manomba, mamuji Debata pasahathon pelean hamauliateon. Marlas ni roha bangso nangkok tu joro I manghalashon pangurupion ni Jahowa. Di Psalmen on dihalashon do hapapatar ni huaso dohot hagogoon ni Tuhan I paluahon bangsoNa. Marhite panindangion I diparhatopot nasida do na jotjot nasida ganggu di huaso ni Jahowa. Alai dung mulak nasida sian habuangan idiparhatopot nasida ma hagogoon ni huaso ni Tuhan I paluahon nasida sian habuangan i.

2. Diayat 19 i, “Ungkap hamu ma diahu angka bahal ni hatigoran, asa hubongoti angka I laho mamuji  Jahowa”. Pandohan ima pangidoan ni na manguluhon bangso I tu malim na adong dibagas joro i. Bahal hatigoran ima bahal ni Jahowa, na boi dibongoti angka halak partigor ima angka halak na marsihohot manghaposi Jahowa.  Didok muse diayat 20, “On do bahal ni Jahowa, bongotan ni angka partigor do I sogot.” Pandohan on, paboahon na adong do syarat laho mambongoti bahal hatigoran i, ima halak partigor jala na satia tu Debata, partangan na lidang, na ias roha, na so marpingkiran na jahat, na so mangansi (Psal. 24:4, Psal. 15:1-5). Na bongot tu bagas joro ima siula lomo ni roha ni Debata. Mangulahon lomo ni rohaNa lapatanna dao sian hajahaton (Gal. 5:17-21). Dibagasan turpuk on ndada na mandok naung tigor bangso I umbahen diloas masuk tu bagas joro i. Alai, naeng pasahathon hamauliateon ni roha nasida di Asi ni roha ni Debata naung jinalo nasida. Hasatiaon ni Jahowa di padan naung binuhulNa I, I do na sai tontong mian di parningotan di bangso ni Debata. Mandok mauliate nasida ala ditanda nasida hahurangannasida, gabe dihalashon ma pangurupion na jina lona. Halak na so umboto mandok mauliate, ima na so manghilalahon asi ni roha dohot pangurupion ni Tuhan i di ngoluna, ala gogona do I rajumi.

3. Dung dipanghilalahon nasida asi ni roha ni Debata, ro ma panindangion nasida taringot tu batu parsuhi. Diayat 22 didok do, “batu naung binolonghon ni angka pande bagas, ima gabe batu parsuhi”. Diparhatopot nasida Jahowa na tinundalhon I do haluaon di nasida. Songon batu na binolonghon ni pande bagas dipangke gabe batu parsuhi. Songon i Debata bertindak laho paluahon bangso Israel. Nang pe ditundalhon bangso I Jahowa, hot do bagabagaNa paluahon nasida (Jesaya 28:16). Nungga dipillit Debata batu parsuhi I gabe haluaon. Dipadan na Imbaru, dijamitahon Apostel Petrus, ia Jesus ima batu parsuhi na binolongkon ni portibion alai arga di Debata (1 Petrus 4:2-6). Ibana do gabe batu parsuhi dibagas joro ni Debata na imbaru. Kristus do ojahan jala ulu ni huriaNa jala hita angka na tinobusNa holan mandok mauliate di sude naung pinatupa Jahowa. Jala hapapatar ni haluaon i  nunga singkop dibagasan hadirion ni Kristus I hombar tu holong ni roha ni Debata. 

4. Haluaon na pinatupa ni Debata ima sada halongangan do i di parPsalmen on nang di angka na manghaporseai Debata (ay. 23).  Angka halongangan naung pinatupa ni Debata dipardalanan ni ngolu ni bangso i, ido na pahothon haporseaon nasida tu Debata. Jala ido na mangonjar roha ni par Psalmen on manghatindanghon “Ari on do na jinadihon ni Jahowa”. Lapatan  ni pandohan on ima haluaon na pinatupa ni Debata di tongatonga ni bangso i. Halongangan do diida par psalmen i angka na masa i. ndang pambahenan ni jolma. Haluaon na pinatupaNa i do na pinaboa ni parpsalmen jala laho manjanghon haluaon I ndang adong agia aha so holan mandok mauliate, marolopolop, dohot marlasniroha. Alani do diarahon ibana do bangso i asa manjanghon haluaon i dibagasan las ni roha dohot olopolop (ay. 24) ala holan sian Jahowa do haluaon i. Naeng marlas ni roha jala marolopolop bangso I tu Debata ala nungga dipalua Debata nasida sian habuangan mulak tu tano na pinarbagabagahon Jahowa Debata. Ndada holan haluaon naung masa i nasida mandok mauliate alai dohot tu ari na mangihut dipangaramotion  ni Debata. Ido umbahen didok, “Iale Jahowa, sai manumpak ma Ho, Iale Jahowa sai manumpak ma Ho (ay. 25). Pandohan on, ima pangidoan ni bangso I asa tongtong ma Debata na gabe dongan nasida tu ari na mangihut. 

5. Dung diparhatopot bangso I haluaon na pinatupa ni Debata, jala dipuji nasida Debata ro ma muse pandohan na mandok, “pinasupasu ma na ro marhitehite goar ni Jahowa, hupasupasu hami ma hamu, angka na sian bagas ni Jahowa”. Nasa na ro marsomba tu Jahowa di bagas joro di Jerusalem, bongotanna do bahal manang harbangan, ditomu do nasida marhite pandohan on. Boasa ingkon adong pandohan on? Molo taida di angka Psalmen na asing (24:5, 134:3), tangkas do hata pasupasui tu angka na ro marsomba dipasahat angka malim na marhobas dibagas joro i. Lapatanna, ndang sian hadirion bangso I ro marsomba tu Jerusalem alai ingkon dibagasan goar ni Jahowa, ai Ibana do hatiuron nasida (Psal. 27:1). On ma hataridaan ni bangso i manghalashon haluaon na jinalo nasida. Di padan na imbaru, Matius 21:9, didok do “ Hosianna di Anak Raja di Anak ni raja Daud! Pinasupasu ma na ro marhitehite Goar ni Tuhan i.” Tudutudu do on tu Tuhan Jesus na ro mamboan haluaon na tinomunomu ni bangso Jahudi dibagasan olopolop di pintu ni bagas joro na di Jerusalem na binaritahon si Mateus. Ibana do batu na binolonghon I, na pinarsilanghon ni Jahudi. Alai gabe batu parsuhi Ibana hehe jala manaek tu surgo. Ibana na nilelean ni bangso Jahudi, dibahen Debata gabe batu parsuhi jala Sipalua. Jala on do na gabe sintuhu ni olopolop dohot las ni roha di angka na porsea di tingki marningot passion ni Kristus I (1 Kor. 2:6-12). Diolophon angka na porsea I haroro ni Kristus songon Sipalua. 

6. Halak na olo manaili pardalanan ni ngoluna jala na mananda pambahenan ni Debata, ido na tuk laho mandol mauliate dohot mamuji Debata. Songon I do bangso ni Debata, di na marningot nasida dipardalanan ni ngolu nasida haruar sian habuangan sahat tu Jerusalem. Saluhutnai, ndada alani pambahenan nasida alai holan alani haluaon ni Debata do. Ido umbahen diayat 28 I didok do, “Ho do Debatangku, Ho do pujionku, ale Debatangku, sai Ho do patimbulonku”. Na marlapatan ma i holan Jahowa Debata do na patut sipujion ro di salelengnilelengna. Pamujion I ro sian panandaon na tangkas di sude pambahenan ni Debata naung paluahon parpsalmen I sian hamatean. Jala on do nuaeng na gabe sosososo di hita angka na porsea di Tuhan i. Ingkon do mananda hita dihadirionta asa tung tarbahen hita mandok mauliate di denggan ni basa ni Debata naung tajalo i. Alani, songon dia do hita mandok mauliate tu Debata? Naparjolo, mandok mauliate di ragam ni ngolu naung tabolus. Ndang tagaman so godang arsak dohot parungkilon  na mambahen hita gabe maheu jala mandele. Alai nang pe masa saluhutna i, ingkon do tongtong hita mandok mauliate tu Ibana ai Ibana do na mangurupi hita laho mamolus angka sitaonon i. Mandok mauliate ma hita ala nungga diondihon Debata ngolunta marhite haroro ni Kristus i na paluaohon hita sian hamatean alani dosanta. Paduahon, molo mananda hita dihagaleaonta, ingkon do tajouhon, “Iale Jahowa sai manumpak ma Ho”. Tangiangta do I asa sai tongtong diondihon hita di angka na masa ala Ibana do mamasumasu ngolunta jala haluaon dihita. Alani, tajaouhon ma Ibana diparadalanan ni ngolunta. Ala nunga bongot Ibana tu portibion mangalehon haluaon di hita. Amen.

Pdt. Paian Manurung

Hosea 1 2-9

 BAHAN SERMON EVANGELIUM MINGGU IV DUNG TRINITATIS,

MINGGU, 24 JULI 2022

HOSEA 1:2-9

DEBATA NA SATIA DIBAGASAN HOLONGNA

I. Patujolo

Di buku Panurirang Hosea ma tarida gombaran na khusus hubungan ni Debata na marsaripe tu bangso Israel martimbanghon sian angka buku na asing di Bibel. Debata marri pehon bangso Is rael. Debata mang haholongi situtu ibana. Pola marhite “padan” dirahut Ibana diriNa mang haholongi bangso i. Hape aha ma na taida balos ni I sian bangso Israel. Lungun tarida. Sahira pepatah na mandok: Tangan yang bertepuk sebelah, tak bersambut, cinta sebelah, air susu dibalas dengan air tuba, dohot lan na asing. Alai taida ma, songon dia Debata patuduhon holongNa na satia.

Buku Hosea on pe ima sada sian Hata ni Debata taringot tu barita holong ni roha do. Holong ni roha ni Debata, padutuhon Debata nasatia di bagasan holongNa. Jala tandi jala marasing situtu do holong ni roha na pinatudu ni Debata di bagasan buku Hosea on sian angka buku manang sarita naasing na hea tubu di liat portibion. Ala disuru Debata sahalak panurirang laho mambuat sada pelacur na margoar si Gomer bahen jolmana. Jala dungkon dibuat, tongtong dope diulahon si Gomer pangalahona songon nasomal, alai tongtong dihaholongi. Suman ni bangso Israel na so marnampuna, ala tumadingkon jala tumundalhon Jahowa manuntun lomona, alai manontong dihaholongi Debata.

II. Hatorangan ni Turpuk

Ay. 2-3 Dungkon mangkuling Jahowa, hata naparjolo na pinasahatNa tu si Hosea ima taringot tu diri ni si Hosea sandiri. Ndang piga hita jolma na mian di bagasan pangalaho na songonon, sai godangan do hita jumolo marnida HataNa i maradophon dongan sian maradophon dirinta sandiri. Andorang so diborhati Debata si Hosea manurirangi bangsoNa, jumolo do ibana dipanghulingi dohot diparenta Debata. Na maol situtu do hata ni Debata na sahat tu ibana. Ingkon buatonna sada boruboru naung pilit langkana jala naso sumanbe pangalahona (pelacur) bahen jolmana. Bidang do nian pangantusion taringot tu status ni boruboruon. Alai sada ma tabuat, ima sahalak parompuan pelacur, na bebas jala nasoadong marnampunahon ibana. Ibana ma disuru Debata buaton ni si Hosea bahen jolmana. Sada dalan ni Debata do i, laho patuduhon tu hajolmaon boha do paetna jala dokdokna molo pola songgop pangalaho na songonon ripe ni sahalak jolma. Asa molo marsak hita jolma songoni ma balga ni arsak ni Debata molo tabahen songoni tu Ibana. Manaon Ibana songon panaonon ni hita jolma. Dipasuman Debata diriNa songon Ama na mangalap bangsoNa. Alai manimbil bangsoi dibaen hisap dohot hagiot ni rohana manuntun lomona tumundalhon Jahowa. Jadi laho do si Hosea mambuat si Gomer, boru ni si Diblaim songon nasinuru ni Jahowa. Porlu tangkas dihita ndang na sipanolopi Debata tu nasa pangahao na melacurkan diri. Laho pe si Hosea holan laho manggohi parsuruon ni Jahowa do ibana, jala laho patuduhon hubungan ni Debata tu jolma, suman ni hubungan ni parsaripeon, ama tu ina di tonga ni ruma tangga. Boha ma dangolna molo ndang satia ripenta tu hita. Songoni ma gombaran ni panghilalaan ni Debata molo ndang satia hita tu ibana. Jala ganup halak na manadingkon Jahowa sumanmai tu halak na so satia tu ripena, jala tardok ma ibana songon sahalak pelacur. Siala nunga dipaojak Debata hita bahen nampunaNa sandiri (Jes. 43:1).

Ay.4 Gabegabean ma nasida jala ditubuhon di ibana sada anak. Sian pandohan on boi antusanta ia dakdanak na parjolo on sorang sian nasida nadua, ndang sian pangalaho nasosuman i. Dung i didok Jahowa ma tu ibana: Jou ma goarna si Jesreel; ai otik nari marlulu ma ahu di angka utang mudar ni si Jesreel tu pinompar ni si Jehu, jala ahu pasiaphon harajaon ni pinompar ni Israel (ay. 4). Ianakhonna naparjolo on patuduhon hadosaon ni Israel. Paingothon nasida di hamumuruk ni si Jehu namunu si Jora, si Amazia, dohot angka ianakhon ni si Ahab di huta Jesreel. Tung pe na patuduhon rimas ni Jahowa ibana alai marlomolomo do ibana pasauthon ulaon i. Ndang satia bangsoNa. 

Ay.5-6 Dohot patuduhon na so dipasombu Debata mian manang sada pe hajahaton. Nang pe boi idaon sai hira namalua halak parjahat i sian uhum, alai di tingkina masa do pamaloson sian Jahowa. Di ari na sasada i ponggolhononKu ma sior ni Israel di rura Jesreel. Dung i gabegabean muse ma boruboru i, jala ditubuhon sada boru. Dung i didok Jahowa ma tu ibana: Jou ma goarna Nai Sohinasian: ai ndang be marpangulahi rohangku tu pinompar ni Israel, manang marpamuati rohangku tu nasida (ay. 6). Lo-Ruhamah manang Nai Sohinasian; ai ndang be marpangulahi roha ni Debata tu pinompar ni Israel. Manang andigan pe dijou goar on, taringot ma bangsoNa na hea jongjong Debata laho manguhumi nasida.

Ay.7 Alai dungkon i manigor diuduti do muse mandok namarpangulahi do roha ni Jahowa tu pinompar ni Juda jala paluaonNa nasida (ay. 7). Balga situtu do rimas ni Jahowa marnida hita, alai ndang dipasombu Debata mago pasupasuNa i sian hita. Manontong do mian Debata di bagasan holongNa. Dohot jompok boi dohononta "asa molo dipalua pe hita, ndang alani hatigoran dohot hasintonganta, tung holan ala asi ni rohaNa sambing nama. Molo alani dosa dohot pambahenanta na so tama, ndang tama asianNa be hita. Asa uju songgop nasa haholomon na holom situtu, dipeop Ibana do tongtong asi ni roha. Ndang adong borngin na holom situtu na so marsinondang bintang ni Debata. Ndang paluaonNa Juda marhitehite sior manang podang manang hamusuon, manang hoda manang jolma parsihundul pe (ay. 7), na marlapatan ndang jasa ni jolma haluaon i. Jahowa sandiri do mambahen dalan tu haluaon i.

Ay.8-9 Laos songoni ma dung gabegabean muse boruboru i, manubuhon sada nari anak. Jou ma goarna Lo Ami, ninna Jahowa, ai ndang bangsongku hamu, jala ndang hamu nampuna ahu (ay. 8-9). Lam tangkas ma idaonta, pelacuran rohani ni bangso Israel do na tinudu ni turpuk on. Ndang adong na so sega binahen ni pangalaho nasida na manuntun lomo jala manundalhon Jahowa. Sahat tu na so dietong be nasida songon bangsoNa. Alai ndang mansohot di si asi ni roha ni Jahowa. Tu angka bindu na mangihut jumpang hita do na diudut Jahowa asi ni rohaNa tu angka hinongkopNa. Debata mian di bagasan holongNa.

III. Panimpuli

Dipatuduhon Debata holong ni rohaNa na mangajari nasida asa muba. Ala ni I, songon ende hamumulak I ma mandok: Sai mulak, sai mulak, ho naung lao jalang i/ Ai na dao ho nuaeng, holang sian tuam/O parjalang hol Mulak, mulak ma ho, mulak, mulak ma ho. Songon I ma nian bangsoNa i. Boasa ingkon mulak? Asa unang hot gabe sibabijalang. Molo gumodang do marpos ni roha tu portibi on, dos do I na manundali Debata. Molo umposan do tu hagogoon ni portibi dohot angka elaelana, sai mauas jala hisapan do dibahen. Tanda ma jala uji ma holong ni rohaNa. Debata na satia do Ibana mandongani dohot marmudumuduhon hita. Porsea ma hita di Ibana !