Psalmen 113: 1-9

Bahan Sermon Jamita Minggu XIV Dung Trinitatis, 18 September 2022

“DIPATIMBUL DEBATA DO ANGKA NA DANGOL”

(Psalmen 113: 1-9)

Patujolo

Psalmen Haleluya on ima parmulaan sian angka psalmen Hallel, na jotjot dipatudos tu angka pesta parningotan halak Jahudi, lumobi mai tu pesta paskah. Dibuhai jala diujungi do psalmen on dohot hata Haleluya, ala sarupa songon angka psalmen na deba, na digurithon laho pamajuhon manang patamba ulaon na denggan jala na mansai uli, ima mamuji Debata. Marhite psalmen on, diajari do halak na porsea asa mambaen prioritas utama pamujionna tu Debata di ngoluna. Jala di bindu on dipatuduhon do tu hita ima angka pokok-pokok manang habalgaon ni Debata na pinuji ni par psalmen on. Di ontang do hita asa hatop ro mamuji Debata, jala Reformator gereja pe, ima Marthin Luther, dionjaronjar ibana do angka halak na porsea asa tongtong mamuji Debata di ganup tingki. Antong boasa disosoi hita mamuji Debata, tontu ingkon botoonta do jumolo aha do pambahenan ni Debata tu hita, ala haruar do pamujion sian halak na mananda dohot manghilala pambahenan ni Debata di ngoluna.

Hatorangan

Memuji Tuhan merupakan kewajiban yang penting dan paling baik, ima na manghalashon roha ni Debata, lapatanna ingkon adong do di dirinta ngolu pamujion i, na ingkon sai jotjot do  i taulahon, udut ni angka halak na mamuji Debata, sai togihononna do donganna asa parsidohot di ulaonna i, boi mai alani na borat siulaonna, jala lumobi ma i ala na marlas ni roha ibana. Pamujion na sisongoni nungga tarida di turpukta on, on ma sada ontangan tu bangso ni Debata, didok di ayat 1 i, “Mamuji ma hamu ala angka naposo ni Debata”, naposo ni Debata na ginoaranna dison ima angka bangso ni Debata, angka ruas ni huria, ontangan on di pasahat par psalmen on ala songon sahalak naposo ni Debata ibana naung mananda Debata, naung mananda pambahenanNa, jala naung mangida jala mandai denggan basa ni Debata di ngoluna, marhite sian i do diontang ibana bangso ni Debata asa mamuji Debata. Tutu nunga ulaon ni par psalmen i mamuji Debata songon naposo ni Debata ibana, alai tung dohot do diontang ibana sude bangso i.

Sadalan do tujuan ni ayat 1 dohot ayat 2, didok di ayat 2 “Pinuji ma goar ni Jahowa olat ni on ro di salelenglelengna”, lapatanna unang ma ulaon mamuji Debata mate raphon hita, alai ingkon do torus ulahononta saleleng di portibion hita, asa angka halak na taontang i, manang angka halak na tapabotohon i, songoni ma nang pabotohononna nang ontangonna ganup halak asa mamuji Debata di ngoluna. Di hata na asing boi ma dohonon, asa ndang be sumurut (merosot) pamujion ni angka pinomparta manang angka generasi mendatang. Jala tongtong ma sude generasi mamuji Debata, ndada holan generasi nuaeng, ingkon pujionta do Debata di ngolunta songon na nidok ni par psalmen on ma dohononta “Pinuji ma goar ni Jahowa olat ni on ro di salelenglelengna”.

Ayat 3 pataridahon mamuji Debata dari segala tempat, “Sian habinsaran ni mataniari ro di hasundutan” ima di sude angka inganan ni jolma. Jala di ayat 4 didok tumimbo Ibana sian angka na di portibi on, lapatanna dao sumurung do Debata sian angka raja-raja, sian angka pamarenta dohot angka rakyat na godang. Jala dang holan timbo mangatasi sandok bangso Debata, Ibana do nang na mangatasi langit, na marlapatan do i tung pe timbo langit, alai tumimbo do nang Debata sian i, tung pe marsangap angka surusuruan, jala marsinondang nasida, alai sumangap do ianggo Debata jala dang adong na umbalga sian sinondangNa. Marhite i do didok par psalmen on nang boi dohononta, “Tung ise ma songon Jahowa, Debatanta i?” ndang adong ianggo tudosanNa, ingkon pujion do Ibana songon Debata na mangatasi saluhutna, ai mian do Ibana di inganan na timbo.

Pujion do Debata nang ala ni angka pambahenanNa di portibi on, atik pe timbo Ibana marhabangsa, alai dipaserep do diriNa manatap tu langit nang tu tano on, Allah tak hanya mencipta, tetapi Ia juga memelihara langit dan bumi ini, lapatanna di patutoru/dipaserep do diriNa laho marnida angka na tinompaNa i, tarida doi di tukpukta on, dipaserep Ibana do diriNa marhite na diparrohahon ngolu ni angka na so mararga di jolma/portibi on. Jala tarida ma pambahenan ni Debata di angka halak na gale i, didok di ayat 7 “Ibana pahehehon na metmet sian orbuk dst…laho pahundulonna raphon angka raja ni bangsona”. Ima sada dalan ni Debata laho patuduhon pamujionta tu Ibana, lapatanna dibereng Debata do angka parsorion ni bangsoNa jala dilehon do asi ni roha tu nasida (ayat 7-9), jala jotjot do dibahen Debata angka na so boi mangulahon di rohani na torop, asa lam timbul ma ulaon dohot hasangapon ni Debata.

Panimpuli

Tingting mandokhon mamuji Debata ido na disoarahon di turpukta on, songon na tinompaNa hita, diparorot jala diparrohahon Debata do hita sian habangsaNa. Asa ido sihalashononhon angka na porsea i, jala ido na so boi mago sian ngolu ni jolma na di portibi on, metmet pe itahilala dirinta nuaeng, gale jala dangol, alai di tingkina dipatimbul Debata do angka halak si songoni, Tuhan akan menegakkan orang yang hina dan meninggikan orang yang rendah. Alani pinuji ma goar ni Jahowa olat ni on ro di salelenglelengna, Haleluya.

MINGGU XIV DUNG TRINITATIS, 18 SEPTEMBER 2022

EVANGELIUM : PSALMEN 113 :1-9

DIPATIMBUL DEBATA DO ANGKA NA DANGOL

PATUJOLO

Psalmen 113 on do pamuhai sian punguan ni Psalmen na adong di tradisi Jahudi na digoari hallel (113-118).Psalmen hallel dipatubegeon do di angka pesta-pesta ni Jahudi,lumobi uju pesta Paskah ganup taon.Psalmen 113-114 dipatubegehon do andorang so manganhon sipanganon Paskah (Perjamuan Paskah),jala Psalmen 115-118 dipatubegehon di na mangujungi.Dibuhai jala diujungi do psalmen on dohot hata Haleluya.Haleluya marlapatan pujima Debata.Par psalmen patubegeon sada panidangion haporseaon di adopan ni bagso ni Debata,paboa na talup do Ibana mandapot pamujion  jala hamauliatehonon ni bangsoNa angka pambahenanNa,huasoNa na mangatasi saluhut,Ibana do na parmuduhon jala mamasumasu bangsoNa,ai gok di Ibana do tano on ro di isina.

HATORANGAN TURPUK

Mamuji Debata ima hal na ingkon taulahon jala hal na denggan do i,ima na manghalashon roha ni Debata,lapatanna ingkon adong do di dirinta ngolu pamujion i,na ingkon sai jotjot do i taulahon,jala udut ni angka halak na mamuji Debata,sai togihononna do donganna asa parsidohot di ulaonna i.Pamujion na sisongon ni nunga tarida di turpukta on,on ma sada ontangan tu bangso ni Debata,didok di ayat 1 i,”mamuji ma hamu ale angka naposo ni Jahowa”. Naposo ni Jahowa na ginoaranna dison ima angka bangso ni Debata,angka ruas ni huria.Ontangan on dipasahat par psalmen ala songon sahalak naposo ni Debata ibana naung mananda Debata dohot naung mananda pambahenanNa,jala naung mangida jala mandai denggan basa ni Debata di ngoluna,marhite sian i do diontang ibana bangso ni Debata asa mamuji Debata.

Sadalan do tujuan ni ayat 1 dohot ayat 2,didok di ayat 2 “Pinuji ma goar ni Jahowa olat ni on ro di salelelengnilelengna”,lapatanna mamuji Debata unang ma marsangga-sangga,unang marpaima jo,manang holan disada partingkian na tontu alai pungka ma saonari jala sahat ro di salelenglelengna.Ai mamuji Debata i dang holan di ende manang di tangiang manang di angka parsaoran parmingguon manang partangiangan,alai ingkon di sude nasa gulmit ni ngolu. Sian habinsaran ni mataniari ro di hasundutanna do,sipujion goar ni Debata(ay 3).Bahkan andorang so binsar pe mataniari nunga torop jolma angka na mangula siulaonna na mansai marragam i.Nunga tung marragam angka na di hata i,didalani dohot di ulahon di na sundut mata ni ari.Disaluhutna do partingkian i ingkon pujion goar ni Debata.Jala pamujion tu Debata unang mate rap dohot hita alai naeng manontong pamujion i ditonga-tonga ni angka generasi na mangihut,asa unang gabe sumurut (merosot) pamujion ni angka pinompar na mangihut,alai naeng ma tarbege jala dihangoluhon pamujion tu Debata di ganup tingki manang olat ni on ro di salelenglelengna ndang holan dipartingkian saonari.

Ayat 4 dipatubegehon par psalmen,Jahowa do Natumimbul,na mangatasi saluhutna angka bangso.Ibana do na sun hinagogo,di ginjang ni angka langit do hamuliaonNa, tung pe timbo langit alai tumimbo do nang Debata sian i,tung pe marsangap angka surusuruan,jala marsinondang nasida,alai sumangap do ianggo Debata jala ndang adong na umbalga sian sinondangNa.Marhite i do didok par psalmen on nang boi dohononta,”Tung ise ma songon Jahowa,Debatanta i?”(ay 5), ndang adong ianggo tudosanNa,ingkon pujion do Ibana songon Debata na mangatasi saluhutna,ai mian do Ibana di inganan na timbo. 

Pujion do Debata ala ni angka pambahenanNa di portibi on,atik pe timbo Ibana marhabangsa,alai dipaserep do diriNa manatap na di angka banua ginjang dohot na di tano on (ay 6).Tung mansai torop do angka na metmet,na hona gosagosa,na pogos,naso marama so marina,na mabalu,angka naso  margellok  nang angka na dipapulik manang dipabali.Diboto Debata do luhutna i jala Debata sandiri do na patupahon halongangan di nasida,gabe pembela manang na patimbohon nasida  jala pahundulonNa gabe rap hundul dohot angka raja ni bangso songon na di ayat 7-8. Di goari angka na metmet dohot angka na pogos ima alani na manaon naso uhum di ngoluna.Asa ndang alani pogosnai umbahen na dipatimbo,ai adong do na pogos i jahat muse rohana,tung alani naso uhum do na dihilala manang diampehon tu ibana dohot alani haporseaonna na marsihohot tu Debata.

PANIMPULI

1.      Molo tarajumi angka pambahenan ni Debata di ngolunta,Ibana do na mangudut hosa hangoluan di hita,dilehon nang hahipason,dilehon gogo/roha di na mangula angka siulaonta,dipasupasu gabe marhasonangan hita raphon keluargata di tong ani bagasta dohot angka na asing,na marlapatan tung so habilangan hita do angka pambahenan ni Debata di tonga-tonga ni ngolunta,da tama situtu hita mamuji goarNa nang angka pambahenanNa na godang i di ngolunta jala manghamauliateon angka denggan basaNa i.

2.      Diparorot jala diparrohahon Debata do hita sian habangsaNa.Asa ido sihalashononhon angka na porsea ,jala ido na so boi mago sian ngolu ni jolma na di portibi on,metmet pe itahilala dirinta nuaeng,gale jala dangol,alai di tingkina dipatimbul Debata do angka halak si songonni, Tuhan akan menegakkan orang yang hina dan meninggikan orang yang rendah.Alani pinuji ma goar ni Debata olat ni on ro di salelenglelengna.

ARI SENIN, TANGGAL 5 SEPTEMBER 2022

“DIPATIMBUL DEBATA DO ANGKA NA DANGOL”

(Psalmen 113: 1-9)

(BAHAN KHOTBAH MINGGU XIV DUNG TRINITATIS, TGL. 18 SEPTEMBER 2022)

 

I.           PENDAHULUAN

Buku Psalmen on i ma sada buku na marision manang punguan ni angka ende (pujipujian) na pinapungu ni raja David. Tarlumobi di bagasan Psalmen 113: 1-9 on laho patuduhon manang mangajari halak na porsea  asa mambahen prioritas utama laho mamuji goar ni Debata di bagasan ngoluna. Di bagasan bindu on pe dipatuduhon do tu hita habalgaon ni Debata jala marhite habalgaonNa i do hita laho mamuji Ibana. Antong boasa disosoi hita laho mamuji Ibana? Tontu ingkon botoonta do jumolo aha do pambahenan ni Debata tu ganup hita ala haruar do pamujion sian halak na mananda dohot manghilala pambahenan ni Debata di ngoluna.

 

II.         KETERANGAN AYAT

a.        Ayat 1-5: “Tongtong mamuji goar ni Jahowa Debata”. Di bagasan turpuk on didok parPsalmen do asa mamuji goar ni Debata alana mamuji goar ni Debata i ma sada kewajiban na ingkon diulahon halak na porsea. Di bagasan turpuk on didok parPsalmen do angka naposo ni Debata asa mamuji goarNa (ayat 1). Molo dirimangrimangi tung maol do sasintongna laho mamuji goar ni Debata alana ingkon sian ias ni roha do laho mamuji goar ni Debata jala ndang holan di tingki marlas ni roha laho mamuji goar ni Debata alai ingkon dohot do di bagasan habot ni roha laho mamuji goar ni Debata. Tarlumobi di bagasan ayat 1 didok “Mamuji ma hamu ale angka naposo ni Debata”. Naposo ni Debata na didok di bagasan turpuk on i ma bangso ni Debata naung mananda Debata tarlumobi di angka pambahenan ni Debata.  Boasa ingkon dipuji goar ni Debata? Alana timbo do Ibana marhabangsa (ayat 5). HatimboanNa do na mambahen asa dipuji goarNa jala sude pambahenanNa na mansai balga naung dibahen Debata tu portibi on dohot di bagasan parngoluan ni halak na porsea tu Ibana. Alani tarlumobi hita jolma na porsea, ingkon ro di salelenglelengna do hita laho mamuji goarNa na badia i (ayat 2).

b.        Ayat 6-9: “Dipahehe Debata do angka na metmet/na dangol”. Tung pe mansai timbu Debata marhabangsa, dipaserep Ibana do dirina tarlumobi tu angka na metmet/na dangol (orang yang hina) (ayat 6-7). Dipaserep Debata diriNa laho paheheon angka na metmet/ na dangol asa boi rap sahundulan dohot angka raja ni bangsona. Alani boi do bereng on di bagasa turpuk on, di sebalik habalgoan ni Debata, dipaserep Ibana do diriNa laho patimbuhon halak na metmet/ na dangol dohot parompuan na hol (perempuan yang mandul). Jadi walaupun Tuhan memiliki kebesaran, Dia tidak akan membiarkan orang-orang yang miskin/hina maupun perempuan yang mandul itu dipandang sebelah mata oleh orang lain, jala halak na sisongoni do na olo dipakke Debata laho patuduhon habalgaon ni huasoNa. Jadi ndang adong jolman na mamboto songon dia do cara ni Debata laho patuduhon habalgaonNa. Alani marhite turpuk on, unang leas (memandang rendah) hita mamereng halak na metmet/na dangol dohot tu angka parompuan na hol alana halak na sisongoni do na dipatimbul Debata di habangsaNa jala ndang salelengna jolma na metmet/ na dangol i tongtong mangolu di bagasan hametmetonna karena tidak ada yang tahu apa yang akan direncanakan Tuhan dalam kehidupan mereka.

 

III.                Sipahusorhusoron

1.       Mamuji goar ni Debata ndang ulaon tarsongon membalikkan telapak tangan alana ingkon sian ias ni roha laho mamuji goar ni Debata. Ingkon taingot do, mamuji goar ni Debata ndang holan di tingki las ni roha alai ingkon tongtong do taingot dohot di bagasan habot ni roha pe ingkon tapuji goar ni Debata.

2.       Unang ma gabe ginjang rohanta diangka arta na adong di ngolunta alana Debata olo do paserephon diriNa laho mamereng jala patimbohon halak na metmet manang na dangol.

3.       Unang leas rohanta mamereng halak na metmet manang na dangol alana halak na sisongoni do na dipatimbul Debata di bagasan habangsaNa. Amen.

Jeremia 33 1-9

BAHAN SERMON PARTANGIANGAN HKBP RESORT NAGASARIBU

 18 Mei  2022

Jeremia 33:1-9

“MANGHABURJUHON TANGIANG”

Huria na hinaholongan ni Tuhan Jesus Kristus! Di pardalanan ni ngolunta on, jotjot do ndada songon na hinalomohon manang na pinarsinta rohanta saut dingolunta. Las ni roha dohot arsak, keberhasilan manang kegagalan, parsahiton dohot hahipason boi do ro marsingkat sorin. Molo di tingki ro sitaonon, arsak, kegagalan dohot sahit, boi do manghorhon panghirimonta gabe madabu tu pandelean. Di sude angka situasi na masa i, ringkot do tutu adong do panghirimonta di Tuhan i.

Di bagasan turpuk on dipabotohon na tongon bangso Jehuda di bagasan haporsuhon ala muruk Debata, ala dosa dohot hajahaton naniula nasida. Uhuman na nijalo nasida marhite na talu nasida marporang maradophon Babel dohot halelengsa nang sitaonon (1,5,10,12a). Alai di situasi haporsuhon i, adong do panghirimon nang sinuriranghon panurirang Jeremia taringot tu padan ni Debata pamalum bangsoNa. Alai na gabe sungkunsungkun di bangso i, sintong do patupahon ni Debata padan na i ? Di tingki si Jeremia mungkin maol do di bangso i manghirim di masa depan na cemerlang. Alai, ndang adong na so tarpatupa Debata. Alani didok Debata tu angka na so porsea, asa ro mandapothon Ibana. Di situasi haporsuhon na tongon di panghilalahon nasida dohot tu angka tingki na naeng ro, dibagabagahon Debata di sada tingki laho patupahon hamalumon molo ro nasida mandapothon Debata. Dipaboahon do Padan ni Debata taringot tu hamalumon tu nasida : 

1. Hamalumon panghorhon ni porang na mambahen haporsuhon di nasida. Siala muruk ni Debata tu huta Jerusalem dohot pangisina. Jaloon nasida ma hahipason, parngoluan na marlobilobi di huta Jerusalem. 

2. Hamalumon alani dosa na mangihoti nasida di tingki na salpu. Dipamalum Debata gabe jumpang nasida ma las ni roha dohot olopolop. 

Hata ni Debata sadarion patuduhon tu hita holong dohot panarihon ni Debata tu bangsoNa ndang hea mansohot. Songon dia pe hajahaton dohot dosa ni bangso i gabe manghorhon muruk ni Debata, alai tongtong do dihalomohon Debata hamumulak ni bangsoNa. Huria na hinaholongan ni Kristus Jesus i, antong angka haporsuhon di ngolu on boi do masa tu hita ganup, secara pribadi manang keluarga, nang di tongatonga ni huria dohot di bangsonta. Alani, hombar tu goar ni Minggunta i ma Rogate, lapatanna ‘Martangiang’, na mangajari hita manang songon dia pe hamaolon manang hapaeton i ro di tongatonga parngoluanta, naeng ma satia jala gomos hita martangiang tu Tuhan. Asa margogo hita jala dilehon habisuhon dohot pos ni roha sian Debata, lumobi asa lam tang (dewasa) haporseaonta tu Ibana. Antong, masitangiangan ma hita, asa margogo hita mandalani parngoluan on, lumobi di situasi Covid -19 nuaeng. Asa marhamonangan hita di bagasan Tuhan i. Amen!

2 Musa 15 29-21

Bahan sermon Distrik VIII DKI Jakarta 

Evangelium Minggu 15 Mei 2022

2 Musa 15:19-21

Topik : “Marende ma hamu di Jahowa”

1. Buku 2 Musa on di goari do keluaran (Bahasa Indonesia), exodus (Bahasa Inggris), goar on naeng mangondolhon haluaon ni bangso Israel sian parhatobanon Misir. Ido tutu tingkosna, goarna do daina, jala molo tasigati pe na 40 bindu isi ni buka 2 Musa on sintuhu manang ondolanna ima taringot tu haluaon na pinatupa ni Debata marhite si Musa tu bangsona Israel sian parhatobanan Misir. Alai molo risik tasigati, sasintongna 40 bindu on bolas do disagi tu dua bagian, ima :

➢ Bindu 1-15 ima taringot tu sori ni ngolu ni Bangso Israel di parhatobanan Misir sahat tu na dipalua Debata nasida marhite panguluhonon ni naposoNa si Musa.

➢ Bindu 16 – 40 ima taringot tu sori ni ngolu ni bangso Israel saleleng diparhorsihan Sinai.

2. Bindu 15 on ima ende pujipujian ni Israel ala haluaon na pinatupa ni Debata tu BangsoNa, dihatindangkon nasida do habalgaon (keperkasaan) ni Debata paluahon nasida sian parangan ni raja Firaun. Habalgaon ni Debata patar diida na lonong tu laut i sude angka parangan ni raja Firaun na gogo i. Sude nai alani hagogoon ni tangan ni Debata boi sisi aek laut i jala mambahen taripar nasida tu bariba.

a. Dipapatar Debata do hagogoonNa dohot holongNa tu bangsoNa. Molo tapaihutihut pardalanan ni bangsoi sian Misir, uju ro angka parangan ni raja Firaun na naeng mangagohon bangsi Israel, ndang diloas Debata bangsoNai mago pangkirimonna ala diadopan nasida (logika) ndang adong dalan alai aek laut do na mangambati nasida. Jala dirajumi nasida talu ma nasida jala boanonna ma muse tu Misir marhite parangan ni raja Firaun, alani marhite si Musa dipatuduhon Debata do sada dalan na somungkin masai diroha nasida ima marhite na sisi aek laut i gabe adong tano mahiang dalan nasida taripar tu Bariba. Ndada holan mambahen taripar tahe, gariada holan sahat nasida tu bariba pintor tutup do muse aek i mangagohon sude parangan ni raja Firaun. Jadi ndada holan paluahon nasida taripar tu bariba alai biar nasida marhite parangan i diagohon Debata do marhite na tutup muse aek laut i. Ai molo taida di 2 Musa 12:37 torop ni bangso Israel na borhat sian Ramses tu Sukot 600.000 halak so padohot angka dakdanak dohot dope angka pahanpahanan, tontu ndada partingkian na hatop nasida boi taripar. Ima na patuduhon ndada na holan patariparhon Debata, alai dipatuduhon Debata do na rap Ibana mandongani bangsoNa i.

b. Panindangion ni bangsoi dipapatar marhite ende pujipujian tu Debata. Dipatuduhon si Meryam (iboto ni si Musa, na mandongani si Musa dohot Aron manguluhon bangsoi sian Misir) do rap dohot bangsoi pujipujian nasida tu Debata dipambahenan ni Debata. Pangalaho ni si Meryam na pintor mambuat odap (rebana) laho patubegehon pujipujian tu Debata mambahen angka parompuan pasidohot mangihuthon ibana laho mamuji Debata. On ma sada sikap na mansai luar biasa mamuji Tuhan i ala pambahenan ni Debata dingolu nasida. (inti sari nyanyian Miryam adalah menyampaikan sebuah pesan yang signifikan dari Allah kepada umat Israel sepanjang zaman agar orang Isarel mengingat sejarah exsodus sebagai tindakan Allah yang nyata dalam hidup mereka, sehingga mereka merdeka dari perbudakan Mesir). Marhite ende pujipujian i dipatuduhon sada pangkirimon na luar biasa dingolu ni bangso Israel naung leleng nasida diparhatoban halak Misir alai nuaeng nunga malua nasida, jala diida nasida do songon dia Debata mangalonongkon parangan ni raja Firaun ima angka hoda dohot parsihundulna diusophon tu laut i.

c. Dipardalanan ni ngolu ni hita jolma somal do pujian i marharoroan hinorhon ni panindangion ala denggan parngoluonna, alai molo jumpang dibagasan parungkilon maol do jumpang pujian gabe sada ojahan ni ngolunta. Hape pujian i boi do gabe sada kekuatan/gogo/semangat laho manaluhon hagogon ni portibion, songon bangso Israel na manaluhon huta Jeriko marhite tarompet dihaliangi nasida huta i gabe gargar ma parik i (pat. Josua 6). Songon i nang parngoluon nis i Paulus dohot Silas uju tarhurung nasida alani haporseonna tu Jesus i, momos do dibeangkon pat nasida ala ditonga borngin i uju martangiang huhut mamuji Debata si Paulus dohot si Silas tompu ma masa lalo bolon jala mungkap saluhut pintu jala tanggal nang rante nasida (Ul.Ap. 16). Pujian i boi gabe sada pangidoan/permohonan tu Debata asa dipargogoi jala diparmudumudu ngolunta di angka hamaolon. Alani ingkon ngolu na mamuji Debata do ngolunta saleleng diportion, manang aha pe na masa, ahape na taadopi dohot na taula naeng gabe tarida pamujionta tu Debata.

3. Goar ni minggunta ima Minggu Kantate (endehon hamu ma di Jahowa ende naimbaru), ende ima sada kesaksianta marhite pambahenan ni Debata dingolunta. Apalagi di hurianta HKBP didok do huria batak na marende (Eine Singende Kirche, sahalak missionaris), ndang adong parmingguonta na so marende; (mamangke buku ende, Sangap di Jahowa, Kidung jemaat, NKB, Pelengkap Kidung jemaat, koor, dna bahkan nunga adong parmingguon variatif (Band). Alana parendeon ima pujipujian na so tarsirang sian ngolunta. Pujian (marende) boi do patubuhon hagogoon laho mangadopi ragam ni ngolu, ai marhite parendeon i adong sada panindangion dohot permohonan laho mangido pangurupion tu Debata. Sahalak parjamita na tarbarita Billy Graham mandok :Sebuah nyanyian pujian lebih kuat pengaruhnya dari 100 khotbah. Boasa boi songoni? Ala pengalaman ni ibana uju patupa kebaktian rohani uju marjamita ibana dihadiri ribuan halak jala kagum mambege jamitana, alai disada inganan na jonok tu kebaktianna i adong sahalak parompuan Negro marende mansai tabo ninna, lam leleng mulai ma mempengaruhi na kebaktian i jala maninggalhon gabe tu inganan na patubegehon perende i. Alani ido Billy Graham mamboan parende i namar goar Ethel Weather gabe parendena molo marjamita ibana. Parendeon ndang tarsirang sian ngolunta songon si Meryam dohot boruboru ni halak Israel i, ai nangpe pada saat i toru do posisi ni parompuan di halak Israel alai dipamujian i tung tarida do balga ni panindangionna tu Debata. Ido didok di topik ni Minggunta “Marende ma hamu tu Jahowa / Bernyanyilah bagi Tuhan” mansai denggan do hape parngoluonta i pataridahon panindangion marhite parendeon ai dihorhon ido sada panindangion na mansai uli tu Debata, jala marhite adong di hita sada pangidoan/permohonan tu Debata di na mangadopi ragam ni angka parngoluon.

4. Menyanyikan lagu pujian kepada Tuhan adalah suatu konfessi (pengakuan) sekaligus kesaksian atas mujizat yang diperbuat Tuhan bagi hidup kita, ido na dipatuhon Debata marhite Jesus Kristus na paluahon hita sian huaso ni portibion, nunga dipalua Debata hita sian dosa dohot hamatean, sudena i alani asi ni rohaNa do tu hita jolma on. Alani naeng ma pamujionta tu Debata sian rohanta, sotung madabu tu ginjang niroha ala malo marende, manang gabe sielek elehon molo naeng marende di huria i. Alai ingkon patuduhononta do hadirionta na mian dibagasan pujian tu Debata siala pambahenanNa tu hita boi mandalani ngoluon nang pe berjuang dope hita hinorhon ni sahit sorimago covid 19, alai ingkon porsea do hita naung ditaluhon Tuhan Jesus portibion jala dilehon tu hita hamonangan na manontong i. Dipasupasu jala dipargogoi Tuhan i ma hita marpanindangion dibagasan pamujionta na polin tu Debata. Amen.

Rom 8 8-11

BAHAN SERMON JAMITA TU PESTA PARJOLO ARI HARORO NI TONDI PARBADIA

Turpuk Roma 8: 8 – 11

MANGOLU DIBAGASAN TONDI NI DEBATA

Nunga sahat hita nuaeng tu minggu Hasasaor ni Tondi Parbadia di paingot Minggu sadarion do hita asa mangolu dibagasan Tondi ni Debata ima Tondi Parbadia. Mangihuthon Apostel Paulus di turpuk on di paboa ibana do adong dua ragam pamatang ni jolma, ima: jolma na mangolu secara fisik na mangondolhon dirina tu harohaon ni daging, dohot jolma na mangounsadehon dirina tu harohaon ni Tondi. Na mangolu do hita secara fisik ima: marhosa, bergerak, marpingkir, mangula ulaonna, alai boi do i tu hamagoan arah ni ngoluna. Holan fisikna do namangolu alai ndang dohot tondina. Haroro ni Tondi Porbadia pangoluhon ngolu na i hombar tu lomo n iroha ni Debata, ima mangolu pardagingonna jala mangolu nang partondionna, ala nunga Tondi ni Debata namarmuduhonsa. 

Mangolu dibagasan pardagingon.  Paulus mandok: Ai hamatean do harohaon ni daging. Daging maralo tu Tondi, pardagingon maralo tu partondion. Hagiot manang harohaon ni daging ima hamatean, alai hangoluan dohot hamatean do anggo hagiot ni tondi. Pangalaho marguru tu daging ima hagiot na ni rajaan ni dosa, tubu-tubu dohot sangkap ni daging sai tong mian di hadirionna (Gal 5: 19 – 21a). bangko na songon i ma molo so di janghon Tondi ni Debata mangula di bagasan dirina. Hamusuon dompak Debata do harohaon ni daging; ndang olo unduk i di patik ni Debata. Marasing do ngolu ni na porsea di Jesus Kristus dohot na so porsea di Jesus Kristus, parasinganna ima, buas do Debata mangusehon Tondi na i tu angka na porsea, si lehonlehon ni Debata do i laho maniroi, mangurupi, margogoihon hita laho patupahon lomo ni roha ni Debata di portibion. Molo Halak namangolu holan di pardagingonna ndang di jalo i Tondi ni Debata manuturi ngoluna ai roha daging do na gok di ibana. Molo harohaon ni daging sai mangela jolma i tu hamatean,  jala harohaon ni tondi sai manogu jolma i tu hangoluan, pasti sai maralo do nadua i di hadirion ni jolma i.

Mangolu dibagasan Tondi. Ndung ditompa Debata Jolma sian orbuk ni  tano i andorang so diullushon Debata hosa hangoluan tu jolma i ndang adong dope arti ni jolma i, alai ndung pe di ullushon Debata hosa hangoluan i tu jolma i gabe martondi namangolu ma jolma i. Molo diusehon Jahowa Tondi Porbadia tu Adam (makhluk hidup na mar nišmat hayah/ na martondi na mangolu i), lam takkas ma hangoluan na sian Jahowa ditumpakkon tu jolma  i. Kombinasi ma hangoluan na dihorhon nišmat hayah  dohot hangoluan na dihorhon Tondi Porbadia na songgop tu diri ni Adam i. Disi ma masa hadameon di diri ni jolma, martondi namangolu jala na sinondangan ni Tondi Porbadia i.  Harohaon daging na gompang di diri ni jolma i patalu diri tu harohaon  ni Tondi Porbadia na ro tu jolma i. Alai martua jolma na patunduk harohaon ni daging na tu hagogoon ni Tondi Porbadia i. Ala hatundukonna i, tung takkas hadameon di diri ni jolma i. Mardame harohaon ni dagingna tu harohaon ni tondina ala naung di jalo Tondi Porbadia. Jadi sehat ma jolma i di partondion, di pardagingon dohot di haporseaon,  jala mangolu ma panghirimonna, huhut tulus ma holong ni rohana.

 Alai anggo hamu, ndang be di bagasan daging i, di bagasan Tondi do, molo tung tutu Tondi ni Debata maringanan di bagasan hamu. Alai molo so Tondi ni Kristus di jolma, ndang Kristus nampuna ibana Alai molo Kristus di bagasan hamu, mangolu do tondi ala ni hatigoran, nang pe mate pamatang ala ni dosa i. Ai ndang tarbahen sasahalak porsea tu TUHAN Jesus Kristus, ianggo so disonggopi jala ditogutogu Tondi Porbadia, jala dijakkon Hata ni Tuhan  Jesus Kristus, na gabe barita nauli tu saluhut hajolmaon. Ala Tondi ni Kristus  maringan jala manggomgom huria i, Kristus ma nampuna huria i.   

Marragam do tondi na adong di portibi on. Deba sian massam ni tondi i: (1) tondi na tinompa ni Jahowa jala dibahen Jahowa di bagasan diri ni jolma (Sak.12:1); (Tondi na denggan sian Jahowa (1 Sam.10:10;  16:13); (3) tondi na jahat sian Jahowa (1 Sam.16:14); (4) Tondi ni Jahowa (Jes.61:1); (5) Tondi ni Jahowa (na digoari: Tondi ni habisuhon dohot hapistaran, Tondi ni panuturion dohot hagogoon, Tondi ni parbinotoan dohot biar maradophon Jahowa); (6) Tondi ni Kristus (na tong digoari : Tondi Porbadia; Tondi Pangondian; Tondi Pangapulon); (7) tondi na hodar (tarmasuk ma tuson: beelzebul; sibolis; begu; ilah-ilah; dewa-dewi; debata sileban). Nanidokna di hata Indonesia “jiwa” (Junani: psykhe) ndang manghamham lapatan ni tondi (Ind: roh; Junani: pneumatos). Di hata Heber: jiwa manang tondi tong do didok ruaḥ, na tong adong lapatanna alogo, angin. Ndang adong hata Batak na pas tu jiwa (psykhe). Diboto halak Batak, martondi do ganup jolma, i ma tondi na adong di bagasan diri ni jolma i, na dilehon Jahowa di tikki panompaonna. I do na dipakke jolma molo manghatai tu Sitompa jolma;  jala i do parhitean ni Jahowa (Sitompa jolma) manghatai jala songgop tu jolma. Jesus Kristus manjanjihon  na usehononNa Tondi Porbadia tu akka siihuthon Ibana laho mandongani dohot mampargogoihon nasida, dung manaek Ibana tu banua ginjang (Joh. 14:15 dnm; 16:4 dnm). Namasa di ari Pentakosta di Jerusalem taon 33 hataridaan ni hagogok ni janji ni Jesus. Sian mulai i, dihaporseai pangihut ni Jesus do, na torus do ro Tondi ni Jesus manonggopi akka jolma na olo mangihuthon Ibana, tarmasuk akka tu akka Kristen na di Roma.

Di apostel Paulus, huria dohot parhalado ni Huria Roma i ma akka  jolma naung di bagasan Tondi ni Kristus, ndang be di bagasan daging, ndang be hatigoran ni adat dohot uhum ni halak Romawi manang Junani sinajolo i. Hatigoran ni Kristus i ma hatigoran na gabe ruhut ni parngoluon, na marharoroan sian Hata, poda dohot uhum ni Jahowa (TUHAN) Jesus Kristus, na marlakku di ngolu ni jolma di portibi on dohot di banua ginjang. Hatigoran ni Jahowa (TUHAN) Jesus Kristus do na manariparhon jolma (siihuthon Jesus) na mangolu di portibi on mangalewati hamatean ni pamatang na masa di hasiangan on, asa mangolu jolma na porsea i di hangoluan na marhasonangan di surgo (banua ginjang) i. Di bagasan pangantusion na songon on, ikkon kombinasi do ngolu na marguru tu panogunoguon ni Tondi Porbadia dohot panogunoguon ni Hata ni Jahowa (TUHAN) Jesus Kristus. Mate pe pamatang i, ndang be mate lao manuju portibi ni akka na mate, alai mate ni pamatang marlapatan ma i mananggalhon ngolu na di portibi on, asa soluk tu ibana ngolu na sorgawi.

Tondi ni Jahowa do manungguli Jesus Kristus sian namate, umbahen na mulak mangolu Ibana di ari patoluhon dung mate tarsilang Ibana. Tondi ni Jahowa do na songgop tu Jesus Kristus di tikki na tardidi Ibana di Batangaek Jordan. Tondi ni Jahowa do na mandongani Jesus Kristus saleleng na mangulahon ulaonNa Ibana di hasiangan on. Di na dijanjihon Jesus Kristus  leononna TondiNa, Tondi Porbadia, tu ganup naporsea jala namangihuthon Ibana, na marsakkap do Ibana, asa ganup pangihut ni Jesus pasti  donganan jala gohan ni Tondi Porbadia do, sian mulai tardidi ibana sahat tu tikki ibana mananggalhon ngolu na di tano on jala mangalakka ibana tu surgo (Paradaiso), inganan ni Jahowa (TUHAN) Jesus Kristus. Sintong do nanidok ni Apostel Paulus dison:  Alai molo maringanan di bagasan hamu Tondi ni na manungguli Jesus sian na mate, sandok pangoluon ni Ibana, naung manungguli Kristus Jesus i, ma nang pamatangmuna na mate i, hinorhon ni Tondina na mangingani hamu. Dikategorihon Apostel Paulus do pamatang na so disonggopi Tondi Porbadia tu pamatang na mate, i ma pamatang na sai marguru tu harohaon ni daging. Pamatang na mate (Junani: thneta somata; Latin: mortalia corpora; Heber:gewiyyotekem hammetot; tubuh yang fana; Jerman: sterblichen Leibe), i ma daging na marroha daging, na so marisi parrohaon ni tondi. Marhite hagogoon ni Tondi Porbadia, margogo ma tondi na marisi parrohaon ni tondi, mamarenta daging na marisi parrohaon ni daging i asa tunduk tu patik (HATA) ni Jahowa. Asa isi ni daging i akka pangalaho parrohaon ni tondi. Akka pamatang na tunduk tu tondi napinargogoan ni Tondi Porbadia, i ma na lolos sahat tu na mate di bagasan Kristus. Jala “namangolu do ganup na porsea di Ahu (TUHAN Jesus Kristus) nang pe mate ibana”, ninna TUHAN Jesus Kristus. Martua ma ganup na porsea tu TUHAN Jesus Kristus, na niondihon ni Tondi Porbadia i, asa monang maralohon dirina na marroha daging, jala boi sahat tu ujungna hot di haporseaon dohot panghirimon na sinuanhon ni TUHAN Jesus Kristus di dirina. Mate (manang diombushon pe hosana na parpudi) di portibi on, holan dalan lao tu surgo hasonangan i do ibana disi. Songon i ma dalan ni Jahowa (TUHAN) Jesus Kristus mangaluluhon (mangalehon haadilon tu)  akka naporsea i di portibi on. Selamat di hita ganup na pasti manjalo ngolu na denggan di tano on jala ngolu na sonang di surgo hasonangan i. Amen. 

Psalmen 17 1-6

BAHAN SERMON DISTRIK XXVI LABUHAN BATU

MINGGU EXAUDI, 29 MEI 2022

PSALMEN 17 : 1 – 6

TOPIK: DITANGIHON DEBATA DO JOU-JOU NI ANGKA PARTIGOR

PATUJOLO

Maol do tarjalo roha molo ditudu halak hita di naso hasalaanta. Sai jalahan do dalan patuduhon hasintongan dohot paluahon diri sian uhumi. Gariada tahe halak naung nalnal pe hasalaanna sai dilului do dalan laho pasintonghon diri. Maragam do uhum tu halak parsala. Molo taida di uhum Negara tujuan ni uhum sasintongna ndada laho mambaloshon pambahenan na jahat, alai naeng adong do parsiajaran manang panjoraan jala asa mananda di hasalaanna, asa muba tu joloan ni arion. Alani do di na mandabu uhum  ingkon marojahan do tu hatigoran dohot hasintongan, unang diuhum halak di na so hasalaanna jala unang marsombusombu di dosa dohot hasalaan apalagi mamintori parsala dihasalaanna. 

HATORANGAN

Molo taparrohahon Psalmen 17 on ima tangiang sian raja Daud na mangido haluaon sian Debata tingki masa hagogotan bolon jala tarsosak situtu.  Jala di pangarisihon ni angka pande ia Psalmen 17 on, ima tangiang ni si Daud tingki situasi na gonting di Maon (1 sam 23 : 14 – 28).  Sasintongna nungga di eak si saul dohot paranganna si Daud di adaran Maon, jala dang adong be dalan na malua si Daud sian pangaleleon ni si Saul, alai dina naeng manangkup si Daud nasida ro tompu sahalak surusuruan ni si saul manjumpangkon ibana mandok: na ro ma halak Palistin mangeak huta nasida, gabe mundur ma si Saul dohot parangannai. Songon na taboto ndang adong hasalaan ni si Daud, baliksa tahe pangurupi do ibana di diri ni si Saul. Alai alani sogo ni roha na tu si Daud, nungga putus roha ni si Saul ingkon bunuonna si Daud. Bonsir soada di baen pangiburuonna tu si Daud, ala torop mamuji ibana manaluhon si Goliat. 

Godang do na boi putihonta sian jamita on, tarlumobi mai di masa hagogotan manang tarsosak hita di bagasan ngolu on. Songon dia do sikapta jala aha do sibaehonta asa malua hita sian hagogotan:

Porsea jala pasahat diri tu Debata, Raja Daud jumolo sahali porsea tu Debata, mangalualu di hasosahan na ni adopanna. Di hagogotan i ndang dirina di pangasahon alai dipasahat ibana do tu Debata jala porsea ibana na tuk do Debata paluahon ibana. Di ayat 1 di jouhon ibana do “sai tangi ma hasintongan, ale Jahowa, tangihon ma alualungkon. Sai tarehon ma pinggolmu tu tangiangkon sian bibir naso marpangansi”.  Tung gomos do ibana mangido asa tung ditangihon, diparateatehon Debata ibana. Nang hita pe di paingot do asa di sude angka sitaononta i holan tu Jahowa ma hita martangiang, asa diusehon Tondi Porbadia mampargogoi, mangurupi, mangalehon hikmat dihita mangadopi sude na maol i, jala marpanatap ibana di parungkilon na taadopi. 

Ungkap dohot tedek ni roha, ro do ibana tu adopan ni Debata di bagasan tedek ni roha. Dang adong ditabunihon ibana nanggo apala otik aha na masa dohot na mian di bagasan rohana. Ai diboto ibana do, diida jala di boto Debata do saluhut na niulana. Ido umbahen didok di ayat 3 “nungga didodo ho rohangki, di tingkir ho bornginnai” namarlapatan mai lias do ibana sian hajahaton ai holan lomo ni rohani Debata do di parangehon. Jala hombar tu patik do diula ibana, ido umbahen ro ibana mangalualu tu Debata. Nang pe dipajojor ibana nasa na binahenna tu Jahowa ndada gabe i dipangasahon. Alai na manungkun do ibana tu Tuhani manang na mangelek asa diondihon di ari hasusaan i. Jala di haporseai si Daud do na adil do Debata, na pasti membela, mangalehon hatigoran tu angka partigor jala manguhum angka parjahat. Dang mamalos ibana. Alai Debata do na tuk mamalos.  Molo sipata pe mangasangi, arogan angka parjahati, pasti ro do uhum ni Debata tu nasida.

Mangido asi ni roha, di ayat 4 – 6 di patorang si Daud do saluhut na niula ni ibana, ima sai marjaga do ibana di langkalangka ni jolma si pangarupa, sai diihutihut ibana do angka bogas ni Debata, dang maoraor pangalahona, sai ibana do di jouhon. Sian angka pandohani ndang meret pat ni si Daud sian patik ni jahowa. Tangkas do dihaporseai ibana, na tangihonon ni Debata do halak na jou jou tu ibana. Molo tung pe di pajojor si Daud angka na niulana, dang na naeng mangasahon na binahenna ibana maradophon Debata, alai tung manambai pangalehon do di asiniroha ni Debata di hasosahan na niadopan ni si Daud. Alani i unang bobos, kalut, panic, alai haposi haposi ma jahowa. Ai Debata do na manjaga hita songon anak ni mata, dang loasonna manang huaso aha pe manjama laho mangagohon hita.            

PANIMPULI

Topik Minggu “ditangihon Debata do joujou ni partigor” tapapos ma rohanta asa hot mangolu di bagasan parsihohoton na togu jala marhaporseaon tu ibana, panindangion ni par Psalmen i do na gabe siingotonta paboa na rade do Tuhan i mangalusi pangidoanta. Molo pe diloas Debata jolmai mambahen lomo ni rohana di bagasan dosa, dang i ihuthononta, alai tapangido ma dibagasan tangiang tu ibana asa diondihon hita sian nasa pangarupaon dohot ragam ni hajahaton. Tapangido ma gogo asa margogo hita mamparbuehon na denggan, unang talu hita binaen ni na jahat. Molo tongon taadopi parungkilon sian dongan jolma alani haporseaon, tapasahat ma tu Debata asa ibana na mangurupi hita. Hot ma hita mangihuthon Tuhan i, ai dang dipasombu hita marsingkor siala gogo ni angka pangago di tanoon. Di pintori Debata do hita di saluhut di angka na masa, ai ido hatuaonta mangolu mangihuthon ibana. Sai ditangihon Jahowa ma joujou ni partigor jala dilehon ma hamonangan tu ganup hita be. Tapangido ma gogo asa hot hita mardalan di hatigoran dohot dihasintongan na sian Debata, ai ibana sandiri do na mangaramoti, mangalinggomi dohot na paluahon hita. Amen.

Ulaon Ni Apostel 1 6-11

BAHAN SERMON DISTRIK XXVI  LABUHAN BATU tanggal 26 Mei 2022

Topik : GABE SITINDANGI NI KRISTUS TU SANDOK PORTIBION

(ULAON APOSTEL 1:6-11)

PATUJOLO

Buku Ulaon ni Apostel on ima sada buku na paboahon tu hita taringot tu pardalanan ni hakaristenon na parjolo i,  jala boi do tardok buku on kelanjutan ni Evanggelium Lukas na digurithon si Lukas (sahalak dokter) laho manogunogu haporseaon ni halak kristen na parjolo i tarlumobi tu namargoar si Teofilus. Adong do 3 point penting na dibaritahon di buku on ima taringot tu strategi ni  angka Apostel dinalaho marbarita nauli, parsaoran di parpunguan, dohot kesetaraan ni halak kristen di parpunguan i. Alai molo di turpukta on diondolhon do taringot tu hananaek ni Tuhan Jesus tu banua ginjang laos tona ni Jesus tu angka sisean asa gabe sitindangiNa tu liat portibion.

HATORANGAN NI TURPUK

Ayat 6-7 “Pajongjongon mu ma saonari ale Tuhan harajaon i di Israel?

Dung hehe Tuhanta Jesus sian hamatean, pola do 40 ari dipataridahon Ibana hadirionna tu angka siseanNa laos dibohali do nasida taringot tu harajaon ni Debata. Tarlumobi molo taida andorang so turpuk on ima di ayat 4 didok “ dipatihi Jesus angka apostel i asa unang meret nasida  sian Jerusalem  so jolo di paima baga-baga ni Ama i.” Na patuduhon haheheon ni Jesus Tuhan i dang holan cerita sambing alai situtu do godang na marnida ibana  dibagasan 40 ari i marhite  angka parsaoranNa dohot sisean I,  dipamuhai ayat 6 on dipataridahon si Lukas do ternyata dang holan Sisean na pungu hatiha i, boi do taida i di hata “ Angka na pungu i”  molo didok do “angka” marlapatan lobi sian sada, laos hata “pungu” pe pataridahon kelompok manang kejamakan na adong disi alai dang pola tangkas digurithon si Lukas jumlah halakna. Laos sungkunsungkun “Pajojongon Mu ma saonari Ale Tuhan harajaon i di Israel?” on pe dang apala tangkas ise do halak na manungkun on, alai na ringkot idaonta ia sungkunsungkun on mangido klarifikasi ni Jesus taringot tu andigan do hamamasa Harajaon  Ni Debata i di Israel. Adong do perdebatan di angka penafsir taringot tu hata “harajaon” on, parjolo ima na mandok ia harajaon na ni maksudna taringot tu harajaon haportibion alai disangkal do i ala di ida alus ni Jesus di ayat 7 ndang patuduhon teguran alani pangantusion na marasing  taringot tu Harajaon ni Debata. Napaduahon ima na mandok harajaon na ni maksud disungkunsungkun i taringot tu “Parousia” manang akhir zaman ido umbahen na dialusi Jesus sungkunsungkun i marhite hata “ ndang ro di hamu i umboto taonna manang ombasna, na binuhul ni Ama i guru di huasoNa sambing.” Umsolhot do pangantusion na paduahon i asa marhite i boi ma dapot pangantusion di alus ni Jesus na di ayat 7 marlapatan “ndang bagian manang ugasan ni halak na porsea laho umboto di partingkian ni parousia i ala adong dope tugas manang ulaon na asing na ingkon si ulahonon ni nasida.”

Ayat 8-9, Gabe sintindangiKu ma hamu di Jerusalem, dohot di sandok Judea, dohot di Samaria sahat ro di ujung ni tano on.

On ma na gabe tugas utama ni halak na porsea hatiha i, gabe sintindangi taringot tu panghobasion dohot pelayanan na pinatupa ni Jesus saleleng di portibion Ibana. Molo targoar gabe “sitindangi” martudu-tudu do i tu tugas laho pabotohon, paboahon, patuduhon, panuturion taringot tu angka naung masa di Jesus, laos on ma na gabe tugas ni angka Sisean nang halak na pungu hatiha i. Adong do na menarik di penafsiran hata “Jerusalem, Judea, Samaria dohot ujung ni tano on” ima na adong pangantusion ia Jerusalem on boi ma disarupahon dohot kota di hata nuaeng, molo Judea digombarhon ma i songon luat na umbalga sian Jerusalem laos Samaria didok ma i gabe wilayah na lebih luas sian Samaria dungkon i ujung tano on na patuduhon ulaon panindangion i dimulai ma sian wilayah na metmet sahat tu liat portibion, alai dang pola dapot dope keseragaman literatur taringot tu pandohan on. Alai adong do muse penafsiran na marnida  wilayah on sian suku na adong di wilayah i  “Yahudi, Yahudi campuran, dohot non Yahudi” na mangondolhon ia panindangion i dimulai  sian huta na metmet sahat tu liat portibion (sesuai dohot penafsiran na parjolo) manang panindangion taringot tu Jesus dimulai ma sian halak Jahudi dungi tu halak Jahudi campuran laos tu halak non-Jahudi na diliat portibion. Manang na dia pe penafsiran na umsolhot tu turpuk on alai portibion manang saluhut na adong diportibion ingkon do gabe hararat ni panindangion taringot tu Jesus Tuhan i. on ma tona ni Jesus andorang so tarhinsat ibana tu banua ginjang laos on ma na gabe tugas ni halak na porsea di Ibana.

Ayat 10-11, “Na ro do Ibana sogot, songon na niidamuna Ibana laho dompak banua ginjang“

Dung dihatahon hataNa tu na pungu hatiha i, tarhinsat ma Jesus tu banua ginjang laos adong dua halak na marbaju linanglinang di lambung ni angka na pungu hatiha I, dang apala tangkas di paboa si Lukas sian dia jala songon dia  haroroni na dua halak on. on ma parasingan ni hananaek ni si Henokh dohot si Elia  maradophon Tuhanta Jesus, ia Jesus Tuhanta i dang pola marparhitean hureta api dohot hoda api songon si Elia manaek tu  banua ginjang, na patuduhon Jesus  marhamuliaon dohot marhuaso dibanua tonga on nang di banua ginjang. Hata ni halak na marbaju linang-linang i pe paingothon halak na porsea i taringot tu haroro ni Tuhanta Jesus na paduahalion asa marhite i angka halak na marnida hananaek ni Tuhan i dang holan paimaimahon sambing di haroro ni Tuhan Jesus i alai naeng ma jumolo di patupa songon tona ni Jesus i  na gabe SitindangiNa tu liat portibion

SIPAHUSOR-HUSORON

Panindangion taringot tu hamatean, haheheon dohot hananaek ni Tuhanta Jesus dang holan tugas manang tanggung jawab ni angka si siseanNa na parjolo i, alai  sahat ma tugas dohot ulaon gabe sitindangi i tu hita halak na porsea di haluaon na pinatupa Jesus tu saluhut jolma manisia i. Alani i tabaritahon ma Jesus i marhite pangalaho, panghataion, dohot angka pambahenanta na denggan i, asa tung lam martamba bilangan ni halak na porsea di goarNa.

Pangarade Bahan Sermon : Pdt. Rindu Hutasoit, STh,MM

Jakobus 5 13-18

BAHAN SERMON JAMITA TU MINGGU ROGATE, 22 MEI 2022

Ev: JAKOBUS 5: 13-18

Topik: “MANGHABURJUHON TANGIANG (BERTEKUN DALAM DOA)

Patujolo

Saleleng di tano on dope hita mangolu ingkon tabolus do na 2 hal on ima “las ni roha” dohot “habot ni roha”.  Jala molo masa na 2 hal on tain8got manang tajou do Tuhan i di bagasan tangiangta?. Turpuk Jakobus 5:13-18 on mangajarhon tu sampulu dua marga na di tano parserahan nang hita dipartingkian nuaeng taringot tu na manghaburjuhon tangiang (bertekun dalam doa). Tangiang ima ngolu ni angka na porsea. Halak na manghaburjuhon tangiang ima halak na mengakui keterbatasan dirina di adopan ni Debata. Tangiang ima ojahan ni angka na porsea laho pasahathon na di rohana ima las ni roha nang arsak ni roha pe.  

Hatorangan ni Turpuk 

Ayat 13, las ni roha dohot habot ni roha ingkon masa do i di sude angka jolma na mangolu dope di portibion. Jala marhite las ni roha dohot habot ni roha boi do i manguji haporseaonta, manahan do hita di 2 hal i? Ala ndang holan marhite habot ni roha di uji haporseaonta, marhite las ni roha pe boi do i manguji haporseaonta. Molo masa habot ni roha lam maheu manang lam gale do haporseaonta? Manang na monang do hita manaon sitaonon i ala margogo hita dibahen na tahaburjuhon na martangiang? Di Buku Ende No. 487:1 didok do “Tung halak na margogo si partangiang i. Dokdok pe sitaonon ndang olo talu i. Pos situtu rohana di Debata na i. Tuhan na manaluhon sude pangalo i.” Ise na manahan ido na manghamonanghon ujungna gabe parjambar di harajaonNa. 

Molo masa las ni roha pe boi do i manguji haporseaonta. Molo ro las ni roha i tu hita ingkon taboto ma mandok mauliate tu Debata  manang gabe madabu do hita tu ginjang ni roha. Halak na boi mandok mauliate tu Debata ima halak na manghatindanghon sude nasa las ni roha na sahat tu ibana sude i marharoroan sian Debata. Alani ingkon diboto ma mandok mauliate tu Debata. Ragam cara mandok mauliate tu Debata boi marhite na marende mamuji Debata. songon di paboa di ayat 13 on “Molo adong di tongatongamuna na manaon na porsuk, martangiang ma ibana; molo adong na marlas ni roha, marende ma ibana”.  

Ayat 14-16, na margogo situtu do tangiang ni angka partigor molo dihaburjuhon. Di ajari surat Jakobus on do na sampulu dua marga na di parserahan ima molo adong na marsahit sian nasida asa dijou ibana ma angka sintua ni huria i (molo dipartingkian nuaeng hata sintua on boi manghamham: Pendeta, Guru Huria, Bibelvrow, Diakones, Evangelis, sintua) laho manangianghon ibana. Sahit na dipaboa di turpuk on, 2 hal ma i sahit di pamatang nang sahit di roha manang pingkiran. Jala tugas ni sintua ni huria ima manangianghon ruas na pinarmahanna. Na pinasahat ni Debata tu Ibana. Molo adong na marsahit, asa ditangianghon sintua i ma sian nasa rohana tu Debata anggiat dibutbut Debata sahit sian pamatang nang rohana. Di ayat on dipaboa ma marhite na manangianghon na marsahit dung i mandampol na marsahit i dohot miak marhitehite goar ni Debata. Miak disi mangombarhon parhitean ni Debata mangalehon hamalumon nang hasesaan ni dosa  tu na marsahit i. Ndang na gabe miak i na gabe fokus ta mangalehon hamalumon i alai Debata i sandiri do na mangula mangalehon hamalumon nang hasesaan ni dosa i.  

Ayat 17-18, margogo situtu do tangiang ni angka partigor molo dihaburjuhon. Tangiang bukanlah rutinitas semata. Ala molo rutinitas do tangiang i, ndang mangula tangiang i. Isarana, adong ma sada jolma martangiang, somal do molo dipatupa partangiangan huria adong tangiang sian na ro dohot tangiang sian na manjabu i. Tadok ma na martangiang on ima sian na manjabu i, topet ma ibana na mambahen tangiang. Hape ibana boi dihitung piga hali ro tu partangiangan dohot tu gereja. Jala ala holan rutinitas do na mambahen tangiang i di rohana jala i somal dibege ibana tangiang didok ibana ma tangiangna “…………ale Tuhan torop so piga hami na ro tu partangiangan on. Molo dibagasan parsahiton pamalum ma ibana Tuhan. Molo dibagasan losok ni roha tuktuhi ma rohana Tuhan…..Amen, ninna ibana.” Hape minggu na ro dipatupa ma muse partangiangan tu bagas ni ruas ni huria na berikut na. Hape ibana na martangiang minggu na salpu i  ima na manjabui minggu na salpu, so ro tu partangiangan i. Holan sebatas ucapan hape tangiangna. Holan sebatas rutinitas hape, ndang dihangoluhon. Di Mateus 7:7 didok do “Pangido hamu ma sai na lehononna do tu hamu; lului hamu ma sai na jumpangan do hamu; tuktuhi hamu ma, sai na ungkaponna do di hamu.” Doa bukan hanya sebuah untaian kata saja, alai ingkon dihangoluhon do na tapagido i. Isarana, tapangido hahipason pamatangta ditangiangta alai ndang tajaga hahipasonta. Lam tagasak do na mangisap sigaret, ndang rutin mangan, dna. Ujungna gabe tubu ma sahit gabe ndang saurdot be dohot tangiangta i.   I do umbahen di dok Debata hataNa di Mateus 17:20 ima ditingki dipamalum Jesus sahalak dakdanak na solpoton “Jadi didok Jesus ma tu nasida: “Alani otik ni haporseaonmuna do. Ai situtu do na Hudok on tu hamu: Nanggo na sabatu ni sabi haporsaonmuna, dohononmuna ma tu dolok on: Munsat ma ho sian on tusan, saut do i munsat; gabe ndang adong na so tarpatupa hamu. Na margogo situtu do tangiang molo dihaburjuhon, ima na diulahon jala dihangoluhon si Elia. Martangiang si Elia sian nasa roha nang haporseaonna tu Tuhan i asa unang jolo ro udan, di alusi Debata do tangiang na gabe ndang ro udan tu tano i lelengna 3 taon 6 bulan lelengna. Dung i martangiang muse si Elia tu Tuhan i asa dilehon udan tu tano i dung i dialusi Debata ma tangiangna. 

Sipahusorhusoron 

Tangiang ima dalanta manghatai dohot Debata. Marganti sorin do arsak (dosa, parsahiton) nang las ni roha tu ngolu ni jolma alai angka na manahan disaluhutna i ima angka sipartangiang. Tung halak na margogo do anggo si partangiang i. Dokdok pe sitaonon dang olo talu i. Pos situtu rohana di Tuhan i. Antong tahaburjuhon ma na martangiang i, ai i do hagogoonta. Selamat mar-Rogate!! Amen.  

Pdt. Irnawaty Sinaga (HKBP Simpang Ajamu)

Ulaon Ni Apostel 9 1-6

Bahan Sermon Parhalado HKBP Ressort Panai Hilir 

Minggu Quasimodogeniti, 24 April 2022

Hamubaon di Bagasan Jesus 

Ulaon Apostel 9:1-6

I. Patujolo Ni Turpuk

Paulus ima sahalak na so porsea hian tu Jesus Kristus songon Mesias na dibagabagahon Debata di portibion. Paulus yang sebelumnya bernama Saulus ima sahalak Jahudi na terkenal pistar jala berpengaruh di Jerusalem hatihai. Hasurungan ni si Saulus sian halak Jahudi na asing ima mangolu do ibana di adat ugamo hajahudion. Hinorhon ni holong ni rohana tu ugamo Jahudi, gabe adong ma prinsip di si Paulus, manang ise na olo mangolu hombar tu adat hajahudion manang na mangalo ugamo Jahudi, ingkon do pamateon. Fanatisme tu hajahudionna mambahen ibana gabe mansogohon angka sisean ni Tuhan i. Marsigorgor do sogo ni rohana tu halak siihuthon Kristus. Pola dilele ibana angka na porsea I sahat tu huta Damaskus (Ay. 1). Alani do, gabe adong ma sangkap ni si Paulus laho mangido surat sian sintua ni malim  asa manang ise na jumpangna baoa manang boruboru na mangihuthon Kristus ingkon do bunuonna. Alai baliksa do na masa uju mardalan ibana dompak Damaskus. Jala pardalanan na I do manogu ibana gabe mananda hadirionna dohot mananda Kristus I songon Sipalua. Alani tapaihutihut ma proses hamubaon ni si Paulus manjalo Kristus I gabe Sipalua di ibana.

II. Hatorangan Ni Turpuk

1) Ndada Sangkap hajolmaon na saut (Paulus) alai sangkap ni Debata do.

Transformasi ngolu ni si Paulus patar do i dung dijalo jala dihaporseai ibana Kristus i Anak ni Debata. Andorang so ditanda ibana dope Kristus songon Anak ni Debata, marragam do cara dibaen ibana laho mangagohon hosa ni halak siihuthon Kristus. Kecintaannya kepada agama Yahudi membuat dirinya untuk menyiksa orang yang ada diluar agama Yahudi. Dipangasahon ibana do hasurunganna i laho mangambati hakristenon. Tung mansai optimis do ibana laho manangkup saluhut angka na porsea di Tuhan Jesus Kristus jala bunuonna. Pola ingkon laho ibana tu Damaskus ima inganan partabunian ni halak siihuthon Kristus hatiha i laho mamunu angka na porsea. Alai, baliksa do na masa uju dipardalanan ibana mandapothon huta Damaskus i. Sangkap laho manangkup angka na porsea i gabe dipangke Debata laho manangkup Saulus gabe sahalak parbarita Nauli. Diparsitongaan dalan dipapatar Tuhan i ma hadirionNa marhite sondang sumillam sian langit. Sian on ma haborhaton ni si Paulus mananda Kristus songon Anak ni Debata. Sian ayat 1-3 tangkas ma taida strategi Paulus laho manangkup angka na porsea dipangke Debata laho mangubahon ngolu ni si Paulus. Ndang di loas Tuhan Jesus sangkap na roa i. dang ditumpahi Tuhan Jesus ngolu fanatisme ni si Paulus I gabe disundati ma ulaon I mahite na ro Jesus I manopot jala mamanghulingi ibana marhite sada parnidaan ima sondang sumillam i. Dalam waktu yang sangat singkat, Paulus lupa dengan apa yang direncanakannya pada awalnya. Ndada be sangkapna na roa i na di rohana, alai sangkap ni Debata do (ay. 6a). 

Sian peristiwa na masa dingolu ni si Paulus mamanghulingi rohanta, molo nungga Debata na marsangkap, ndang adong na boi mangambati. Songon dia pe cara ni si sibolis i laho mangambati hararat ni Barita Nauli, molo nungga marsangkap Debata, pasauthononna do i. Nungga ditangkup Tuhan Jesus be ibana gabe naposoNa i. Alani, saluhut hita na mangolu dibagasan Jesus ima halak na ditangkup Jesus do hita gabe alealeNa. Ibana do na ro manangkup hita asa gabe siihuthon Kristus hita. Sungkun-sungkun na nuaeng rade do hita manjanghon sangkap ni Tuhan I dingolunta marhite na ditangkup hita/ diubahkan?

2) Hamubaon ni roha: Mangoloi Hata ni Debata jala Manghatindanghon Ibana

Muba si Saulus gabe si Paulus (sian pangalelei gabe silelean). Parjumpangan si Paulus dohot Tuhan I paubahon rohana laho mananda hasintongan ni Debata. Dipapatar Jesus hadirionNa tu si Paulus marhite sumillam sian langit laho padungohon haporseaon ni si Paulus do taringot tu hadirion ni Tuhan Jesus. Uju ro sumillam I manopot si Saulus, pittor tinggang ma ibana tu tano I jala dibege ibana ma suara  na manjou ibana. Di si dijou Tuhan i ibana, pintor dialusi ibana di suara I marhite hata na mandok, “Ise do Ho, Tuhan?”.  Sian sungkun-sungkun on boi do idaonta, ia si Paulus ndang na so porsea na adong Tuhan i. Alai na so masuk tu rohana ima Jesus Kristus songon Anak ni Debata na mate jala hehe sian hamatean laho manobus jolma sian dosa. Mansai tangkas do taida, bahwa adong do alus ni Tuhan i tu si Paulus laho patandahon hadirionNa ima, “Jesus do Ahu na dileleanmi”.  Diungkap Tondi i do roha ni si Paulus laho mananda Kristus I jala mangjanghon Kristus i. Pangoloion ni si Paulus tu panjouon ni Tuhan i tangkas do taida I marhite sungkun-sungkun ni si Paulus diayat 6 I, songon on, “Dia ma bahenonhu Tuhan, dipangido rohaM? Sian sungkun-sungkun on patuduhon haradeon ni roha si Paulus ditranformasi/ perbaharui oleh Tuhan Yesus. Dioloi ibana do panjouon dohot parsuruan ni Tuhan I, ido umbahen gabe marbarita nauli ma ibana tu angka na porsea dohot na so porsea dope tu Tuhan Jesus i. Hamubaon ni roha ni si Paulus tarida do I sian parngoluanna siganup ari na tongtong mangasahon Kristus I nang pe disituasi na mansai sulit jala berbahaya. Ido umbahen gabe adong panindangion ni si Paulus taringot tu Kristus I, ima na tarsurat Filipi 1:21 “Ai Kristus do hangoluan di ahu, jala laba nang hamatean”. 

III. Panimpuli 

Peristiwa Paulus berjumpa dengan Yesus mengubah totalitas hidup Paulus termasuk iman Paulus kepada Yesus sebagai Tuhan dan Juruselamat dunia. Paulus memberikan dirinya menjadi saksi Kristus setelah mengalami perjumpaan dengan Kristus. Jadi, na sa na pajumpang dohot Tuhan I, marhamubaon ni roha dohot pangalaho. Nuaeng, dibagasan jamita di Minggu on, disosoi do rohanta taringot tu hamubaon dibagasan Jesus i. Hamubaon dibagasan Jesus ima naung pajumpang dohot Tuhan I dibagasan haporseaon na sintong. Haporseaon i do na mangonjar rohanta asa mangolu hombar tu lomo ni roha ni Debata. Diigil do sian hita angka siihuthon Kristus asa olo hita mangjanghon hamubaon ni roha dibagasan Jesus i. Dijou do hita mangulahon Hata Na i. Didok di Jak. 1:22 “Gabe siula Hata I ma hamu”. Ndang holan statusta halak Kristen, alai ingkon mangolu do hita dibagasan hata ni Tuhan i. Asa saluhut ngolunta hombar ma tu lomo ni roha ni Debata. Hatandian ni halak naung marhamubaon dibagasan Tuhan, totalitas hidup kita pasti berpengaruh positif tu angka humaliangta. Amen.

Cal. Bvr. Irma Gultom

2 Musa 14 26-31

Bahan Sermon Parhalado HKBP Ressort Panai Hilir

Pesta Paskah II Senin, 18 April 20222

Debata Paluahon BangsoNa

2 Musa 14:26-31

1.  Pesta Paskah ima pesta ari parningotan Haheheon ni Tuhan Jesus. Hata “Paskah” marharoroan sian hata Heber ima “pesach” na marlapatan ma I nunga disalpuhon, nunga dibolushon manang nunga dipalua. Hata Paskah dienet sian 2 Musa 12:11, “Ai PASKAH NI Jahowa do I”. Andorang so haruar bangso Israel sian parhatobanon tano Mesir, disuru di ganup ripe maneat sada birubiru tunggal na so marlindang. Mudar ni birubiru I didaishon tu tohang ni angka bagas ni halak Israel na adong di Mesir. Mudar na didaishon tu tohang ni jabu I ma gabe partanda na  jabu ni halak Israel jabu i, gabe dibolus Jahowa jabu i asa malua halak Israel sian uhum hamagoan I (2 Mus 12:1-13). Domu tusi do hata paskah manang pesach on lapatanna: nunga dibolus, nunga disalpuhon, nunga dipalua. Marhite Paskah dipaingot halak Israel mangolu nasida,alani Paskah do. Jala on do na dihalashon bangso Israel di Paskah i, ima haluaon nasida sian parhatobanon Mesir. Paskah I paingothon, ala huaso ni Debata do boi nasida mamolus dalan hamatean di Misir sahat ro di na malua nasida. Jala dibagasan jamita on, ima sada halongangan na dipatupa Jahowa na ingkon sihalashon bangso i uju laho ruar bangso Israel sian Mesir mamolus Laut Rara. Alani tapaihutihut ma pandonganion ni Debata tu bangsoNa I laho paluahon nasida sian parhatobanon Mesir.

2. Ragam halongangan na dipatupa Debata marhite si Musa ditongatonga ni bangso Mesir asa tung loason ni Raja Parao nasida haruar sian Mesir. Alai dung ro uhum taringot tu hamamate ni buhabaju tu Raja Parao dohot Mesir, gabe diloas raja I ma ruar halak Israel sian Mesir (2 Musa 11:1). Dung diloas nasida haruar sian tano Mesir, tontu las ma roha ni bangso i ala nunga malua nasida sian tangan ni raja Parao. Alai, uju dipardalanan nasida mandapothon laut Rara, manatap ma nasida, ai nunga ro Raja Parao dohot angka naposona laho manangkup nasida mulak tu Mesir. Tubu di roha ni raja Parao laho mamboan mulak muse bangso Israel gabe hatoban ala dipanghilalahon ibana ndang be na gabe hatobanna. Ido umabhen gabe dilele nasida ma muse bangso Israel. Marnida na masa gabe tubu ma biar ni roha di nasida jala mangangguhi ma nasida  tu si Musa, ninna ma “ Na so adong be tanoman di Mesir, umbahen na ditogihon ho hami tu halongonan on, dumenngan do hami mate di Misir sian di halongonan on (2 Musa 14:11-12). Sian pandohan on, noi idaonta na adong do penyesalan ni bangso Israel mangihuthon si Musa ruar sian Mesir. Tumagonan do mate di Mesir nasida martimbanghon di halongonan. Alani do gabe dialusi si Musa ma nasida, didok ma “Unang hamu mabiar, marsihohot ma rohamuna, jala ida hamu hamuliaon ni Jaowa, sibahenonna tu hamu sadaruon, ai halak Mesir, angka na niidamuna sadari on, ndang be idaonmuna  nasida sahat ro di salelenglelengna . Jahowa do marporang humongkop hamu, asal hohom hamu (ay. 13-14)”. Nga songon na mate be panghirimon ni bangso ala nunga ro raja Parao. Ndang diboto nasida be laho paluahon dirinasida sian raja Parao, ala memang posisi nasida mardompakhon Laut Rara. Dibiar ni rohanasida I, laos disi do Debata patupahon halongangan laho paluahon bangsoNa i. disuru Ibana ma si Musa patoltol tanganna tu laut gabe mahiang laut I dibahen Jahowa asa boi dieahi bangso I tu taripar ni laut i. Dung sahat nasida manaripari laut Rara I, di suru  Debata ma muse si Musa patoltolhon tanganna asa sumuang aek laut I mangalingkupi halak Mesir, hureta dohot sude parangan ni raja Parao. Ujungna gabe mate ma sude angka halak Mesir na mangihuthon halak Israel tu laut i.

3. Mangihuthon tradidi hajahudion, adong dua impola en a mamolus aek rara I nasida, ima: parjolo, lam mananda bangso Israel dihuaso ni Debata, jala lam marposniroha nasida tu Debata (Psalmen 66:6). Paduahon, asa ditanda dohot bangso sileban paboa Debata na sintong do na paluahon bangso Israel sian Mesir. Peristiwa Laut Rara patuduhon parsihohoton ni Debata dibagabaga naung dipinasahatNa tu bangsoNa. Dipatuduhon Jahowa do huasoNa marhite na mangatur laut I manguhum na mangalo tu sangkapNa. Dung taripar nasida tu bariba ni aek I diingot bangso I hata ni Musa na mandok, “Jahowa do Marporang dompak hamu. Asal ma hohom hamu (ay. 14). Sian angka na masa I, diboto bangso I ma na tutu do nasida dipalua Debata sian parhatobanon Mesir. Tangkas do diida nasida halongangan na binahen ni Jahowa maralohon halak Mesir. Dung diida nasida na binahen ni Jahowa tu halak Mesir, gabe mabiar ma nasida mida Jahowa, jala porsea nasida di Jahowa dohot di si Musa, naposoNa i. 

4. Haluaon na dipatupa Debata ditongatonga  ni bangso I mambahen bangso I gabe porsea jala marpos ni roha tu Debata. Porsea ma nasida disangkap hatuaon ni Jahowa naung ro manopot nasida dipardangolanna. Ndang manghohom Debata mida parungkilon na masa di bangso i. Ragam cara dibaen Debata asa malua bangsoNa I jala nunga patar I dingolu ni bangso i. Nang songon na masa dipardalanan ni ngolunta. Sipata ro do parungkilon I tu hita dalan ni Debata laho patuduhon huaso ni pandonganion ni Debata. Alai, disituasi na so tinagam ni rohanta boi do gabe so porsea hita di hagogoon ni Debata. Taida sian na masa di laut rara I, na so tarantusan jolma dalan ni Debata paluahon bangso na niasianNa. Alani do, manang songon I en a masa dingolunta, sada do na ingkon tahangoluhon ima ingkon unduk do hita di Hata ni Debata. Ndang hadodoan ulaon ni Debata di angka na marholong ni roha di Ibana. TanganNa na sun timbul I do mangondihon ngolunta on.

5. Haluaon na sian Debata do mamboan bangso I malua sian parhatobanon Mesir. Jala pangantusion na songon on do na naeng idaonta di Pesta Paskah manang di Ari parningotan Haheheon Ni Tuhan Jesus sian hamatean. Umbahen didok Paskah, ala nungga ditaluhon Kristus I hamatean, nunga disalpuhon be huaso ni hamatean i. Monang Kristus I maralohon hamatean, dalan ni Debata do I laho pasauthon sangkap haluaon tu angka na manghaporseai Ibana. Haheheon ni Kristus I do pasingkophon saluhut bagabaga haluaon ni Debata dipadan na robi. Haluaon na binoan ni Kristus I do na gabe ojahan ni haporseaonta laho mangadopi angka na masa di ngolunta. Molo ro parungkilon, molo hasusaan I, molo parsahiton I, taingot ma na tuk dope gogo ni Debata laho paluahon hita sian angka na masa I asal ma porsea hita dihagogoonNa i. Tung sadia ni Debata ma angka parungkilonta I martimbangkan asi ni rohaNa na mangalehon AnakNa na sasadai humohop hita na hinaholonganNa. Ngolunta on asi ni roha ni Debata do jala holan Ibana haposanta asa taruli hita dihaluaon naung pinaradeNa i. Amen. 

Pdt. P. Manurung

Lukas 24 1-12

Bahan Sermon Parhalado HKBP Ressort Panai Hilir

Minggu Paskah I (Parningotan Ari Haheheon Ni Tuhan Jesus), 17 April 2022

Nungga Hehe Jesus i

Lukas 24:1-12

I. Patujolo Ni Turpuk 

Buku Evangelium Lukas ima buku na manggurithon pardalanan ngolu nang panghobasion ni Jesus saleleng di portibion. Jala sada sian pardalanan ni Jesus na digurithon di Evangelium Lukas on ima taringot tu hamamate dohot haheheonNa. Jala on do na gabe jamita ima taringot tu haheheon ni Kristus I sian hamateanNa. Andorang so mate dope Ibana, nungga parjolo dipaboa Ibana hian, na ingkon manaon na porsuk I do Ibana, ingkon mate do Ibana jala ingkon hehe di ari patulohon (Luk 9:22). Alai ndang diantusi angka sisean i angka hataNa i. Ido umbahen gabe adong ma biar ni roha di angka siseanNa i dung mate Jesus di hau pinarsilang i. Hamamate ni Jesus na mamboan haluaon do tu ganup halak na porsea tu Ibana dohot tu angka na naeng porsea. Alani ido di ari patoluhon I, hehe do Ibana sian angka na mate laho pasingkophon parsuruan ni Debata dibagasan hadirionNa. Alani I, tapaihuihut ma barita haheheon ni Kristus I marhite turpuk jamita di Minggu on.  

II. Hatorangan Ni Turpuk

1. Unang Mabiar, Mangolu do Tuhanta. Dung mate Jesus, gabe adong do biar ni roha di angka siseanNa i ala ndang adong be dongan nasida laho marbarita Nauli. Tarlumobi ma nang angka sisolhot ni Jesus ima si Maria Magdalena dohot donganna parompuan na paihutihut panaonon ni Jesus mamungka sian na ditangkup Ibana sahat tu na diparsilangkon Ibana. Dung ditanom bangke ni Jesus i lam lungun ma panghilalaan nasida tarlumobi angka siseanNa i. Alai, ianggo angka parompuan I laho do tu tanoman I laho mangida bangke ni Jesus songon na somal diulahon halak Jahudi na laho tu tanoman molo nungga adong tolu ari ditanom. Jala dihobasi nasida do angka na hushus laho mamiahi Jesus. Alai dung bongot nasida tu tanoman i, diida nasida ma nunga ungkap tanoman I jala nungga digulang batu na bolon i sian baba ni pintu tanoman i. Jala dirippu nasida, adong jolma na mambuat bangke ni Jesus i. Mansai jut ma rohanasida huhut mabiar nasida. Alai, di na jut I roha nasida, disi do ro suru-suruan ni Tuhan i, mandapothon nasida maribat na marlinanglinang. Gabe mabiar situtu ma nasida jala tahutan. Di na tahutan i nasida ro ma surusuruan i mandok tu nasida: “Boasa luluanmuna na mangolu di inganan ni angka na mate? Ndang dison Ibana: Nunga dipahehe Ibana”. Lapatanna ni pandohan  ima laho paboahon tu nasida, nungga mulak mangolu Jesus i songon na didok na i. Ndang diloas Tuhan I nasida lalap dihatahuton dohot biar ni roha nasida, ido umbahen  ro sururuan ni Debata laho patoguhon rohanasida asa porsea di haheheon ni Jesus i. Sian Barita on boi idaonta, dang hamatean gabe inganan na parpudi di Jesus. Suang songon I ma nang angka na porsea di Tuhan Jesus i, ndada ngolu na laho salpu on inganan parpudi.  Molo porsea do hita di Tuhan i, surgo i ma na ingkon ingananta ima hangoluan na saleleng ni lelengna. Murujung do angka na bernit i nang hamatean i marhite haheheon ni Kristus i. Suang songon do nang ngolu di halak na porsea di Kristus i, ingkon mamolus haporsuhon do jala ikkon manaon na bernit do saleleng mangolu. Alai taingot ma ndada haporsuhon i dohot hasusaan i jambarta na mangoluon. Ndada Sitaonon i na gabe ujung ni haporseaonta. Ala nungga Kristus i, na parjolo ma ngae saluhut na i jala nungga monang Ibana manaluhon haporsuhon dohot hamatean i, hita ingkon dipamonang do hita manaluhon saluhutna I molo porsea hita tu Ibana. Unang ganggu rohanta molo tung godang sitaonon i, mangolu do Tuhanta.

2. Haheheon Ni Jesus ima Barita Nauli. Haheheon ni Jesus ima sada halongangan na so tarhatahon hinasongkalna. Ndang adong haheheon songon haheheon ni Kristus sian na robi sahat di ari sogot. Haheheon ni Jesus sian na mate, ndada haheheon na somal songon halonganan na pinatupa ni Jesus na pahehe halak sian na mate. Andul marasing do haheheon ni Jesus sian na mate, sian haheheon na mate na hea masa di portibion. Haheheon ni Jesus sian na mate ima haheheon sian hamatean alani dosa ni sandok portibion jala haheheonNa I do na manghorhon hangoluan sisaleleng ni lelengna di angka na porsea. Jala on do Barita Nauli i, na ingkon pasahaton ni angka parompuan na parjolo tu angka sisean ni Jesus. Ido umbahen diayat 9 dipaboa do na pintor mulak do nasida dungkon mambege barita sian  surusuruan i. Dipasahat Debata tugas na mansai balga tu angka parompuan I, ai gabe parbarita nauli nasida, mamaritahon haheheon i tu angka siseanNa. Sian peristiwa haheheon ni Jesus on, boi do idaonta, sian na jolo nunga dipangke be parompuan I gabe parbarita nauli. Alai, ndang apala diakui i ditongatongan adat hajahudion. Ido umbahen gabe dirippu angka sisean i do holan turiturian barita na binoan ni angka parompuan i. Ndang porsea nasida dibarita i. Alai ianggo si Petrus, dung dibege Ibana barita haheheon I, hehe do Ibana laho tu tanoman I pamanathon barita ni parompuan i. Alani do gabe muli ma ibana huhut longan marnida angka na masa I jala diingot Ibana ma sude na didok ni Jesus andorang so mate Ibana. Patar ma sude diparningotan ni si Petrus taringot tu haheheon naung pinaboa ni Jesus I tu nasida. 

III. Panimpuli 

Haheheon ni Kristus ima hahomion ni Debata laho patuduhon holong ni rohaNa tu angka na hinophopNa. Alani, barita haheheon ni Jesus ndang tarpatorang i marhite pingkiranta sambing. Molo so porsea hita tu Kristus i ndang tatanda haheheonNa I jala molo so mangolu hita dibagasan HataNa i ndang boi masuk tu rohanta taringot tu haheheonNa. Songon angka siseanNa  na so porsea tu Hata Ni Jesus i, ido umbahen gabe adong keraguan di nasida taringot tu haheheon i. Alai, dung diida nasida Jesus disi pe dihaporseai nasida ma naung hehe Kristus. Alani, haheheon ni Jesus na tapestahon sadarion unang ma tabaen i holan seremonial sambing manang holan gabe turiturion na ingkon taingot alai ndang tahaporseai. Alai, marhite haheheonNa na tapestahon ganup taon naeng ma nian i dalan laho patorashon haporseaonta tu Kristus songon Sipalua di hita. Nang pe dperistiwa naung salpu I, alai na mansai ringkot taingot, mate pe Ibana jala hehe pe Ibana ndada holan tu ngolu ni halak na parjolo I alai dohot nang tu hita nuaeng na porsea di Ibana. Alani, haheheon Kristus pahehehon haporseaonta ma i laho parnindangion taringot Tu Kristus i. Halak Kristen na mangolu ima halak na olo marpanindangion, marhite hata nang angka parange. Panindangion na sintong I mangonjar rohanta laho patupahon angka na denggan di panggulmiton ni ngolunta jala sian tandaon ni portibion ma , na mangolu do Kristus jala na sai didongani Jesus do angka na porsea I di saluhut partingkian ni ngoluna. Amen. 

Cal. Bvr. Irma Gultom