Psalmen 17 1-6

BAHAN SERMON DISTRIK XXVI LABUHAN BATU

MINGGU EXAUDI, 29 MEI 2022

PSALMEN 17 : 1 – 6

TOPIK: DITANGIHON DEBATA DO JOU-JOU NI ANGKA PARTIGOR

PATUJOLO

Maol do tarjalo roha molo ditudu halak hita di naso hasalaanta. Sai jalahan do dalan patuduhon hasintongan dohot paluahon diri sian uhumi. Gariada tahe halak naung nalnal pe hasalaanna sai dilului do dalan laho pasintonghon diri. Maragam do uhum tu halak parsala. Molo taida di uhum Negara tujuan ni uhum sasintongna ndada laho mambaloshon pambahenan na jahat, alai naeng adong do parsiajaran manang panjoraan jala asa mananda di hasalaanna, asa muba tu joloan ni arion. Alani do di na mandabu uhum  ingkon marojahan do tu hatigoran dohot hasintongan, unang diuhum halak di na so hasalaanna jala unang marsombusombu di dosa dohot hasalaan apalagi mamintori parsala dihasalaanna. 

HATORANGAN

Molo taparrohahon Psalmen 17 on ima tangiang sian raja Daud na mangido haluaon sian Debata tingki masa hagogotan bolon jala tarsosak situtu.  Jala di pangarisihon ni angka pande ia Psalmen 17 on, ima tangiang ni si Daud tingki situasi na gonting di Maon (1 sam 23 : 14 – 28).  Sasintongna nungga di eak si saul dohot paranganna si Daud di adaran Maon, jala dang adong be dalan na malua si Daud sian pangaleleon ni si Saul, alai dina naeng manangkup si Daud nasida ro tompu sahalak surusuruan ni si saul manjumpangkon ibana mandok: na ro ma halak Palistin mangeak huta nasida, gabe mundur ma si Saul dohot parangannai. Songon na taboto ndang adong hasalaan ni si Daud, baliksa tahe pangurupi do ibana di diri ni si Saul. Alai alani sogo ni roha na tu si Daud, nungga putus roha ni si Saul ingkon bunuonna si Daud. Bonsir soada di baen pangiburuonna tu si Daud, ala torop mamuji ibana manaluhon si Goliat. 

Godang do na boi putihonta sian jamita on, tarlumobi mai di masa hagogotan manang tarsosak hita di bagasan ngolu on. Songon dia do sikapta jala aha do sibaehonta asa malua hita sian hagogotan:

Porsea jala pasahat diri tu Debata, Raja Daud jumolo sahali porsea tu Debata, mangalualu di hasosahan na ni adopanna. Di hagogotan i ndang dirina di pangasahon alai dipasahat ibana do tu Debata jala porsea ibana na tuk do Debata paluahon ibana. Di ayat 1 di jouhon ibana do “sai tangi ma hasintongan, ale Jahowa, tangihon ma alualungkon. Sai tarehon ma pinggolmu tu tangiangkon sian bibir naso marpangansi”.  Tung gomos do ibana mangido asa tung ditangihon, diparateatehon Debata ibana. Nang hita pe di paingot do asa di sude angka sitaononta i holan tu Jahowa ma hita martangiang, asa diusehon Tondi Porbadia mampargogoi, mangurupi, mangalehon hikmat dihita mangadopi sude na maol i, jala marpanatap ibana di parungkilon na taadopi. 

Ungkap dohot tedek ni roha, ro do ibana tu adopan ni Debata di bagasan tedek ni roha. Dang adong ditabunihon ibana nanggo apala otik aha na masa dohot na mian di bagasan rohana. Ai diboto ibana do, diida jala di boto Debata do saluhut na niulana. Ido umbahen didok di ayat 3 “nungga didodo ho rohangki, di tingkir ho bornginnai” namarlapatan mai lias do ibana sian hajahaton ai holan lomo ni rohani Debata do di parangehon. Jala hombar tu patik do diula ibana, ido umbahen ro ibana mangalualu tu Debata. Nang pe dipajojor ibana nasa na binahenna tu Jahowa ndada gabe i dipangasahon. Alai na manungkun do ibana tu Tuhani manang na mangelek asa diondihon di ari hasusaan i. Jala di haporseai si Daud do na adil do Debata, na pasti membela, mangalehon hatigoran tu angka partigor jala manguhum angka parjahat. Dang mamalos ibana. Alai Debata do na tuk mamalos.  Molo sipata pe mangasangi, arogan angka parjahati, pasti ro do uhum ni Debata tu nasida.

Mangido asi ni roha, di ayat 4 – 6 di patorang si Daud do saluhut na niula ni ibana, ima sai marjaga do ibana di langkalangka ni jolma si pangarupa, sai diihutihut ibana do angka bogas ni Debata, dang maoraor pangalahona, sai ibana do di jouhon. Sian angka pandohani ndang meret pat ni si Daud sian patik ni jahowa. Tangkas do dihaporseai ibana, na tangihonon ni Debata do halak na jou jou tu ibana. Molo tung pe di pajojor si Daud angka na niulana, dang na naeng mangasahon na binahenna ibana maradophon Debata, alai tung manambai pangalehon do di asiniroha ni Debata di hasosahan na niadopan ni si Daud. Alani i unang bobos, kalut, panic, alai haposi haposi ma jahowa. Ai Debata do na manjaga hita songon anak ni mata, dang loasonna manang huaso aha pe manjama laho mangagohon hita.            

PANIMPULI

Topik Minggu “ditangihon Debata do joujou ni partigor” tapapos ma rohanta asa hot mangolu di bagasan parsihohoton na togu jala marhaporseaon tu ibana, panindangion ni par Psalmen i do na gabe siingotonta paboa na rade do Tuhan i mangalusi pangidoanta. Molo pe diloas Debata jolmai mambahen lomo ni rohana di bagasan dosa, dang i ihuthononta, alai tapangido ma dibagasan tangiang tu ibana asa diondihon hita sian nasa pangarupaon dohot ragam ni hajahaton. Tapangido ma gogo asa margogo hita mamparbuehon na denggan, unang talu hita binaen ni na jahat. Molo tongon taadopi parungkilon sian dongan jolma alani haporseaon, tapasahat ma tu Debata asa ibana na mangurupi hita. Hot ma hita mangihuthon Tuhan i, ai dang dipasombu hita marsingkor siala gogo ni angka pangago di tanoon. Di pintori Debata do hita di saluhut di angka na masa, ai ido hatuaonta mangolu mangihuthon ibana. Sai ditangihon Jahowa ma joujou ni partigor jala dilehon ma hamonangan tu ganup hita be. Tapangido ma gogo asa hot hita mardalan di hatigoran dohot dihasintongan na sian Debata, ai ibana sandiri do na mangaramoti, mangalinggomi dohot na paluahon hita. Amen.