Jesaya 55 10-13

BAHAN SERMON JAMITA TU MINGGU ESTOMIHI 27 FEBRUARI 2022

JESAYA 55: 10-13 “Ndang Mulak Boti Hata Ni Debata”

PATUJOLO

Jesaya na marlapatan Jahowa do na paluahon. Marhite goar ni si Jesaya on patar ma tarida taringot huaso dohot hamuliaon ni Jahowa jala angka ulaon na pinatupa ni Jahowa tu bangso na niasianna. Turpuk jamita on ima buku Jesaya na masuk tu horong Deutro Yesaya (buku Jesaya na paduahon, bindu 40 - 55) ima na marisihon taringot bagabaga haluaon na pinatupa ni Jahowa tu bangso Israel (Juda) marhite naposoNa. Uju i bangso Israel talu dibahen bangso Babel, jala torop do halak Israel na tarbuang tu Babel. Habuangan na masa tu bangso Israel sada sangkap haluaon na pinatupa Jahowa. Habungan na masa tu bangso na pinarhamaol ni Jahowa on ima uhuman hinorhon ni dosa ni bangso i. Nang pe di status habuangan bangso i, alai ndang na gabe sude halak Israel hansit manang bernit panghilalaanna hinorhon ni i. Ndang na sude halak Israel gabe songon hatoban di habuangan, nang pe ndang boi diparsoadahon na adong halak Israel na hansit jala bernit panghilalaanna hinorhon na masa di ngoluna, isarana haraparon na songgop di bangso i. Sitoanonon na mansai dokdok dihilala bangso Israel ima hamagoan hadirion gabe sada bangso (kehilangan ideologi dan eksistensi sebagai suatu bangsa). Nunga tarulang tembok Jerusalem dohot bagas Joro ni Jahowa, inganan na badia, jala parmianan ni Jahowa di bangso i pe nunga marongso jala sega.

HATORANGAN

Ido umbahen di tonahon Debata tu bangso i, asa tongtong mian di nasida Barita na Uli songon bangso ni Debata nasida ingkon mian di bagasan panghirimon dohot pos ni roha. Tutu do diuhum Debata nasida marhite na tartaban tu huta Babel. Alai ndang uhuman na salelenglelengna i tu nasida alai patoguhon haporseaon nasida do i. Molo naeng paluaonNa ma nasida sian habuangan tung ala ni gogo ni Debata do dohot hasasaut ni bagabagaNa. On do hata ni Debata na pinasahat ni Panurirang Jesaya tu bangso na tongon di habuangan i, asa porsea nasida di hata ni Debata dohot di bagabagaNa nasailaon. Asa molo pe tartaban nasida alai ingkon mulak do muse nasida tu bonapasogitna. Tutu situtu do hata ni Debata nahinatahon ni panurirang i. Ala ndang piga lelengnari paruaronna do nasida sian tano Babel mulak tu Jerusalem. Suruonna do si Koresh raja ni Persia laho paruarhon nasida sian halak Babel dung ditaluhon halak Parsia bangso Babel ditaon 538 andorang so Kristus (Ezra 1:1-11). Antong dia ma hata ni Debata di turpuk jamita on?

Ayat 10: Dipatudos do hata ni Jahowa na haruar sian pamangan ni Jahowa tu udan dohot ambolas na madabu sian langit tu tano, jala mambornoki tano hadabuanna, jala ala nabornok i tano i, gabe boi ma martubuan di tano i angka suansuanan na marparbue na hasea di jolma dohot di suansuanan i. Tutu, sada tudosan na tarbatas do i. Lobi sian udan dohot ambolas i dope hagogoon, pangontak, panghorhon ni hata ni Jahowa Debata tu angka nanihonaanna. Alai asa mura tangkupon ni halak Juda na tarbuang i dohot jolma sinuaeng, dipillit ma tudosan na sederhana on. Jojal manang gabe gurun, tano bakkalbakkal do tano molo so hea tonu dibahen aek. Udan ma nahumatop manonui tano na bolak. Molo tung adong pe angka boni (bibit) ni suansuanan di tano i, ianggo so adong do aek mamornoki, ndang marlata (tubu) boni i. Taboto do tangkas na songon i nang sian barita panompaon i: “Tagan so adong dope di tano on nasa duhutduhut, jala tagan so martumbur dope nasa bulungbulung di ladang, ai ndang dope diparo Debata udan tu tano on, jala ndang adong dope jolma na mangula tano i. Alai martimpul ma uap sian tano on, gabe dibornohi sandok sisik ni tano on” (1Musa 2:5-6). Tingki i di tano Juda dang adong irigasi, tung holan udan do diarop roha ni jolma na boi mambornoki tano, jala laos udut tusi na manontuhon hadengganon ni ngolu ni jolma. 

Ayat 11: Molo ro hata ni Debata, ndang mulak boti hata ni Tuhan i tu Tuhan, so jolo dibahen lomo ni roha ni Jahowa, jala manjadi tu jolma (tu natinompa ni Jahowa) na gabe hahonaan ni hata i. Molo songon i do, siluluan on do: Aha do hata ni Jahowa Debata? Si Jeremia pasahat hata ni Jahowa na mandok tarbuang Juda 70 taon lelengna, na mandok asa bangunon ni bangso Juda kota di dia nasida maringan; adong na paboahon na mulak do bangso Israel tu tano Juda. Hira sude do isi ni buku Jesaya napaduahon on marisihon hata surirang taringot tu haluaon ni Israel/Juda dohot “pemulihan” ni Israel/Juda/Jerusalem. Sude hata ni Jahowa on pasti jala nunga tarbukti di sejarah ni Israel/Juda. 

Ayat 12-13: Ndang lomo roha ni Jahowa, bangsoNa sai torus didondoni arsak, hagaoron, jala sai holan na mangandungi. Ndang lomo roha ni Jahowa, bangso Israel/Juda torus tarbuang. Ingkon borhat bangso na i di bagasan las ni roha maninggalhon habuangan i, maninggalhon arsak, dohot pardangolan i. Halak na di bagasan las ni roha i ma halak naung dapotan panghirimon na denggan jala bersemangat laho mangeahi aha nahinirim ni rohana i. Sihirimon ni bangso Juda tingki i ima : boi mulak tu Jerusalem, boi mambangun bagas joro ni Jahowa muse; boi mambangun parik ni Jerusalem muse, boi mangatur pamarentaon na muse; boi pangoluhon parugamoon nasida muse; bahkan boi mambangun hajolmaon nasida muse. 

SIPAHUSORHUSORON

Tahangoluhon ma hata ni Jahowa, jala tabahen ma dirinta be gabe inganan HATA ni Jahowa. Di ganup partingkian naeng marsaringar ma hata ni Debata tu hita. Ido nidok ni Martin Luther hata ni Debata gabe (sola scripture) di ngolunta. Ido umbahen didok back to the Bible-mulak tu hata mi Debata. Jala Apostel Paulus mandok hata ni Debata hasea mamodai dohot maminsang hita (2 Tim 3 16-17). Aha do nanaeng peoponta sian hata ni Debata? Ima holong ni roha ni Debata na so hea maninggalhon hita na manghaporseai Ibana. Manang didia pe hita ingkon marhite hata ni Debata. Tutu godang do hamaolon na masa di ngolunta, alai ingkon boi do hita mian di bagasan hata ni Debata. Ndang sude boi jolma sanggup mangadopi hamaolon. Alai ndada gabe mambahen na so hinalomohon ni Debata. Sandok ingkon tiur pingkiranta jala mian di bagasan hata ni Debata. Hata ni Debata gabe sulusulu di ganup sidalananta siganup ari songon nidok ni parpsalmen i hataMi do sulusulu ni pathu jala hatiuron di dalanku (Psalmen 119:105).

Panghirimon na mangolu na ingkon tangkas jumpang di hita manisia. Tadalani ma ngolunta si ganup ari mardonganhon haporseaon tu Debata. Di bagasan pos ni roha do hita laho mangadopi nasa parngoluon on. Unang hita mandele jala unang hita mabiar ala Debata do mandongani hita. Ido nidokna di ayat 12: Ai ingkon di bagasan las ni roha hamu borhat, jala di bagasan hadameon hamu pataruon. Amen.

ACARA MINGGU:

BE. 14: 1+3

Votum. A.VI.6-D.V.18

BE. 743: 1

Patik. I-IV

BE. 178: 2-3

Manopoti Dosa. B.11-C.11

BE. 392: 1-2

Epistel. Mateus 13: 18-23

BE. 238: 1+7

Manghatindanghon Haporseaon

BE. 28: 1+4

Jamita. Jesaya 55: 10-13

BE. 471: 1—

Pangujungi