Jesaya 43 16-21

Minggu Judika, 3 April 20122

KRISTUS DO PANDANG SITUJUON

Epistel: Jesaya 43: 16 -21

Pdt Saorlina Sinaga, S.Th

HKBP Ressort Immanuel Tomman

Patujalo

Tardok tarbagi tolu do buku panurirang Jesaya on, na patuduhon panghobasion ni panurirangi di 3 partingkian, i ma: Proto Jesaya sian bindu 1-39: Panghobasion andorang tarbuang bangso i, Deutro Jesaya sian bindu 40-55: Panghobasion uju di habuangan, Trito Jesaya sian Bindu 56-66: Panghobasion dung mulak sian habuangan. Bagian ni Deutero Jesaya do turpuk on, ima hatiha dipatunduk Babel harajaon Juda diabad paonomhon. Diboan/diangkut do nasida tu Babel, atik pe laos adong do na tinggal di Jerusalem.

Torop sian bangso i na marungkil manghilalahon hinadangol ni na tarbuang i, mandate panghilalaan nasida secara fisik dohot mental ala songon bangso na tarpillit nasida hape dipapatu tu toru ni huaso ni harajaon Babel. Dietong nasida ma nunga pidom be nasida ala ni hataluan i, ai molo naung talu Israel/Juda maradophon bangso Babel, marlapatan mai talu do ianggo Debata ni Israel maradophon debata ni Babel. Mangangguhi be ma halak Israel hinorhon ni na hansit naung niae ni bangso i, ndang adong be panghirimon molo marnida na masa i (ida di Psalmen 137). Di dia do Jahowa, Debata ni halak Israel i? Na tutu do Jahowa talu maradophon Marduk i ma debata ni Babel?

Dipartingkian na songoni ma, panurirang, Jesaya paandarhon tu nasida, paboa ndang marujung boti ngolu ni hangso ni Debata, alai tongtong do Debata mangarorot dohot mangaramoti nasida, mambahen marsingkat arsak dohot iluilu i gabe las ni roha dohot olopolop. Ai tuk do Debata paluahon nasida sian saluhut parungkilonna i.

Hatorangan ni turpuk

Turpuk on ima sada barita taringot tu angka pambahenan ni Jahowa di na laho paluahon bangso Israel sian sitaonon i dohot paulihon ngolu nasida. Di ayat 15 "Ahu do Jahowa, na badiamuna i, sitompa Israel, Rajamuna i, ima sada pernyataan tegas taringot tu hagogon ni Jahowa na so boi ditalubon Marduk, debata ni Babel i. Jahowa do pargogo na so hatudosan jala guru di Ibana do saluhut angka na adong. Ibana naung paluahon Israel sian Misir, marhite hagogoonNa pataruhon Israel tu Kanaan. Tung so tarpatudos do tu angka debata na asing. Jahowa do Raja, na manggomgomi jala mangondihon bangso i jala Ama na manongtong di bangso i Gok hasatiaonNa dohot angka tanda halongangan do jadijadian ni tanganNa. Marmulia jala marsangap ma Ibana saleleng ni lelengna.

Ayat 16-17 disunggulhon do tu nasida angka pambahenan ni Jahowa tu ompunasida uju ruar sian parhatobanon Misir. Jahowa Ibana naung "mangalehon dalan di laut, jala dalan balobung di bagasan angka aek na doras" (ayat 16b). Ibana naung "paruarhon hureta dohot hoda, parangan dohot parhohas. Rap marpeahan nasida, ndang tarbahen be hehe, pidom do nasida, songon sumbu naung mintop." (ayat 17). Gombaran na patuduhon hagogoon ni Debata na patar jala mangatasi "kekuatan alam dohot kekuatan militer", mardalan do bangso i mamolus laut rara (2 Musa 14:16-31) jala disiaphon angka parangan ni Misir na mangalele nasida. Bangso Misir na gogo jala tangguh di parporangan, hape mintop do gogo i jala ndang marlapatan maradophon gogo ni Jahowa Debata ni Israel. Malua do bangso Israel i mamolus rura hamatean taruli tu haluaon dohot hangoluan uju i. Sude angka na masa di angka ompu ni bangso Israel uju haruar sian Misir i ma angka pambahenan ni Jahowa sandiri.

Alai hal na menarik i ma, dipasunggulhon panurirang Jesaya do tu bangso I asa diingot jala dipeop nasida pambahenan ni Debata di angka na masa na jolo, alai di ayat 18 didok muse tu bangso i "Unang be paingatingot hamu angka na masa na jolo, jala unang be pingkiri hamu angka na robi". Marhite angka na masa naung binolus jumpang do angka parsiajaran na arga, jala maringot naung salpu boi do mambahen hita lam marsitutu alai boi do muse mambahen hita tarlalap ala ni kenangan i “suka ataupun duka”. Didok angka na pistar: pengalaman adalah guru yang terbaik. Tutu do na didok na bisuk i, marhite angka na masa di ari na salpu boi ma idaonta di dia do na humurang jala na ingkon dipauli asa tu partingkian sisaonari dohot di tingki na naeng ro. Na niigil ni turpuk i ima unang laos mauhom tarlalap di angka naung salpu i. Ingkon eahan do angka na uli na boi pahinsat ngolu ni partondion.

Ay, 19-20: "Ida ma: Bahenonku ma na imbaru, nunga pola martumbur nuaeng; tung so tandaonmuna ma i?” Di naung gotap panghirimon nasida jala magopu, disurirangkon si Jesaya tu bangso i sada apulapul paboa ingkon binsar do panghirimon dohot las ni roha bahenon ni Debata tu nasida, alai naeng ma jongjong nasida dungo managam panobusion na pinatupa ni Debata naung jonok partingkianna marhite angka tandatanda sipajongjongonNa.

"Haimbaruon" sipamasaon ni Debata dipatorang do i songon gombaran ni angka naung masa di angka ari naung salpu, alai tangkas didok pamasaonNa ma i di angka ari na naeng ro. I ma adong dalan di halongonan, adong aek di halongonan dohot angka batang aek di tano bangkalbangkal (19b-20.) Ndang hapalang las ni roha, gok haimbaruon gok hadengganon na masa disi. Tung so jadi adong na hurangan. Songon panogonoguon ni Jahowa di angka ompu nasida uju ruar sian parhatobanon Misir songon i do bahenon ni Jahowa muse tu Israel di na ruar sian sitaonon nasida ima habuangan Babel i.

Sian Mesir tu Kanaan, ingkon do mamolus halongonan (padang gurun) jala mamolus tano bangkalbangkal. Alai didongani jala  disarihon jahowa do ompu nasida mamolus hasusaan i, songon i ma nang Israel donganan ni Jahowa do nasida mamolus habuangan i gabe idaon ni saluhut ma pambahenan ni Jahowa na manarihon bangsoNa jala parsidohot ma marolopolop angka binatang di ladanig, gompul, pidong unto nang sipelebegu marlas roha ala taruli asida di aek pasombu uas na di halongonan i. Tung so tandaonmuna mai?" ninna panurirang i laho manait roha ni bangso i asa hobas nasida mulak mangalului Jahowa mamaritahon hamuliaonNa (ay 21) jala mian di bagasan panghirimon na mangolu paboa tuk do Debata paluahon nasida sian parsorion i.

Sipahusorhusoron

Tarsongon ngolu ni Israel i do ngolu na taadopi nuaeng, di masa ni sorimago on i ma Pandemi Covid-19 on, torop na marsak, mandele ala sega sude tatanan hidup naung somal i, ingkon muba nang gaya hidup naung dihasomalhon i tu pola na imbaru. Torop nang na tumatangis ala ni angka hamatean, sahit dohot ekonomi na hancur ala ni pandemi on.

JUDIKA na marlapatan Luluhon ahu ale Debatangku, di Minggu Judika on dijouhon ma hita asa maporus tu Debata di sude parsorion i, Ibana do haporusanta, Ibana tuk palua hita, sian angka na manosak ngolunta. Unang lalap hita di angka arsak i, alai maporus ma tu Pandang situjuonta ima Kristus i na rade mamorsan dosanta dohot paluahon hita sian saluhutná i. Amen.

Mateus 21 1-9

Minggu Palmarum, 10 April 2022

Epistel: Mateus 21: 1-9 

Pdt Dr. Hulman Sinaga

PINASUPASU MA NA RO DI BAGASAN GOAR NI TUHAN I

Huria ni Tuhanta na hinaholongan! Pasingkophon turpuk Evangelium naung tajaha di jolo, sahat ma tu hita barita na sinurat ni si Mateus on, i ma taringot tu Jesus bongot tu Jerusalem Andorang so sahat nasida, Jesus rap dohot siscanNa tu Jerusalem, adong do pangaradeon di sosor Betpage, mardonokhon dolok Jetun. Sian pangaradeon i taboto ma na tung mansai arga situtu do haroro ni Jesus tu Jerusalem. Ndang holan na ro boti Ibana tusi, songon na mamereng aha na masa, dia diulahon angka malim na marhobas di bagas joro i, dohot songon dia jolma na torop ro marsomba tu joro i. Jesus bongot tu Jerusalem ndada na laho marpesta. HaroroNa laho paujungkon parsuruon ni Ama i na ingkon masa songon na sinuriranghon ni angka panurirang di padan na robi. Jesus ro tu Jerusalem, tu bagas joro i ndada na laho marpesta manang marari raya alai laho pasauthon sangkap hatuaon ni Debata. Songon dia do pangaradeon ni Jesus laho bongot tu Jerusalem, aha dihunduli Ibana manopot Jerusalem?

Huria ni Tuhanta na hinaholongan! Turpuk jamita Epistel on paboahon tu hita na disuru Jesus do dua halak siscanNa laho manopot sosor di jolo ni luat Betpage laho mangalap sada halode na tambat disi asa diharhari jala ditogu tu jolo ni Jesus. Lapatanna, ndang sian mulana Jesus manghunduli halode songon na tangkas dibaritahon angka buku Evangelium. Holan laho bongot tu Jerusalem do lbana manghunduli halode i. Angkup ni, ndada holan disuru nasida mambahen songon na nidok ni Jesus i, ai nunga ditagam hian adong halak na manungkun, boasa harharan nasida halode i. Alani i do, nunga dipaboa Jesus dia na gabe alus nasida, "na ringkot do i di Tuhan i" Ra, nampuna halode i do na manungkun manang manangkasi taringot tusi. Sian ruhutruhut parnampunaon toho do sungkunsungkun na songon i. Ihut tusi, naeng taida sian parsuruon ni Jesus, songon dia Ibana mangarade haroroNa bongot tu Jerusalem. Nang pe ndang halode na binoannasida na naeng hundulanNa i, alai ala didok na ringkot di Tuhan i, ndang adong na mangambati manang manjua. Asa tung tangkas do tarida pangaradeon na marsitutu. Mangihuthon barita ni si Mateus on, masa pe luhutna asa jumpang do na hinatahon ni panurirang na mandok, "Paboa hamu ma tu boru Sion: Ida ma, na to ma Rajami manopot ho, na lambok do rohaNa; halode do hundulanNa dohot anak ni halode boban." Na marlapatan do barita ni si Mateus on, ia na pinatupa ni Jesus ndada na ro sian diriNa sandiri alai nunga sian na robi disuriranghon taringot tu ulaon panghobasionNa. Alai, boasa ma ingkon hundulanNa halode? Nda Raja do Jesus?

Sungkunsungkun on adong do tingkosna. Somalna sahalak raja ndang manghunduli halode, nang di partingkian nuaeng pe. Sahalak na sangap, na mora manang panggomgomi, molo ro manopot sada luat ndang manghunduli halode. Gariada tahe, halode jotjot digombarhon tu haotoon. Lobi sian i dope, di partingkian nuaeng, somalna molo ro sada raja tu sada luat, nunga adong manjoloani raja i pinomat piga ari laho manangkasi songon dia na masa di inganan i. Ingkon denggan do pangaradeon laho mandalani sada luat asa unang masa na so tinagam. Laho mandapothon sada inganan pe sai adong do na ro manomu. Taida do songon dia manomu sahalak na sangap di portibi on Isarana, molo to presiden ni bangso na asing tu Indonesia, sai ditomu do harorona marhite na maniop bendera negara ni presiden i. Diendehon do ende negarana. Andorang so sahat dope presiden i nunga ro patujolona laho manangkasi pangaradcon huhut laho paposhon roha ni na naeng ro i Ndang asal adong disi dipangke laho mamongoti sada inganan.

Aha lapatan ni halode i? Adong do hatorangan politis taringot tu halode i na mandok, Jesus manghunduli halode patuduhon ndang marhite hagogoon dohot huaso ni portibi on Ibana gabe Raja. Jesus na manghunduli halode i patuduhon na mansai jonok Ibana dohot jolma, dibagasan haserepon Ibana ro manopot natorop. Nuacng somal tabege "pemimpin yang merakyat" Toho do hatorangan i? Mangihuthon na masa di padan na robi, mulai sian partingkian ni raja Salomo, somal do raja ni halak Israel manghunduli halode, nang tu Mesias, Raja ni hadameon i songon na sinuriranghon ni panurirang Sakaria. Molo i do na tapangke gabe ojahan, ingkon tulahonta do hatorangan politis i, al ndada pangantusion politis na songon i Jesus manghunduli halode. Di na manghunduli halode i Jesus nunga dipabotohon tu natorop i, Ibana do Raja na mambaritahon hadameon tu sandok portibi on. HarajaonNa ndada holan di sada inganan manang luat alai sahat ro di ujung ni tano on. Di sandok portibi on do harajaon ni Jesus. Asa andul marasing do harajaon ni Jesus sian harajaon ni raja di portibi on.

Hamu dongan sahaporseaon! Nang di adopan ni angka sisean i. Jesus ndada holan guru. Sian pangoloion ni dua halak siscan i, tarida do hadirion ni Jesus songon sahalak Raja. Dia na nidok ni Jesus saut do sude. Borhat do dua halak sisean laho mangoloi parsuruan ni Jesus, mangalap sada halode na tambat asa diboan tu Jesus. Diboan nasida do halode i rap dohot anakna, laos diampchon ma ulosnasida tu ginjangna dung i dipahundul ma Jesus to atasna i. Pangaradcon laho mamongoti Jerusalem na pinatupa ni sisean i pe tangkas do sada tanda na Raja do Jesus. Songon i nang panjangkonon ni jolma natorop i; dipahembang ulosnasida tu dalan i, jala na deba nari manalliki angka ranting ni hau jadi dipaserakkon tu dalan i Panomuon ni natorop i patuduhon na ro mamolus sian adopan nasida sahalak Raja. Marsoara do natorop i mandok, "Hosianna di Anak ni raja Daud! Pinasupasu ma na ro marhitehite Goar ni Tuhan i! Hosianna ma di ginjang!" Pujian dibagasan suraksurak do soara ni natorop i na patubegehon ia Jesus na ro i Anak ni Raja Daud. Raja do Ibana na ro 1. Ra tubu do sungkunsungkun tubagasan roha, boasa songon i natorop i mandok "Hosianna?" Mamungka ulaon panghobasian Jesus, nunga tarbarita di luat Judea sian Galile sahat tu Jerusalem. Dipamalum do na marsahit, dipabali tondi nahodar, dipatupa angka halongangan. Ro dope torop jolma mandapothon laho mangido asinirohaNa asa marhahipason. Nang angka guru ni Jahudi, siboto surat dobot angka na ro sian horong Parise dohot Saduse pe ro do mandapothon Ibana Asa sian angka naung masa i do diboto situan natorop i hadirion ni Jesus. Alai dia do sibonsirina umbahen torop manomu haroro ni Jesus uju bongot tu Jerusalem? Nunga nania lelengna jolma paimahon Jesus nangkok tu Jerusalem. Nunga tung leleng nasida paimahon haroro ni Mesias na naeng paluahon bangso i sian panggomgomion ni Rom. Asa uju bongot tu Jerusalem, hira na jumpangan naung leleng dipaima do nasida luhutna. Taingot, di Jerusalem do angka raja manggomgomi uju di padan na robi, sian Raja Daud sahat tu na tarbuang bangso Juda. tu tano Babel. Alani i do ndang bolan na mangihutihut nasida mandok: "Hosianna" i. Olopolop ni sude jolma na mardalan ni jolo dobot di pudi ni Jesus do hata i. Songon na jumpangan na jinalahan dobot dapotan na niluluan.

Hamu dongan sahaporseaon di bagasan goar ni Tuhanta Jesus Kristus! Dia ma nuaeng na ringkot parangehononta sian jamita on?

Parjolo, tasungkun ma dirinta: molo dipangido Jesus artanta jala molo didok, na ringkot do i di Tuhan i, aha ma alusta? Las do rohanta labo mangalchon manang borat? So tung lupa hita, ndang adong arta di hita na mura tadapot, godangan do i sian gogo jala hir hodok asa dapot. Alani, na boi do ra hansit rohanta manang gabe lungun panghilalaanta laho manghaholongi arta i. Alai taingot ma, ingkon adong do na mago sian dirinta asa dapotan hangoluan na so ra suda hita.

Paduahon, songon dia do tangiangta nasailaon? Dia do gumodang na tapangido tu Tuhan i, hangoluan nuaeng do manang hangoluan sogot? Songon naung tabege di turpuk jamita Evangelium (Psalm 118-25) na mandok, "lale Jahowa sai manumpak ma Ho, lale Jahowa sai Ho ma mambahen manjadi", marlapatan rumingkot do haluaon ni ngolu sian nasa paruntungan di tano on.

Patoluhon, tomu jala jangkon ma haroro ni Jesus, Raja Hadameon i, ai i do pasupasu na umbalga di ngolunta. So tung taida na lea Jesus molo manghunduli halode. Somal do raja di luat Palestina manghunduli halode di tingki so adong parmusuon, di tingki hademahon sian partingkian ni Padan na Robi. Haroro ni Jesus manopot ngolunta i do na umarga ndada aha na dihunduli Jesus i. Ala ni i, tajalo ma haroroNa na mamboan hadameon i.

Paopathon, songon dia do hita manomu haroro ni Jesus di ngolunta? Di bagasan las ni roha do manang ndang? Molo marolopolop tondinta, boasa? Na tarpaima do hita di pasupasu na silechononNa dope manang ala naung tadai do pasupasu i di ngolunta nasailaon?

Palimahon, unang maila hita pabotohon hadameon na binoan ni Jesus i. Marhite haroroNa tu Jerusalem saut do luhut na sinangkapan ni Ama i di angka na porsea HarajaonNa pe andul marasing do sian angka raja ni portibi on, songon i parngoluon, hamamate dobot haheheonNa.

Huria ni Tubanta na hinaholongan! Sada ma tangiangta rap n porsea di sandok portibi on songon uju dibongoti Jesus Jerusalem jala tadok ma, "pinasupasu ma na ro di bagasan goar ni Tuhani". Amen!

Pilippi 3 4b-14

BAHAN SERMON TU MINGGU JUDIKA 03 APRIL 2022

EV. PILIPI 3 : 4B – 14 EP. JESAYA 43 : 16 - 21

“KRISTUS DO PANDANG SITUJUON” 

PATUJOLO

Huria Pilipi dipajongjong si Paulus dohot dongan saulaonna (Silas, Timotius, Lukas). Marhite surat Pilipion tangkas do boi idaonta parsaoran na denggan ditongatongani Apostel Paulus dohot huria Pilipi. Nang pe dibagasan hurungan Apostel Paulus tongtong diurupi halak Pilipi ibana marhite na manongos si Epafroditus laho melayani ibana (Pil. 2 :25). Dungi diutus si Paulus ma muse si Epafroditus laho pabotohon barita na denggan taringot tu ibana tu huria Pilipi. Marhite surat na on, apostel Paulus pasahathon pesan spiritual tu Huria Pilipi asa unang tartait nasida tu angka ajaran-ajaran na menyesatkan nasida. Godang angka parbarita gapgap na memutarbalikkan barita taringot tu Jesus na manegai barita nauli naung pinasahat ni nasida saleleng on, adong parsalisian ni si Euodia dohot si Sinthike taringot tu ise na paling ringkot (Fil. 2 : 2 - 4), jala tongon diadopi huria Filipi do pengaruh ni halak Jahudi na menganggap dirina dumenggan sian halak Kristen na asing.  Di alo Apostel Paulus do angka guru ni halak Jahudi na manorui dohot manulak hajongjongan ni parpunuan halak Kristen lumobi na so sian Jahudi. Marhite na pabotohon angka hasurungan ni nasida. Siala ni I do turpuk on tangkas patuduhon dia do hasintongan dibagasan Jesus Kristus. 

HATORANGAN NI TURPUK

Ayat 4 – 6. Adong do halak na menganggap dirina dumenggan jala nabonar martimbanghon halak na asing ala ni status naung adong dinasida mulai hatutubuna isarana songon “halak Jahudi”. Paulus pe parnampuna do disi, alai dang dihaginjanghon ibana I, jala dang dipangashon i. Tangkas do dipatorang apostel Paulus hadirionna dohot hakna songon halak Jahudi andorang so mananda Jesus Kristus ibana.  Tarsunat do ibana di ari paualuhon, sian bangso Israel marga Benyamin, tubu ni halak Heber, halak parise na mangihuthon patik ni Debata do ibana, jala silele hak Kristen hian do ibana na borhat sian so hasurahan di hatigoran na sian patik. Alai dung mananda Jesus Kristus hatiha pardalananna di Damaskus (Ul. 9 : 16), gabe muba ma ibana. 

Ayat 7 – 8. Saluhut identitas na dipatorang apostel Paulus di ayat 4 – 6 ndang marlapatan dung mananda Jesus Kristus Ibana. Habalgaon, identitas naung adong di ibana hian (secara hajolmaon membuat bangga) na dianggap ibana naung paruntungan hian, gabe harugian do I. Semua yang ada di dunia, hal-hal yang dimilikinya sejak lahir, adalah kerugian kecuali Kristus. Saluhutna do dietong apostel Paulus harugian tumimbanghon hamuliaon ni panandaonna di Kristus Jesus. Siala ni ido umbahen na diseanghon apostel Paulus saluhut identitas hajolmaon na adong di ibana asa gabe di ibana paruntungan dibagasan Jesus Kristus. 

Ayat 9 – 11. Dung ditanda jala dibagasan Jesus Kristus Apostel Paulus, ragam do pangantusion na nidapot ni apostel I dongoluna. Haluaon na nidapotna ndada be marhatigoran sian patik, tung sian na marojahan dihaporseaon tu Jesus Kristus do. Halak partigor diadopan ni Debata, ndanda ala ni hatigoran mangulahon patik, alai marojahan dihaporseaonna tu Jesus Kristus do. Gabe mananda do Apostel Paulus di haluaon na pinatupa ni Debata marhitehite haporsuhon na tianon ni anakNa Jesus Kristus. Alani haporsuhon natinaon ni Jesus Kristus, apostel Paulus dohot ganup na porsea gabe parnampuna dihaluaon napinarade ni Jesus Kristus. Siala ni ido apostel Paulus mangihuthon pardalanan ni Jesus Kristus nang pe dibagasan haporsuhon, ala diida ibana do haheheon dohot dohot hamonangan dung salpu haporsuhon i. Marhite I Apostel Paulus naeng mandok tu halak Filipi, molo marungkil pe maniop hatigoran I, manontong ma nasida dibagasan haporseaonna tu Jesus Kristus. 

Ayat 12 – 14. Jesus Kritus do namanangkup Apostel Paulus mananda hatigoran I, ndada ala ni parbinotoanna sambing. Ndanda tarpatupa apostel I nang hita mangulahon hasintongan ni patik secara singkop asa gabe dipillit hita. Alai Jesus Kristus sandiri do na mamillit Apostel Paulus gabe parnampuna dihatigoran i. Panjouon ni Debata tu Apostel Paulus dibagasan Jesus Kristus, mambahen ibana mandok diayat 14 “ Huhalupahon na dipudingku, hueahi angka na dijolo, ….dst”. Namarlapatan ma I Kristus do situjuon ni ngolu ni Apostel i. Hamonangan na sian panjouon ni Debata sian ginjang, dibagasan Kritus Jesus I do na gabe tujuan ni ngolu ni angka na porsea.  

APLIKASI

Aha do na rumingkot di ngolunta nuaeng?. Molo ro sungkunsungkunon godang do na mangalusi “keluarga, dongan, arta, kebahagiaan, kesehatan, karir, parsingkolaan, jabatan, hamoraon, hasangapon dohot lan na asing. Marragam boi alusta taringot tu aha  na rumingkot di ngolunta nuaeng. Saluhut alusta na diginjang I, boi do gabe pangambat I di hubunganta dohot Debata, alai boi doi tong gabe mambahen hita lam jonok tu Debata. Ditogu turpuk on do hita laho manontuhon dia do na rumingkot di ngolunta. Unang ma ala mangeahi narumingkot di haportibion, gabe tartait hita tu dosa jala ndang mananda hatigoran ni Debata dibagasan Jesus Kristus. Ingkon lehononta do partingkianta laho mangolu dibagasan panadaion na tingkos di haluaon nasian Jesus Kristus. Asa unang hita lalap holan di partingkian na mangalului na rumingkot dihaportibion, gabe tartading haporseaonta tu Jesus Kristus.

Molo mangolu hita dibagasan “ Jesus do pandang situjuon”, dibagasan ngolunta ndang muramura be hita mandele, marungutungut, tersinggung molo ndang jumpang hita na tajalahi. Ala taboto Debata do parnampuna di ngolunta, Debata do na manontuhon pardalanan ni ngolunta. Saluhut panggulmiton ni ngolu mambahen hita lam jonok tu Debata. Parungkilon na niadopan pe ingkon mambahen hita lam jonok Debata, jala lam mananda asi ni roha ni Debata. 

Kesuksesan ni ngolu niganup na porsea ndada holan marhite singkop ngolu portibion, tercapai na ringkot dingoluna, alai kesuksesan nu ngolu ima hubunganta dohot Jesus Kristus dibagasan haporseaonta. 

ACARA MINGGU

BE. NO. 23 : 1 + 3

BE. NO. 299 : 1

BE. NO. 172 : 1 – 2

BE. NO. 183 : 1 

BE. NO. 281 : 1 + 4

BE. NO. 404 : 1

BE. NO. 518 : 1 – 

VOTUM : A. VI/B.5 – D. V/20

PATIK : I & LAPATANNA

M. DOSA : B.5 – C. 16

EPISTEL : JESAYA 43 : 16 – 21

JAMITA : PILIPPI 3 : 4B – 14 

2 Korint 6 1-10

BAHAN SERMON  JAMITA MINGGU III DUNG TRINITATIS, 

20 JUNI 2021

TOPIK: PANGHOBASION NA GOK HOLONG

 (PELAYANAN YANG PENUH KASIH)

EV: 2 KORINT 6: 1-10

PATUJOLO

Tarbarita do kota Korint sada kota na mansai strategis, pusat perdagangan dohot industri. Ala ni i, marpanghorhon do situasi i tu hamajuon  ni ekonomi ruas ni huria na adong di Korint. Boi ma dohonon ruas na ekonomi menengah ke atas ma gumodangan disi. Diida apostel Paulus do potensi na adong di huria Korint i, alai laos godang do angka hamaolon na niadopan ni angka apostel termasuk apostel Paulus uju marbarita na uli tu huta Korint. Mansai maol jala dokdok situtu do panghobasion i nang ditingki mangadopi angka panurirang pargapgap. Alai dipatuduhon apostel Paulus do songon naposo ni Debata ibana, tongtong mamaritahon hasintongan hombar tu hata ni Debata. Jala angka naposo ni Debata ingkon tongtong satia mangulahon parbarita nauli. Laos dijouhon ibana ma paboa saluhut ruas/halak Kristen parsidohot do di ulaon panghobasion di tongatonga ni huria i, marhitehite holong ni roha nasida. 

HATORANGAN

Turpuk on ima songon sada panindangion paboa ingkon gabe tiruan do parange ni angka apostel i ima songon naposo ni Debata laho mangulahon ulaon parsuruon ni Debata. Diapoi apostel Paulus do angka donganna saulaon di ulaon pamaritaon barita nauli (missi pemberitaan Injil) asa tongtong marningot di sude asi ni roha ni Debata naung jinalo nasida. Ai holan ala asi ni roha ni Debata do umbahen na tau nasida marbarita nauli dohot mangadopi ragam ni hamaolon uju marbarita nauli sahat tu na terancam hosa nasida. Alai dang gabe sumurut semangat nasida laho marbarita nauli uju i. Ai masitangiangan do nasida huhut goar ni Debata di pangasahon nasida di na mangula ulaon tohonan nasida i. On ma parsiajaran na arga jumpangta sian turpuk on. Angka dia ma i?

Tajalo do tingki parasian dohot tingki haluaon sian Tuhanta i.

Tingki ima sada kesempatan naummarga na pinasahat ni Debata tu hita nasa jolma na mangolu. Tingki naung salpu ndang boi be haulahan. Sandok na mardalan do tingki ganup ari di portibi on. Dihatindanghon si Paulus do di bagasan turpuk on, nunga dipasahat Debata tingki di hita ima tingki parasian dohot tingki haluaon. Na marlapatan, tingki parasian ima tingki di hasiangan on, adong dope kesempatan di na patupahon na dumenggan saleleng mangolu dope hita di hasiangan on. Tingki haluaon ima tingki na pinasahat ni Debata laho paluahon hita angka na porsea di Ibana. Jumpa masa hasusuda ni portibi on, nasa na porsea jala na mangulahon hata ni Debata dapotan haluaon, alai na so porsea jala naso mangulahon hataNa i tu paruhuman  saleleng ni lelengna. Alani, ndada tu hamagoan jambar ni angka namamangke tingki parasian di bagasan lomo ni roha ni Debata, alai tu hangoluan marhitehite na manjangkon haluaon na pinatupa ni Tuhan i. 

Ingkon gabe tiruan do naposo ni Debata, unang hasurahan. 

Patar do ia ngolunta on di adopan ni Debata, ndang adong agia aha pe na boi tatabunihon sian adopan ni Debatanta i. Nang di adopan ni angka dongan humaliang, ingkon gabe tiruan do ngolu ni angka naposo ni Debata. Diida jala dinilai donganta humaliang do hita sian ujung ni simanjojakta on sahat tu ujung ni simanjujungta on. Na so jadi gabe hasurahan ngolu ni angka naposo ni Debata, ima parbarita nauli i. Ingkon ngolu sitiruon ma ngolu nang pangalahona songon na nidok ni Jesus: Ai sitiruon do hulehon tu hamu, asa dibahen hamu songon naung hubahen i tu hamu (Joh. 13: 15). Antong dia ma pangalaho na ingkon jumpang jala dipatuduhon di ngolu ni angka naposo ni Debata? Ayat 4-7 didok do: ingkon di bagasan habengeton godang, haporsuhon, hasusaan, hagogotan, du. 

Didok do: Husuru do hamu songon birubiru tu tongatonga ni angka babiat.. (Mat. 10: 16). Na marlapatan mansai godang do angka tantangan na ingkon adopan ni angka parbarita nauli songon naposo ni Debata. Taingot ma gari Jesus sandiri uju di ngoluna mangadopi ragam ni parsorion, insahinsak, reherehe dohot na asing dope sahat tu na mate Ibana di hau pinarsilang. Jala didok Jesus do tu angka siseanNa i: Nasa na giot mangihuthon Ahu, disoadahon ma dirina, diporsan ma silang na tu ibana, diihuthon ma Ahu! (Mat. 16: 24). Ingkon rade do hita mamorsan na dokdok i ima haporsuhon, hasusaan dohot hagogotan. Alai na marpos ni roha ma hita paboa Debata do na margogoihon hita mangadopi saluhutna i. Ngolu ni angka naposo ni Debata ingkon na tongtong do mangihuthon panjouon dohot soara ni Tondi Parbadia, asa mangula Tondi i di bagasan ngoluna. Sahalak naposo ni Debata ingkon mangolu di bagasan hatomanon, parbinotoan, lambas ni roha, habasaron, di bagasan Tondi Parbadia dohot di bagasan holong na so marpangansi, tarlumobi di ngolu panghobasionna. Ai ndang malua ngolu panghobasionna i sian ngolu siapari. 

Na so jadi hasurahan ngolu ni angka naposo ni Debata, ingkon unduk jala satia do ibana di tohonanna i. Ingkon parhata na sintong do naposo ni Debata mangasahon gogo na sian Tuhan ido ibana manghatahon i. Atik pe ragam hamaolon di adopi uju manghobasi di tongatonga ni huria i, na so jadi mandele manang mansohot sian ulaon tohonanna. Alai ingkon taingot ma sian Tuhan ido tajalo tohonan i, jala ingkon taula marhitehite panogunoguon ni Debata.

PANIMPULI

Topik Minggu “Panghobasion na gok holong”, na tarjou do Huria i, ima Parhalado dohot sude ruas ni huria asa sipardohot mangulahon ulaon panghobasion di tongatonga ni huria ni Tuhanta i. Manghobasi ndada ingkon gabe Sintua manang partohonan na asing. Ai adong do Parhalado Partohonan dohot Parhalado na so partohonan na parsidohot do nasida pauliulihon nasa panghobasion di tongatonga huria i marhitehite ulaon nang talenta na adong di ganup nasida be. Tarjou ma hita manghobasi huria i, donganta humaliang dohot portibion di bagasan holong ni roha ni Debata.

Denggan basa dohot asi ni roha ni Debata do na mangurupi hita ro di ujung ni ngolunta. Ido umbahen na margogo hita laho mangula ulaonta diparngoluonta nuaeng on. Tung pe godang angka parungkilon , hasusaan dohot sitaonon na mansai ragam i. Ringkot ingotonta paboa na di ahu nuaeng, sian asi ni roha ni Debata do umbahen na dapot, jala dang magopo asi ni roha ni Debata na tu ahu i. Amen.

Acara Minggu

BE. 125: 1+3

Votum: A.XV/A.2-D.XIII/38

BE. 26: 2

Patik IV & Lapatanna

BE. 688: 1+3

M. Dosa: B.8-C.8

BE. 212: 1+4

Epistel: Job 38: 1-11

BE. 140: 1+4

M. Haporseaon

BE. 716: 1-2

Evangelium: 2 Korint 6: 1-10

BE. 728: 1—

1 Timoteus 2 1-7

BAHAN SERMON JAMITA TU MINGGU TGL 08 NOV 2020

1 TIMOTEUS 2: 1-7 “Parsidohoton Ni Halak Kristen Di Politik”

Patujolo

Ditongos apostel Paulus do surat on tu siseanna si Timoteus na ditugashon ibana mangula di huta Epesus. Godang do persitiwa masa lalu na golap di pardalanan ni ngolu ni angka na porsea tu Tuhan Jesus. Nang nuaeng tarlumobi ma dohot di negaranta. Alai marhite jamita on, dang tarbahen masa lalu ni jolma na golap i mangambati sangkap haluaon ni Debata Jahowa, baliksa, sian masa lalu ni jolma na golap i, lam tangkas ma hatiuron ni Barita Nauli i di patupa Debata. Ulaon na borat do manghatindanghon barita na uli, manghobasi huria, marmahani biru-biru ni Debata. Alani i do umbahen sai diparbohali si Paulus siseanna on asa tau jala margogo mangula ulaon i. Tajaha di bindu sada i, angka  ruhut sirodihonon, sipodahonon ni si Timoteus tu angka ruas ni huria i  ima, asa tongtong nasida mabiar mida Debata, hot marhaporseaon, tutu ma dipaholang dirina sian angka tabiat/bangko haholomon i, ndang be berkiblat tu pudi tu na jolo i, alai  mamandang tu jolo nama tu hatiuron i  ima  Kristus i.

Hatorangan

Tung mansai diondolhon si Paulus do di suratna on asa tung diharingkothon tumanginghon saluhut manisia. Sada ondolan ni barita nauli di padan na imbaru ima mangondolhon paboa haluaon i rade tu saluhut halak. Barita nauli manghamham sude lapisan ni hajolmaon; parhuaso manang rakyat na somal, pamarenta manang angka parkarejo, dohot angka na lea sude do gabe hasahatan ni barita nauli. Ala dang adong perbedaan kelas di adopan ni Tuhan Jesus siboan haluaon i. Didok si Paulus do: “Songon parmahan di tonga-tonga ni angka huria tontu dang holan marjamita, mangajari, mamodai, manogunogu na rumingkot siulahononna/siradotanna.” Baliksa tahe didok ibana, ia siulahononhon na parjolo situtu ima: partangiangon, parpangondianon dohot hamauliateon (menaikkan permohonan, doa syafaat dan ucapan syukur). Angka ise ma sihophoponna di partangiangon i ? Ima saluhut halak (angka bangso parbegu na so umbege barita na uli, angka na so porsea dope, asa ungkap roha nasida manjangkon barita na uli i muse). Dungi angka raja dohot saluhut parhuaso. Boasa tangianghononhon i? Ai angka parhuaso do na gabe dongan ni huria. Asa tigor uhum nasida, denggan mamangke sahala na jinalona sian Debata (Rom 13), asa marhasonangan jala so hariborioan masyarakat i di bagasan hadaulaton dohot hahormaton (hidup saleh dan berkehormatan, ayat 1-3).

Ianggo di roha ni Debata naeng asa malua (selamat) do saluhut jolma na tinompaNa i sian huaso haholomon, sian roha hageduhon. Ai ala ni dosa  do umbahen dao jolma sian hasintongan i. Songon na nidokna di Hes. 18:23 i: Na so dihalomohon Debata hamatean ni parjahat i, alai muba ma nian rohana sian dalanna nasai laon asa mangolu ibana. Domu tu tujuan na mulia i do umbahen di suru Debata “Pangulu” (Pengantara), ima Jesus Kristus. Hapanguluonna dang sebatas padomuhon jolma i tu Debata dalam arti berkompromi dohot Debata. Hapanguluon ni Jesus berperan sebagai korban tebusan, sumeahon diriNa/hosaNa gabe pelean na mangolu asa adong pardomuan ni jolma tu Debata dohot haluaon  sian huaso ni dosa (ayat 4-6).

Tugas utama ni si Paulus umbahen na dipabangkit Tuhan Jesus ibana gabe Apostel, ima laho manjamitai, mangajari dohot mangarahon angka halak sipelebegu na di haholomon i, asa olo manjangkon barita na uli, jala gabe halak Kristen na burju, na  porsea di Jesus Kristus jala mangolu di bagasan hasintongan (ayat 7). Laos songon i ma dihirim apostel Paulus nang tu si Timoteus. Umbahen dipabangkit ibana gabe naposo ni Tuhan i, laho pararathon barita na uli i jala mangarahon halak sipelebegu tu Tuhan Jesus. Ala, nang pe doli-doli ibana rumingkot do panghobasion i dibahen ibana sian angka naasing jala dang hea tarurak ibana alani haposoonna. Tung mansai didukung apostel Paulus do ibana asa tulus angka ulaonna jala marsangap tongtong Tuhani marhite panghobasionna. Sahat tu nanaeng marujung ngolu ni apostel Paulus, disarihon ibana do tongtong panghobasion ni si Timoteus. Dipatandahon i do panarihonon ni apostel i tu keberhasilan ni panghobasion ni si Timoteus di luat Epesus, jala sahat do tohonanna i diulahon si Timoteus.

Sipahusorhusoron

Hombar tu pangidoan ni apostel Paulus tu si Timoteus asa parjolo situtu manangianghon angka partogi ni bangso, songon i ma apala na rumingkot ulahonon ni angka naposo ni Debata, tamba ni ulaon marjamita dohot mangajari. Tahaporseai do marhite hadirion ni sahalak parhuaoso dohot pamarenta mangula do Debata, namambahen nasida gabe marbisuk jala marsahala, marpangalaho hadaulaton dohot hahormaton. Ai mampanghorhon situtu do nang i tu hatutulus ni panghobasion di huria. Uli ma nang parbuena dihirim marhite partangiangon na marsitutu (sungguh-sungguh) manangianghon saluhut jolma dohot pangomgomi, ima: asa jumpang suasana na marhademahon, sonang so hariboriboan di sude inganan. Amen.

Acara Minggu:

BE. 17: 1+3 Votum. A.XV/A.2-D.XIII/55

BE. 584: 1 Patik. Konfessi bindu 13

BE. 688: 1+3 M. Dosa. B.10-C.10

BE. 403: 1 Epistel. Daniel 6: 1-15

BE. 760: 1-2 Ev. 1 Timoteus 2: 1-7

BE. 811: 1

BE. 149: 1—

Lukas 15 1-7

 Minggu Letare, 27 Maret 2022

MARLAS NI ROHA DI BAGASAN TUHAN I

Epistel: Lukas 15:1-7

Pdt. Nikson Rudy Anto Samosir, M.Th HKBP Sudirman Medan

Hamu angka dongan di bagasan Kristus Jesus! Mutiha na arga ni umpama ni Jesus. Barita masa patuduhon tu hita holong ni roha ni sahalak ama tu ianakhonna, na manghalaputhon parlojongon, mangadu molo tinggang, molo tarhopit, molo lilu manang mago. I do jamita sadari on, na gabe alus sian Tuhanta Jesus tu angka ungut-ungut ni halak Parise dohot sibotosurat na mandok Dijangken do angka pardosa, pola sapanganan Ibana dohot nasida (ayat 2). Mangalusi dohot laho patangkashon jamitaNa tu nasida, dipasahat Jesus do tolu umpama Na parjolo, i ma taringot tu parbirubiru na burju, na laho mangalului sada birubiru na tardempar Jala dung salpu umpama ondeng, didok Tulanta Jesus do: "Suman tusi dogumodang las ni roha di banua ginjang mida sipardosa sahalak, na olo pauhahon rohana, asa mida siapalu sia partigor. na so pola paubation rohanasida."

Umpama on pabotohon balga ni holong ni roha ni Debata na mangalului sada birubiru na tardempar sian na siapulu sia Umpama na paduahon, i ma taringot tu sada parompuan na agoan sada hupang Hupang on, molo tabandinghon dohot hepengta nuaeng, sarupa ma on dohot 8 gr mas. Dung i dipagalak parempuan i ma palito jala disapui ma bagasna, mangalului nangetnanget hupang na mago i. Jala dung salpu umpama ondeng didok Tuhanta Jesus do "Suman tusi do masa las ni roha di jolo mi anglu sururuan ni Debata mida sahatak sipardova na paubation rohana Laos na parpudi, dihatalon ma muse umpama anak na mago na patuduhon tokoh among na burju. Adong tolu poin na ringkot taputihi songon mutiha na arga sian umpama ondeng. parjolo, ala ni holongNa diloas Debata do hita mambuat haputusanta sandiri. On ma burju ni sada Ama i ma Debatanta. marianakhon, sipata so boi taantusi boasa songon i Debata maradophon hita Paduahon, dijalo Ibana do jolma na mulak tu Ibana Patoluhon, dilehon do tingki paimahon asa marsiajar anakNa i sian hasalaanna Di pudi ni umpama na patoluhon i tangkas do didok: "Ai naung mate do amakhon gabe mangolu naung mago ibana, gabe jumpang muse ladi manungka marlas ni rola ma nasuda (Lukas 15:24).

Sian on ma tabereng, ia maksud dohot tujuan haroro ni Jesus tu portibi on i ma laho mangalului dohot laho paluahon angka na mago. Tung pe di mulana i angka halak Parise dohot siboto surat patuduhon roha na so setuju tu cara dohot sikap ni Jesus maradophon angka sijalo beo na dianggap hatiha i songon jolma sipardosa. Di pardalanan sejarah, angka sijalo beo i ma na mangula tu panggomgomi Romawi jala nunga dianggap songon penghianat siala nasida do na papunguhon pajak sian tonga-tonga ni masyarakat Jahudi. Tung dihasogohon nasida sijalo beo i sahat tu na dipaduru sian tongatonga ni parsaoran ni masyarakat Jahudi. Marhite umpama i ma tubu sungkun-sungkun, boasa parbirubiru itung mansai fokus tu sada birubiru na mago i? Alusna, songon parnampuna birubiru i ibana, arta na tung mansai arga do sudena birubiru i Dos do arga ni birubiru na siapulu sia i dohot sada birubiru na mago i jala parbirubiru i ndang olo agoan tung sada pe Songon i do nang Tuhanta Jesus, sude do hita nampuna ni Ibana jala tung mansai arga di joloNa Halak partigor dohot halak sipardosa nampuna ni Debata do, jala molo tung adong na mago ingkon do luluanNa jala paluaonNa. Tarida do i di misi ni Debata marhite Jesus Kristus di Mateus 9:12-13 "Alai dibege Jesus do 1. jadi ninama: Apala ringkot di angka na hisar pandaoni, di angka na marsalut do! Ai mdada ro Ahu laho manjou angka partigor, asa dipaula rohana. angka pardosa do!" Tangkas ma taida ia umpama taringot tu birubiru na lilu di turpuk on gabe sada narasi taringot tu holong ni roha ni Debata na tung mansai balga tu ganup jolma. Cinta-Nya maha luas, tanpa perhitungan untung rugi. Songon parnampuna birubiru Ibana, dipatuduhon do tanggung jawabNa songon na digombarhon Johannes 10:14-15 na mandok: "Hutanda do angka na di Ahu, jala Huseahon do hosangku humophop birubiru i." Ala ni i ma ringkot do hita memperluas perspektif manang pandanganta marhite holong na marharoroan sian Debata, asa unang holan haluaon ni dirinta taharingkoti, alai dohot ma nang haluaon ni dongan.

Hamu angka dongan di bagasan Kristus Jesus! Birubiru na lilu i gabe sada gombaran ni ngolu ni hita jolma do. Jotjotan hita mansoadahon holong ni roha ni Debata jala manadingkon Ibana ujungna gabe madabu ma hita tu bagasan dosa na paholang hadirionta sian holong ni roha ni Tuhan i. Alai songon parmahan na denggan, ndang dipasombu hita gabe mago manang lilu alai dilului jala dipalua tanpa pandang bulu. Inilah cinta Tuhan yang tidak dapat diukur oleh kalkulasi manusia. Betapa Tuhan benar-benar menghargai setiap manusia, pribadi per pribadi, tanpa membeda-bedakan yang benar dan yang salah. Dibahen Ibana do hajuguhonta songon sada pribadi manang subjek na patut dihaholongi di bagasan las ni roha godang dohot di parolopolopon banua ginjang, Laos marhite holong ni rohaNa na balga i ma mangonjar hita jolma sahat tu hamubaon manang pertobatan, songon na tangkas tarsurat Rom 2:4 "Ting na hu do roham di denggan ni basana na godang i, di panganjuonna nang di lambas ni rohana? Ndang diboto ho, habasaon ni Debata naeng manogihon ho tu hamubaon ni roha?" Las ma rohanta angka naung dipalua sian parhatobanan ni dosa jala rade ma hita mian di bagasan hamubaon ni roha na mamboan hita muse tu hangoluan sisalelengnilelengna ala Ibana do naung mamintori dohot na pabadiahon saluhut ngolunta. Amen.

Mateus 27 1-10

 SERMON EVANGGELIUM MINGGU 06 September 2020

Mateus 27 : 1-10

TOPIK : NDANG JADI MANJEHEHON DONGAN JOLMA

Patujolo

Buku Mateus ima na marisihon barita na uli taringot Tuhan Jesus, songon naung sinurathon ni buku padan na robi tu bangso Israel na pinilitna i. Bagabaga ima taringot tu haluaon na sian Jesus Kristus na so holan tu bangso Israel, alai tu sude bangso do haluaon i dipasahat. Khusus ma di turpukta sadarion ima taringot tu panaonon ni Jesus. Di masa panaonon ni Tuhan Jesus, mansai ragam do tarida angka pangalaho ni jolma na hurang denggan na ditujuhon tu Jesus. Sada sian pangalaho na so denggan i, sipasidingon ni jolma naung tinobus ni Tuhan Jesus ima na masa di turpuk on.

Hatorangan ni Turpuk

Ayat 1-2. Mangihuthon uhum ni halak Yahudi na so boi mangulahon uhum di tingki golap ni ari jala molo adong permasalahan-permasalahan mansai borat, ingkon dua hali diadili asing ni na sadari i. Gabe ingkon torang ni ari do mengadili sasahalak jolma di jolo ni angka malim dohot siboto surat. Taringot tu sangkap pamunuon ni angka malim tu Jesus, ala so pas tu roha nasida pangajarion ni Tuhan Jesus. Nungnga sai martutupi nasida mambahen suatu keputusan (bersekongkol) laho mamunu Jesus jala mamboan Jesus tu adopan ni si Pilatus ima sahalak Gubernur Romawi. Sasintongna sangkap ni angka malim dohot siboto surat i laho mamunu Jesus(Mat 26 : 65-66). Alai asa terlaksana do uhuman i ingkon diboan do tuadopan ni si Pilatus.

Ayat 3-5. Dung diboto si Judas sangkap nasida ima angka malim i manang siboto surat laho mamunu Tuhan Jesus, didapothon si Judas ma angka malim dohot siboto surat i na mandok manolsoli ma ibana. Tarida ma i sian ayat 4 na mandok “salah do au, hujehehon do hape naso marpipot.” Mangihuthon aturan agama Yahudi hatiha i, manjehehon sahalak jolma naso marpipot termasuk ulaon na jahat do i. Jala hajahaton nasumalin do tutu na pinatupa ni si Judas. Ai dijehehon ibana do naso marpipot, ima Jesus. Ndang halak na baru tinanda na Jesus i. Ndang hea Jesus patupahon na jat manang na roa tu Ibana. Alai dijehehon ibana do Jesus i alani hepeng sitolupulu rupia i. Nungnga dipaingot Jesus jea na ingkon masa tu halak na jehehon Ibana. Alai ndang tangi si Judas di sipaingot naung pinasahat ni Jesus, gabe menggantung diri ma si Judas alani penyesalan. Aut sugari ma pittor ditangihon ibana singot-singot ni Jesus i, gabe sisean na burju ma nasida.

Ayat 6-8 : “ndang jadi padomuan i tu arta ni joro, ai tuhor ni mudar do i......” di halak Jahudi taringot tu arta na dibagas joro na didok nasida ima angka malim manang siboto surat i. Uang yang tidak terhormat tidak dapat dimasukkan ke dalam peti persembahan (Ul 23:18). Namangihut, gabe dipake angka malim i do hepeng i laho manuhor ladang ni pande hudon (tanah tukang periuk) bahen parbandaan ni halak dagang. Hira na manarihon parbandaan ni halak dagang do malim i, ai so halak Jahudi i, sian na so hepengna sendiri padomuhon secara fisik material hepeng transaksi i tu arta Bagas joro ndang boi, nang pe sian i hian do haroroanna, hape mamengkesa tumuhor tano kuburan na margoar ladang mudar (tanah darah, Kis 1:19).

Ayat 9-10. Naeng patuduhon sian masa angka panurirang na Robi nungnga adong boa boa taringot na masa tu Jesus nadijehehon si Judas ibana tuangka soldadu. Jeremia manuriranghon i di buku Jeremia 18:2-12, 19:1-15. Jala na lobi ampit dope i ma sian panurirang Sakaria 11:12-13. Naeng dohonan turpuk on, paingoton ma tu angka na manadingkon tohonan haapostelon na ingkon dapotan uhum tu nasida, tapatudos na tu turpuk Epistel ima na disangkapi angka haha ni si Josep laho manggadis ibana tu halak Ismail ala ni pangiburuon hahana tu si Josep. Hape gabe nasida do na lilu jala dapotan uhum siala pangalaho nasida tu anggina ima si Josep na burju roha tu angka hahana.

Aplikasi

Dingolunta sisaonarion pe masa do pangalaho roha na manjehehon. Tangkas do didok Jesus “Marjea do halak na manjehehon Tuhan i”. Jala jea i masa do tu ngolu ni si Judas Iskariot. Alai so tung tadok di rohanta na holan si Judas gabe parjehe, alai hita sandiri pe termasuk do si parjehe. Sai adong dope halak na boi madabu tu hasalaan songon naung niula ni si Judas, na manjehehon Jesus, manggadis Jesus alani arta portibi on. Tutu ringkot do di hita arta manang sinamot dohot lan angka na asing na adong di portibion, alai naeng ma nian rumingkot Tuhan i di ngolunta. Songon si Simon Petrus na mansoadahon Jesus pola sampe tolu hali na mandok na so tinandana Jesus. Alani i hita pe tung marlaot dosa dohot hasalaan na hea taulahon, alai mauliate do tadok tu Tuhan i ai parasi roha godang do ibana. Jala dan hamamate ni parjahat i dipangido rohana alai hamumulak ni parjahat ido dipangido rohana. Antong di na tarjolma hita di na taboto dirinta naung mardosa, di na manolsoli hita di dosata i, naeng ma nian hita paubahon roha ai ido na rumingkot di jolo ni Tuhan i. AMEN.

2 Musa 20 1-11

 BAHAN SERMON JAMITA TU MINGGU OKULI, 7 MARET 2021

2 MUSA  20 : 1 – 11    “Holong Maradophon Debata”

Patujolo:

Mangihuthon pandok ni napistar ni Padan Narobi (Hywell R. Jones) adong dua pangibulan ni buku 2 Musa, ima:  Parjolo taringot tu haluaon ni bangso Israel sian Misir. Paduahon taringot tu panjouon ni Debata tu bangso Israel dohot parange na ingkon si hangoluhonon nasida songon bangso ni Debata. Ido isi ni buku 2 Musa on. Jala hinorhon ni ido umbahen digoar buku 2 Musa on “Exodus” lapatanna “haruar”.  Diparuar Jahowa bangso Israel sian parhatobanan Misir asa gabe “ampuna” (milik) ni Jahowa. Dom utu haluaon dohot pamiliton ni Jahowa di bangso Israel, dipasahat ma tu nasida angka siradotan jala siulahonon  sebagai kewajiban sogon bangso ni Debata.  Panjouon I martudutudu tu haluaon exodus na umbalga, ima haluaon napinatupa ni Tuhan Jesus Kristus di silang I, namanubuhon Israel Na Imbaru, ima angka naporsea di Jesus Kristus. Turpuk on ima angka aturan, uhum dohot siparangehonon ni angka naung dijou jala ditotophon bangso ni Debata, Israel na imbaru.  Uhum, aturan dohot siparangehonon ni naporsea I ima gabe alus tu holong ni Debata naung paluahon naporsea I sian parhatobanan ni dosa dohot bukti ni holong ni naporsea I tu Debata.

Hatorangan:

1.  Dijou Jahowa bangso Israel gabe bangsoNa, dipalua Jahowa bangso Israel sian Misir, ala nionjar ni holongNa namambahen bangso I gabe hasianNa. Tudos tu sada halak na solo rohana tu sadasada halak, sai dipatupa do nasa usaha asa tulus na hinasoloanna I gabe hasianNa.  Songon ima Debata, ala holong ni rohaNa tu bangso I; dipalua sian Misir, dijou jala dipilit asa gabe hasianNa. Di Bibelta I hata hasianNa didok do “menjadi harta kesayanganKu, di Hata Heber “Segulla” namarlapatan milik khusus (5 Musa 7:6 Maleaki 3 :17). Jala “hasianKu” martudutudu do I tu Huria, ima parsaoran ni angka naporsea di Jesus Kristus. Pamiliton ni Debata di bangso Isreal gabe hasianNa, saguru di Debata do i. Ndada ala hadirion ni bangso I, umbahen di todo nasida gabe bangsoNa (pat: Ef 2:8, 5 Musa 7:7) tung ala ni holongNa na so hadodoan ido.  Alai ala nabadia do Jahowa tontu angka milikNa pe ingkon badia do (pat. 2 Musa 20:20). Hinorhon ni ido dipasahat ma angka dia ma siradotan, siulahonon, sihangoluhon ni hasinNa, asa songon I Debata gabe jumpang ma songon I nang di hasianNa, dipasahat ma PatikNa marhite naposoNa si Musa. Asa I dihangoluhon bangsoNa.

Taparhatopot do naung dijou jala dipadiri Jesus Kristus Huria Batak gabe hasianNa. Marhite I diigil do sian Huria Batak patuduhon parange ni hasian ni Debata. Jala asa hot hita gabe hasian ni Debata, naeng parangehononta lomo ni roha ni Debata ima holong tu Debata (hapantunon, pangoloion dohot hasatiaon) suang songon I holong nang dame tu dongan jolma.

2. Molo taida sian haroro ni Patik na 10 on,  ndang dilehon patik on gabe dalan laho paruarhon bangso I sian parhatobanan Misir. Alai tu nasida naung ruar (malua) sian  parhatobanon ido patik I dilehon. Asa ndada patik ni halak natarhurung patik on. Alai patik ni halak naung mandai haluaon do, ndada patik asa taruli haluaon, ndang asa dihaholongi Debata, baliksa ala naung dihaholongi do. Alani patik di ngolu ni jolma naung pinalua ima: handang/pagar pembatas, napaduahon sorminan, jala na patoluhon ojahan ni ngolu.  Jala turpuk on khusus ma ojahan ni ngolu ni naporsea I tu Debata (manaringoti 4 patik naparjolo).

Naparjolo: Ahu do Jahowa Debatam……………ndang jadi marangkup Ahu………Dipatandahon Debata diriNa, jala dipabotohon Ibana do situngkol nasa naadong jala ndang adong tudoshon Ibana.

Napaduahon: Ndang jadi bahenonmu di ho ganaganaan……. Di na dua patik I diuduti do dohot parenta “na so jadi ho marsomba, ai Ahu do Jahowa Debatam, Debata parrimas namangaluluhon hajahaton ni amaama tu angka anakna. Ndang namandok tipahonon ni Jahowa dosa ni amana tu anakhonna. Alai pajamothon do, ai nasa na niula ni natoras manginona (langsung manang ndang) do I tu ianakhonna. Tarlumobi molo diihuthon ianakhonna I dalan napinungka ni natorasna.

Napatoluhon: Ndang jadi dohononmu goar ni Debata Jahowa, anggo sian neang  ni roha. Namangaradoti patik ni Debata jala namangulahonsa, ima halak napabadiahon goar ni Jahowa Debata. Tarida do paboa patik ni Debata on mangondolhon holan sada do Debata, ndang adong Debata naasing. Jala na so jadi luangan bahenon goar ni Tuhan I, luangan ala gabe so marisi jala marimpola hinorhon ni neang ni roha ni jolma maradophon goar ni Debata.

Napaopathon: Ingot ma ari sabbat laho pabadiahonsa. Patik on paingothon laho marparsaoran rap dohot Debata. Ido ari papituhon, jala dipasupasu Debata do ari I (1 Musa 2 : 2-3). Dilehon Debata do sada tingki di bangsoNa I laho marparsaoran rap dohot Ibana, jala rap dohot donganna jolma na tinompaNa i. Dinatinotophon ni Debata sada ari paradianan sian ragam ni tugas laho mangula ragam ni ulaon mangalului ngolu-ngolu siganup ari, di si ma boi maradian jala sonang roha (2 Musa 23:12) ndang tama molo marsidalian jolma I Alani ronsot ni angka ulaon, ai gari Tuhan I maradian do Ibana sian panompaon bolon napinatuduNa uju manompa hasiangan on ro di pangisisna. 

Panimpuli:

Holong ni Debata naung tajalo ima dinaung dipilit hita gabe HasianNa, diburi hita sian dosa, diparade di hita hangoluan namanontong, jala digoar hita anak mata. Pataridahon natutu hita hasianNa di pangido ma sian hita ngolu namanghaholongi Debata. Jala hapataran ni ngolu namanghaholongi Debata ima holan marhite namangulahon PatikNa.  Jala parenta manghaholongi Debata diondolhon Tuhan Jesus Kristus ma di Mateus 22 : 37 (ima epistle) ima marhite namangolu di bagasan holong nang tu sasama dongan jolma. Manghaholongi di sude tingki, jala marhite sude pambahen. Ndang tarsirang holong tu Debata sian holong tu dongan jolma.   Natapatupa tu dongan jolma ido nang natarpatupa hita tu Debata. Amen.

Ende :

BE  No. 18 : 1 - 2

BE  No. 202 : 2

BE  No. 174 : 1 + 4

BE  No. 211  : 3

BE  No. 723 : 1 - 2

BE  No. 471 : 1

BE  No. 730 : 1…….

Votum – Introitus  : A.VI/B.3 -  D.V/21

Patik : IV dohot  lapatanna

M. Dosa   : B.10 -  C.10

Epistel :  Mateus 22 : 37 – 41

Evangelium : 2  Musa 20 : 1 - 11

Psalmen 32 1-11

BAHAN JAMITA EPISTELM INGGU INVOCAVIT

Minggu, 05 Maret 2017      Psalmen 32: 1 – 11

HANGOLUHON MA ASI NI ROHA NI JAHOWA!

Patujolo

            Di parngoluan on pasti do hea manang jotjot do hita mangaku hasalaan tu natoras, tu dongan, manang tu manang ise pe na naung itabahen marsak manang hansit rohana. Ragam do dalan ni jolma laho manghatindanghon hasalaan manang mangido asa marparmuati roha ni dongan naung marsak manang hansit rohana. Alai sipata torop do halak mandok, “muba ma au, ndang huulangi be angka hasalaanku na salpu i”, alai holan hata sambing pambahenan ndang adong hataridaanna, jala olo do lobi sian hasalaanna i diulahon muse. Antong boha do hita manghatindanghon sude angka hasalaanta tu Na manompa hita? Ganup ari minggu dohot di ulaon huria do hita manopoti dosa jala itatangihon do bagabaga ni Debata naung manesa dosanta, alai ndang adong panghorhonna di ngoluna. Antong aha do haulion ni laho manghatindanghon hasalaan i manang dosa? Itapaihutihut ma hatorangan ni turpuk on.

Hatorangan ni Turpuk

            Ia bungku Psalmen on ima sada ende sipodaon ni raja Daud taringot hatuaon ni jolma naung manolsoli dosana jala taruli di ibana bagabaga hasesaan  ni dosa i. dipanghilalahon si Daud do boha do hinahansit ni sahalak naung mardosa, ima mabiar hona uhum. Ganup naung mardosa ingkon hona uhum do, jala upa tinuhor ni dosa do ianggo hamatean. Hamatean dison martudutudu do tu hamagoan jala ndang taruli di haheheon manang taruli di hamuliaon ni Jahowa di HarajaonNa. Molo idaonta ende ni si Daud on boi do idaonta na sai marhusari do si Daud marningot angka dosana di adopan ni Debata, jala mansai susah do alani i. antong aha do dosa na pinatandahon si Daud di turpuk on? Ima pangalaoision di patik manang aturan ni Jahowa, Debata. Molo mulak hita mamereng di Psalmen 1, tangkas do dihatahon jala diajarhon asa manat hita di angka parsaoranta jala unang gabe parsidohot hita mangihuthon angka parulaon ni angka donganta na mangalaosi angka patik manang aturan ni Debata. Patik manang Aturan ni Debata ima uhum na so boi ditawar manang dipangke laho kepentingan sepihak, alai patik manang aturan ni Debata ima hangoluan jala manang ise na mangalaosi patik i ndang di ibana be hangoluan i alai hamatean do dapotna.

            Di ay. 1 – 2 dihatahon “martua”, hata martua dison ndada las ni roha ala mandapot arta manang sinamot haulion ni portibi on alai paboahon las ni roha jala olopolop naung taruli di angka asi ni roha ni Debata jala na malua ibana sian hamatean mulak ma muse tu hangoluan di bagasan asi ni roha ni Debata. Di hatuaon on paboahon adong semangat baru, harapan yang baru jala ndang adong be roha biar di paruhuman na naeng jaloonna ala ni dosa. Martua ma jolma na so marpangalensem tondina di bagasan (ay. 2). Sai dibahen angka jolma do habonaronna asa pintor ibana di adopan ni Debata, gok sipangalensem asa uli idaon ni jolma alai busuk do di adopan ni Debata. Dirimpu do na so jadi diboto Jahowa manang aha di ngolunta be, ala ni i tumagon ma hita manghatidanghon na di rohanta sian roha na ias unang gok sipaotooto.

            Molo jolma na mananda dosana jala diboto do aha do uhum na patut sijaloon ala ni dosana i pasti do sai mabiar jala gale dihilala, ndang sonang modom, gok tekanan psikis/ jiwa na niadopanna. Laos digombarhon si Daud do songon dia do panghilalaan angka pardosa i. asa malua sian uhum i, dipodahon si Daud do marhite endena on asa manghatindanghon angka pangalaosion i dia adopan ni Debata. Manghatindanghon hasalaan manang dosa dos do i songon palumbanghon na sungkon di bagasan roha, sai unang be marsidalian boasa diulahon ibana dosa i asa gabe pintor ibana. Molo na tutu jala ias do rohanta mangido asa marparmuati roha ni Debata, pos ma rohanta sai marparmuati ma rohaNa mida hita angka na olo manolsoli dosana (ay. 3 – 5).

Hasesaan ni dosa (pengampunan dosa) ima basabasa ni Debata tu na niasianNa. Dijou do hita asa mananda dosanta jala ro hita tu Ibana. Hasesaan ni dosa marlapatan do i paluahon angka boban dohot manobus hita sian hurungan manang ihotihot ni dosa na mangihoti angka jolma. Malua (free/ bebas, merdeka). Molo hasomalan ni haJahudion sai dipelehonnasida do pelean situtungon tu hasesaan ni dosa. Alai itaingot ma ndang tung alani pelean i asa tarsesa hita, alai holan ala asi ni roha ni Jahowa Debata sambing do. Marhite hasesaan ni dosa adong ma pardengganan, ima pardenganan ni parsaoranta tu Debata Jahowa, jala tarjou do hita gabe halak na daulat songon naung nisesaan dosana. Molo dung itatopoti jala itasolsoli angka pangalaosionta manang dosanta di adopan ni Debata, jaloonta ma bagabaga di pangaramotion dohot panarihonon ni Debata di ngoluna. Ndang adong be jumpang roha biar manang tahuton alai jumpang ma di ibana hiras ni roha dohot las ni roha ala nunga mian ibana di pangaramotion ni Jahowa. Sai jagaon ni Jahowa do ibana sian nasa parmaraan, dihalianghonNa ma olopolop hatuaon. (ay. 6 – 7).

Di ay. 8 – 9 dipodai si Daud do bangso Israel uju i dohot tu hita sadari on asa tarihot ma hita tu dalan dia do dalan sidalanonta. Unang ma nian gabe tartuktuk manang mulak muse tu gambo hisap ni dosa i muse hita. Marhite patik dohot aturan ni Jahowa do diiringiring do langkanta dohot pardalanan ni ngolunta be. Ai patik manang aturan ni Jahowa do na gabe pagar tu hita angka naung pinalua marhite asi dohot holong ni roha ni Jahowa. Unang ma songon hoda manang halode na ingkon jumolo dilinsing asa mangoloi parenta ni tuanna. Sai dipangke do hoda manang halode songon sada alat transportasi, alai ingkon dilinsing jumolo asa diboto hoda manang halode i hatop manang lambat langkana. Marhite ayat 8 – 9 on dipodai do hita asa marbisuk hita mangalangkahon silangkahononta, marroha ma hita di na mamolus angka na masa on nang pe lam torop angka parjahat.

Alai itaingot ma angka dongan, ndang na dos upa ni parjahat (na so olo manadinghon dosana) sian angka na olo manadingkon dosana jala marhadaulaton di ngoluna. Ay. 10 – 11 tangkas do dipabotohon  na lan do parniahapan ni parjahat i. ndang adong dapot las ni roha di partondion angka parjahat nang pe dapot di nasida hasonangan sambing na jala marpansohotan do hasonanganna i. alai molo halak naung mananda dosana jala gabe olo mian di asi dohot holong ni roha ni Jahowa, marolopolop ma hita, jala marende rap dohot angka naung tinobus. Ndang adong be biar manang ganggu, dang adong be tekanan jiwa, jala ndang adong be uhum hamatean. Marhite naung disesa Jahowa angka pangalaosionta mulak ma hita gabe masuk tu hangoluan na saleleng ni lelengna, ai tusi do hita tarjou.

Hahonaan ni Turpuk

            Antong hita halak naung porsea, unang ma holan hatanta mandok sala ma au disi, jala nunga tung mardosa au, alai ndang adong roha laho manolsoli. Halak naung manolsoli dosana naeng ma sian roha na polin dohot roha na ias, unang ma sipangalensem ibana laho mangido hasesaan ni dosa. Marhite turpuk jamita on diajari do hita ai ndang adong na buni di adopan ni Jahowa. Songon dia pe malonta marsidalian na mangulahon dosa, dang marlapatan i ai diboto Debata do i.

            Molo naung manopoti dosa hita adong ma komitmen, na ingkon siulahononta. Marlapatan ma i molo na tutu do hita naung mananda dosanta jala manolsoli dosanta i naeng ma marsitutu hita mangulahonsa. Unang be nian diulahon muse dosa i. itaingot ma ale angka dongan, ndang na gabe sonang ngolu ni halak na mangulahon dosa. Ringkot do hita ingkon ro mandapothon Jahowa laho mangido hasesaan ni dosa. Asa dapotan tua hita, jala dapotan olopolop hita angka naung tinobus. Tung mansai ringkot do hita ro tu Debata jala mangidohon asi dohot holong ni rohaNa, ala i do hangoluanta.  Taruli haseaan ni dosa, taruli ma hita di bagabaga di panarihon manang di pangaramotion ni Debata di ngolunta. Molo naung taruli do hita di bagabaga i, adong ma semangat baru, ndang adong be ganggu dohot biar ni roha ala Jahowa ma na mangarmoti hita. Molo na tutu do hita manghangoluhon asi dohot holong ni Debata dapot ma hita bisuk dohot hapantason nang songon i olopolop di bagasan roha na polin gabe unduk di patik ni Debata. Amen. i holong dohot asi ni roha ni Debata na pinatupaNa laho mamboan haluaon dohot las ni roha tu hita. Amen.

Markus 16 9-18

BAHAN SERMON JAMITA PASKAH I

4 APRIL 2021

MARKUS 16 :  9 – 18 

 “Huaso Haheheon ni Jesus”

Patujolo:

Sada peristiwa na so tarantusan ni jolma do marhite utokutok lapatan ni haheheon ni Tuhan Jesus i. Ingkon haporseaon do dalan manjalo dohot mangantusi. Si Maria dohot sisean naasing ipe mansai maol do manjalo peristiwa haheheon ni Jesus di mulana i. Pola do sahat tu na dipinsang Jesus jogal ni roha ni sisean I asa tarjolma jala tarantusan nasida haheheonni Jesus i.  Marhite ima gabe marbalik roha ni sisean naung mandate, mandele jala mabiari gabe roha namarlas ni roha, marsigorgor mamabaritahonsa tu sude jolma na jumpangsa.  Boi do hilalaonta  pengaruh ni las ni roha I, ai sahat tu sadari on di hamajuon ni ilmu dht tehnologi tongtong do ndang tartaluhon manang ise hamatean.   Baliksa gabe lam godang sahit nuaeng on na imbaru namambahen hita mabiar tarlumobi tu ari naparpudi on ala covid 19. Antong tongtong do hamatean I musu na umbalga jala sihabiaran. Alani ma peristiwa haheheon ni Jesus sian na mate tongtong gabe pangapul di hita,  paboa na so hamatean I parhuaso na parpudi di hita, nang pe ingkon bolusonta hamatean I, alai laos gabe dalan do I marsada dohot Debata dung masa ari haheheon na balga I diujung ni angka tingki jala ro Kristus I mangalap angka naporsea.

Hatorangan:

Ay. 9 – 14; Mulak mangolu Jesus jala dipataridahon diriNa jumolo tu si Maria Magdalena.Jala dipaboa si Maria do haheheon ni Jesus I tu siseanNa alai ndang porsea nasida.  Dungi dipataridahon Jesus ma muse diriNa tu dua halak sisean naasing, alai tong dope ndang porsea nasida.  Jala dibaritahon nasida do tu angka donganna naasing, alai tong ndang porsea. Ai tung maol do dihaporseai nasida  taringot tu hahehehon ni Jesus. Mangihut muse di pataridahon Jesus diriNa tu sisean na sampulu sada I, huhut dipinsang jogal ni roha dohot ganggu ni roha nasida. Ala ido hasintonganna; jogal ni roha ido jotjotan patubuhon ganggu ni roha.  Hinorhon ni I do gabe dipinsang Jesus nasida.

Ay. 15: Dung dipinsang Jesus sisean I di suruh ma mambaritahon namasa I (haheheon ni Jesus), di nanidokNa “laho jala jamitahon”.  Namarlapatan do I na ingkon siulaon, ndang  boi ndang. Asa ingkon do borhat, jala sibaritahonon ima naung hehe Jesus sian namate.

Ay. 16-18; Manang ise porsea di Barita Nauli I jsls porsea ingkon  dapotan haluaon. Jala na so porsea hona uhum. Dibohali Jesus do angka naporsea I di nalaho mambaritahon Barita Nauli.

Hahonaan tu jamita:

1. Maol do diantusi sisean I haheheon ni Jesus. Mapitung do mata ni roha nasida, ndang diingot nasida naung nidok ni Tuhan Jesus tagan rap dohot nasida,nahehe anak ni jolma I di ari patoluhon.  Huroha ndang diantusi nasida paboa namanghatahon diriNa do Jesus  molo didok pe anak ni jolma i. Songon ido boi masa nang tu hita.  Apala na dijoloniba ndang boi tinanda secara haporseaon. Boi do ganup tingki hita tumangihon Hata ni Debata, jala mamparsiajarisa alai ndang tatanda situtu aha I, jala dia nidok ni I, gabe ndang magodang haporseaonta.

2. Sai  marbagabaga do Debata di PL taringot tu haluaon ni jolma sian hamatean dohot dosa,marhite parsuruNa di Mesias Anak ni Debata. Jadi di na hehe Jesus sian na mate I gok ma bagabagai, nungga bungka be pintu di hita laho manjalo hasintongan ni hata ni Tuhanta, namandok nungga talu hamatean, nungga marujung huaso ni sibolis, ndang tarsirang upa tinuhor ni dosa (hamatean) I be naporsea dohot Debata.

3. Laos mardomu tu si ma, ia haheheon I ima sada hamonangan bolon, tabantaban sian musu na jorbut na dianggap saleleng on musu na so tartaluhon manang ise nungga di hamonanghon Tuhan Jesus marhite haheheonNa. Tutu sai olo dope soluk pangkilalaan namabiar molo paadopadop namatenta hita, alai soal pangkilaan na hurang porsea na ma I, ianggo fakta nungga talu hamatean I, nungga baoi hehe angka namate sogot manjalo tohapna sian Tuhanta.

4. Saleleng di ngolu on hita ditugashon do mambaritahon Barita Nauli I huhut mangurupi jolma. Unang mabiar jala unang ganggu asa unang mauhon hita.  Ai aha ma sihirimon sian angka na ganggu dohot na jogal roha ?  Mangihuthon si Jakobus (Jak 1 :6-9) ndang adong sihirimon sian angka na ganggu roha, ai ndang dapotna agia aha.   Lapatanna ndang mungkin berhasil  angka namangula ulaonna di bagasan ganggu ni roha. Ingkon sahat do Barita Nauli I tu sandok portibi on. Jala hita do disuru paboahon I,ala nungga tajalo jala tahaporseai Kristus naung hehe sian namate ido Tuhan napangolu jala parade inganan di hita si hagoluan namanontong i. Amen.

Lukas 23 44-48

BAHAN SERMON JAMITA DI HAMAMATE NI TUHAN JESUS, 2 APRIL 2021

LUKAS 23 : 44 – 48  

“Diseahon Jesus do HosaNa”

Patujolo:

Tubu dungi mate, ima patik na hot di hajolmaon dung madabu tu bagasan dosa. Jesus I pe songon ido,ndang asing. Ibana pe tubu dungi mate muse.  Ai di nasaluhut do ingkon dos Ibana dohot hahaanggina (Heber 4 : 15). Alai nang pe songon I adong do parasiangan ni jolma I tu Jesus. Ai natubu do jolma tupa pintor mate, ndang  tarpaboasa  aha pangkorhonna ro tu portibi on, ndang tardoksa aha naung nialamanna; jala ndang tarpatuduhonsa boasa dibolushon sambing parngoluon manopot tanoman.  Jala torop do nean jolma siganjang umur alai tung so adong do sada sitiopan na hot sian sude ngoluna. On do na gumodang; mate jolma manghokhop ngolu dagingna, alani dosana, alani angka na sobinotona. Otik do halak na mate humongkop na uli basa. Ima parasingan ni jolma sian Jesus Krustus.  Tutu poso do nian Jesus I mate, alai porngis do isi ni ngoluNa. Sian hatutubuNa sahat tu  partos ni hosaNa adong do sada program ni ngoluNa na tangkas, ima manean hamatean bahen tobus ni hajolmaon.

Hatorangan dohot aplikasi:

1. Namasa andorang so hamamate ni Jesus.

Hamamate ni Jesus di silang dang dos I tu hamamate ni angka na diparsilangkon ni Kaisar Rom (na di hambirang dohot na disiamun ni Tuhan Jesus). Adong do 2 na masa pataridahon parasingan I ima naparjolo masa haholomon saleleng 3 jom, pukkul 12.00 – tu pukkul 15.00 di sandok inganan na tarsilang Jesus. Diuji angka sejarawan dohot ahli perbintangan do manangkasi namasa i, diuji akka teolog do mangalapati dia nidok ni mataniari na mangholom i. Pangalapation na so pola padao hu na boi antusan ima : Gabe diboto luat Jerusalem dohot humaliangna ma parasingan ni panilangkonon ni Jesus. Na paduahoan: maribak hire-hire di bagas joro i. Somal do tabaritahon dia lapatan ni parribak ni hire-hire i,  ima : Hamamate ni Jesus mangungkap dalan na bungbung tu jolma I mamasuki habangsa parasian ni Debata, dang ingkon marhite angka malim songon na somal diantusi jala di ula songon na di PL. Jesus na mate tarsilang I ido gabe malim na padomu jolma pardosa dohot Debata na Badia.

2. Jesus mangadopi  hamamatena.

Adong do 2 na masa diula  Jesus andorang so hamamateNa mangihuthon turpuk on Ima : Na parjolo, marsoara na gogo Jesus joujou tu AmaNa. Na paduahon, pasahathon tondiNa tu Debata. Nadua na masa I patuduhon namanaon na hansit situtu do Jesus di silang I, pola joujou tu amaNa mardongan soara na gogo (phonesas phone megale). Hata I patuduhon dokdok ni sitaonon na diparsirangguthon ; patulusonna manang pasidingonna. Alai songon anak na marhaunduhon tu AmaNa, dijouhon ma mardongan soara na gogo asa sahat tu AmaNa I tondiNa. Tos hosa ni Jesus, asa torus do mangolu hita.  Jala sasintongna ndang mate Tuhanta I, ai dipasahat do TondiNa tu Debata. Marhite I  paltak ma tarida paboa Debata do hasahatan ni Jesus I, Debata do hasahatan ni Tondi. Asa ndang tu tangan ni sibolis alai tu Debata do. Jala tondi ni angka naporsea pe sahat tu Debata do.

3. Panindangion ni letnan  taringot tu Jesus na tarsilang.

Letnan nisordadu Rom na mamparsilanghon Jesus marnida sude na masa dipartos ni hosaNa. Dipanghilalahon letnan I ma haholomon ni mataniari, soara ni Jesus na joujou jala dipaujung dinaponasahathon tondiNa tu Debata sada peristiwa na so dung masa. Gabe didok letnan I ma “ tutu do on anak ni Debata”/tutu do on halak na tigor roha (dikaios). Ia lapatan ni dikaios di turpuk on ima na soadong dosa ni Jesus, tigor do Ibana di Jolo ni Debata, tigor satigor-tigorna. Alai apala na tigor songon ido na tarsilang i. I do parningotan na tapatupa, I do na tahaposi, dosanta do naditobus di silang i. 

4. Sikap ni natorop marnida Jesus na tarsilang i.

Manolsol I do nasida. Didok sude natorop masitompuk andora na, andorang so mulak nasida. Pandohan I patuduhon panolsolion; holan Alani hami mate tarsilang halak na tigor. On ma tong na ringkot tadok tu dirinta be marningot ari hamamate ni Jesus. Alani dosanta do umbahen na tarsilang Ibana. Ingkon udutanta do panolsolionta I dohot mangido hasesaan ni dosanta. 

Panimpuli:

Sada hataridaan ni holong ni Debata na ummarga ima songon natahamauliatehon marhite  parningotan di hamamate ni Jesus Kristus Sipalua i. Hamamate ni Jesus ima na gabe hamonangan, ndada hamagoan manang hataluon. Di napinasahat ni Jesus TondiNa tu AmaNa I – di namate Ibana di dolok Golgata, gabe mualni pangkirimon namangolu doi di hita angka naporsea, paboa naung digarar Tuhan I sude utang Alani dosanta, jala gabe partohap hita di haluaon dohot hangoluan na salelengnilelengna.  Pangkirimon na songon ima na gabe hagogoon di hita mangadopi ragam ni hamaolon dohot sitaonon di portibi on. Alani gabe lam margogo ma hita mangihuthon panjouon ni Tuhan I huhut mamaritahon harajaon ni Debata diportibi on. Amen.

Psalmen 32 8-11

BAHAN SERMON JAMITA TU MINGGU LETARE 27 MARET 2022

PSALMEN 32: 8-11 “MARLAS NI ROHA DI BAGASAN TUHAN I”

PATUJOLO

Letare na marlapatan i marlas ni roha ma hamu. Aha do sihalashononta? Las ni roha songon dia do na didok dibagasan turpuk jamita on? Psalmen 32 on ima bagian ende hamauliateon ni si David ala hasesaan ni dosa. Dihatindanghon parPsalmen on do ima hatuaonna ala nunga disesa Tuhan i dosana. Dipanghilalahon si David do hinahansit ni sahalak naung mardosa, ima manjalo/hona uhum (ay. 1-7). Jala di bagasan turpuk jamita on Psalmen 32:8-11 ima bagian ni pangajarian ni Debata tu halak na manolsoli dosana tu adopan ni Debata. Hatuaon jala las ni roha ni halak na porsea tu Debata ima ala nunga disesa dosana. Jala di bagasan hasesaan ni dosa i do jumpang di ibana asi ni roha ni Debata, songon na dipatorang di bagasan turpuk jamita. Taida ma boha parPsalmen manghatindanghon pangajarion, pangaramotion dohot panghophopon ni Debata tu angka na olo manolsoli dosana jala na manjalo hasesaan ni dosa. Marhitehite pengalaman ni ngoluna, disosoi ibana ma asa naeng ma ganup jolma mangolu dohot mangula di bagasan hadaulaton ni roha.

HATORANGAN

Di ayat 8 i mansai tangkas do taida padan ni Debata tu angka na manghaporseai Ibana ima Huparohai, Hupodai jala Huiringiring pe ho”. On ma padan ni Debata di halak na porsea i ma mangajarhon dalan na ingkon sidalanan ni angka na porsea i. Padan on manggombarhon hasatiaon ni Debata tu angka na porsea tu Ibana jala jaminan pandonganion ni Debata. Marpadan do Jahowa asa unang lilu angka na porsea di Ibana, rade do Ibana mandongani angka na porsea asa unang marmara. Marhite angka patik dohot aturan ni Jahowa do diiringiring do langkanta dohot pardalanan ni ngolunta. Ai patik dohot aturan i do na gabe pagar di hita naung pinalua marhite asi dohot holong ni roha ni Debata. Jala on do na hinatindanghon ni si David di bagasan turpuk on, paboa Debata do na mamparrohai, mamodai taringot tu dalan sidalanan ni jolma manisia dohot na mangiringngiring jolma i. Marhitehite habisuhon na sian Debata ndang pasombuon ni Debata jolma i lilu di bagasan ngoluna laos madabu tu bagasan dosa. Hata ni Debata do mual habisuhon, hapistaran dohot hapantason ni roha di jolma manisia. Sasintongna marhitehite hata ni Debata sai dipodahon Ibana do tu hita dalan na ingkon sidalananta di portibion, asa unang lilu hita.

Asa unang ma songon hoda dohot halode na pinatunduk ni kongkang (ay. 9). Lapatanna, ndang ingkon di bagasan kekerasan mamaksahon jolma i asa unduk jala marhabiaran tu Debata. Marroha, marhabisuhon, jala marhapantason do jolma i, diboto do dia na denggan dohot na roa di portibion. Diboto do dia na patut siulahonon dohot na sipasidingon. Gari halode ndang olo madabu tu bagasan lubang na sarupa. Alani, dao umbisuk do jolma manisia sian nasa jadijadian ni Debata na asing i. Ia ngolu ni halak na porsea di Tuhan i, ingkon do rade manjalo pangajarion ni Debata andorang so ro uhum alani dosana. Songon na dipanghilalahon raja David uju mardosa ibana dompak Debata. Ndang sonang rohana ala nunga mardosa ibana dompak Debata. Ido umbahen gabe ro ibana mandapothon Debata marhite tangiangna mangido hasesaan ni dosa. Diparhatopot jala dipaandar ibana do secara terbuka jala jujur tu Debata disude angka pangalaosionna i. Jala dialusi Debata do tangiang panolsolionna i na mambahen gabe sonang rohana nang tondina pe. Haradeonna laho paubahon rohana, ido dalanna taruli di las ni roha na sian Debata.

Marhite pengalaman ni si David na manjalo hasesaan ni dosa sian Debata, dihatindanghon ibana ma, diayat 10 i. Pandohan on, ndada holan haruar buti sian pamanganna alai nunga dipanghilalahon ibana. Marhite pinsang-pinsang ni Debata tu ibana, manogunogu ibana di dalan sidalananna. Di na manolosoli ibana tu Debata di sude angka pangalaosionna i, disi do lam dipanghilalahon ibana ma asi ni roha ni Debata na manghaliangi tondi nang pamatangna. Halak na marhaposan tu Debata tusi do pasahathon ni Debata asi ni rohaNa marhite hasesaan ni dosa dohot paluahon hita sian parmaraan. Alani ingkon lam marbisuk ma hita dipardalanan ni ngolunta, rade ma hita manjalo poda dohot pangajarion na sian Debata asa tongtong hita dihaliangi asi ni rohaNa. 

Boasa disoarahon asa marlas ni roha jala marolopolopdi ayat 11 i? Pengalaman Daud hidup dalam dosanya membuatnya tidak dapat bersukacita. Adong tekanan batin dipanghilalahon ibana alani dosana i. Alai, dung ro ibana tu Debata mangokuhon sude dosana, disi ma jumpang ibana las ni roha sian Debata. Jala ido na disosohon ibana ditongatonga ni bangso i nang angka na porsea asa marlas ni roha jala marolopolop dibagasan Tuhan ala nungga disesa Debata dosana i. Nungga dipalua Debata angka na porsea i sian uhum alani dosa. Marhite jamita Psalmen 32 on mangajarhon asa marlas ni roha ma angka na porsea nang pe gok hamaolon na ingkon diadopi, ala nunga marpadan Debata gabe dongan di hita di saluhut angka na masa dingolunta. Marlas ni roha jala marolopolop tu Debata, ndada ulaon parsatongkian manang alani situasi nang kondisi. Alai marlas ni roha jala marolopolop ima pataridahon parsitutuonta manghaporseai pandonganion ni Debata dingolunta. Las ni roha ima respon haporseaonta tu pangajarion ni Debata na marisihon padan pangaramotion dohot asi ni roha. Alai baliksa do na masa di angka na so porsea di Tuhan i ima parniahapan dohot pandelean do jumpangna.

SIPAHUSORHUSORON

Tasulingkit ma jo dirinta marhite sungkunsungkun on. Pardosa na sumalin do ho? Balga do dosam manang metmet? Godang dosam ditabunihon ho? Taalusi ma di bagasan parsihohoton tu Debata. Atik tung naung godang pangalaosionta tu hata ni Debata. Isara pangalaosion binahen ni ginjang ni roha, marhite angka pambahenan dohot angka sangkap-sangkap na roa. Antong tapasahat ma dirinta songon parPsalmen on na pasahathon dirina tu Jahowa.

Topik Minggu mandok “Marlas ni roha di bagasan Tuhan i”, manjouhon hita asa tongtong hita marlas ni roha di bagasan ngolunta di arsak nang sitaonon pe. Las ni rohanta naumbalga sian i ima ala nungga dihaliangi asi ni roha ni Debata hita marhite na nilehonNa AnakNa Tuhan Jesus Kristus gabe Sipalua, na mate jala hehe laho humophop hita sian uhum alani dosa. Marlas ni roha di bagasan Tuhan ima ngolu na ingkon tongtong marhadaulaton, martangiang, marhaporseaon dohot marhamubaon ni roha tu na denggan. Rade manadinghon ngolu na buruk i ima pardosaon i tu ngolu naimbaru ima unduk tu hata dohot Patik ni Debata. Alani, marlas ni roha ma hamu tongtong di bagasan Tuhan i! Huulahi ma mandok: Marlas ni roha ma hamu! (Pilippi 4:4). Amen.

ACARA MINGGU

BE No. 125: 1-2

Votum. A.VI/B.4-D.V/22

BE No. 190: 1

Patik: I-X

BE No. 681: 1-2

M. Dosa B.4-C.15

BE No. 418: 1+4

Epistel Lukas 15: 1-7

BE No. 240: 1+3

M. Haporseaon

BE No. 378: 1

Jamita Psalmen 32: 8-11

BE No. 564: 1—

Panutup

Psalmen 146 1-10

SERMON PARHALADO HKBP NA GOK TINGKI & 

PARHALADO HKBP RESSORT LAE PARIRA

DISTRIK VI DAIRI

Tu Minggu, 07 November 2021 ( Mg. Pa XXIII DG. Trinitatis)

________________________________

Turpuk Jamita  :  Psalmen 146 : 1 - 10

Mangaradoti Nasa Natinompa

Hata “Psalm” marharoroan sian parhataan Gorik lapatanna ende, pujipujian. Di Bibel na marbahasa Heber digoari buku Psalm “tehilim”, lapatanna pujipujian. Hombar do goar i tu isina, ai buku Psalm i ma ende pujipujian na patubegehon pos ni roha tu Debata. Pos ni roha ni par Psalm dipatuduhon marhite syair na marrumang ende pujipujian, tangiang, andung, panindangion dohot rumang na asing. Adong do sian Psalm ende pribadi, adong ende hatopan. Sude Psalm i patuduhon pos ni roha ni par Psalm maradophon Debata. Mangihuthon turpuk on, dihangoluhon raja David do na pasahat pujipujian tu Debata, marningot ragam ni pambahenan ni Debata di sandok ngoluna. Molo marningot pambahenan ni Debata, tama do sude angka na manggulmit ro marsomba tu Ibana pasahathon pujipujian. Ai marhite pambahenanNa do manjadi portibi on, jala marhasangapon do Ibana di sude partingkian sahat tu ngolu sadari on. On ma na mangonjar parpsalmen mandok: Ale tondingku, puji ma Jahowa!

2.   Lima (5) bindu na gabe panutup ni buku Psalmen, marhataridaan sian rumangna (ciri khas), na dibuha jala dipaujung marhite pandohan “Haleluya”, na marlapatan “puji Tuhan” (bindu 146-150). Pandohan i papatarhon ia luhutna angka psalmen na di Bibelta , magarahon (mengajak) luhutna asa mamuji Debata. Panandaon na tangkas di Tuhan I nang di angka dalanNa, jala parsidohot (ikut serta) di rencana akbar-Nya, ingkon do manongtong mamuji Tuhan. Jolma nang angka pangarajai dang tarbahen gabe haposan ni ngolu, ala marhaujungan do saluhutna, nda holan Debata Jahowa sandiri do tahe na gabe panghirimon. Sikap ni ngolu na holan marhalanomhon Debata di parngoluon, tu si do hita diarahon turpukta.

3.   Unang ma marhaposan tu jolma: Boasa? Ia jolma marhaujungan do. Mansai tangkas do di ayat 4 diondolhon, Ia ruar sogot * tondina i, mulak ma ibana tu tanona, di ari na sasada i pesan ma sude angka sangkapsangkapna i. Tegas do hata ni Debata mangondolhon ia daging ni jolma gabe tano muse, dung ruar tondina i. Pesan (lenyap) ma sude sangkapsangkapna. Hombar tusi ma, asa holan marhalanomhon/haposan tu Debata. Debata do na mamuhai ngolu, alani i tahaposi ma nang Ibana paujunghonsa hombar tu sangkapNa. Dang na mandok dang denggan marhaposan tu dongan jolma, alai tahaposi ma angka jolma na haposan tu Debata. Asa ngolu na masihaposan di hajolmaon, i ma ngolu na rap masihaposan tu Debata sambing. 

4.   Martua ma manang ise, na mambahen Debata ni si Jakkob pangurupina, marpangkirimon ibana di Jahowa Debatana! (ay. 5). Tarajumi do sude jolma manghalungunhon tua. Holan Tuhan Jahowa do silehon tua (kebahagiaan). Pandohan “Debata ni si Jakkob” martudutudu tu togu ni janji ni Debata tu bangsoNa marsundutsundut, i ma janji hatuaon (kebahagiaan) i. Ibana do:

Ø  Ay 6 Sitompa langit dohot tano on dohot laut ro di isina sudena, Siingot hasintongan ro di salelenglelengna.

Aha do sangkap/tujuan panompaon na pinatupa ni Debata?? Tarataratai ma marhite sermonta on. Molo disungkun hita, boasa adong hita di portibi on? Boha do alusta? Pangantusion na tangkas tu panompaon ni Debata di saluhut, lam pahothon parsitutuon sasahalak do i mamuji Ibana. Mangarajumi diri sandiri na gabe sada “ciptaan yang sangat berharga” di Debata, patubuhon parsihohoton tu Ibana. Anda spesial di mata Tuhan, dan sangat dicintaiNya. Anda bukan lahir dan hadir di dunia ini karena kebetulan, namun atas rencana dan rancangan Tuhan. Hasintonganna do na patar sian saluhutna panompaonNa I. Penciptaan adalah deklarasi kebenaran, keadilan dan kebaikan Tuhan, jala na hot do i salelenglelengna/tak terbatas. Talup ma antong tarespon panompaonNa i, marhite pamujion na marsitutu. 

Ø  Ay 7-8 Sipatingkos uhum tu angka na nirupa, Silehon sipanganon tu angka na male. Jahowa mangharhari angka na tarrante. Tigor do uhum ni jahowa, hasintongan do angka dalanNa. Tarlumobi tu angka jolma na nirupa ni angka ketidakadilan/pangarupaon. Di angka na mengalami angka ketidakadilan, Debata mardalan rap nasida. Di angka na mangulahon na so tingkos/ketidakadilan i, perlu disadari, bahwa sebenarnya dia sedang berhadapan dan berperkara dengan Tuhan yang maha adil dan benar. Songon i nang di angka na tarrante (terpenjara), secara fisik pe i, tarlumobi na terpenjara ala ni dosa (partondion), taungkap ma ngolunta asa bongot Jahowa. Jahowa do patonggor mata ni angka na mapitung, Jahowa pahehe angka na * tungki, Jahowa mangkaholongi angka partigor.

Ø  Ay 9 Jahowa mangaramoti * halak na buro, Ibana * margogoihon angka na sopot so marama so marina dohot angka na mabalu, jala dipalipe ianggo dalan ni angka parjahat. Saluhutna do diramoti Debata ngolu ni jolma. Halak na buro (buro di sada huta, nang buro di haporseaon), mampargogoi na gale di hajolmaon (na so marama/marina – na mabalu). Sada jaminan perlindungan dipasahat Debata tu angka na gale. Gale tarlumobi sian pamerengan ni hajolmaon. Nang pe so mandapot hak nang status sasahalak, isara ni na mabalu sian segi adat, alai anggo Debata tangkas do dipataridahon pangaramotionna. Ai Jahowa do raja ro di salelenglelengna, Debatami, marsundutsundut sahat tu tingki on. 

5.   TOPIK MINGGU: “Mangaradoti nasa natinompa”, tangkas do dihajongjongkon di turpuk on; dihaholongi Debata do sude na tinompaNa i mangihuthon ay. 7 - 9. Marhite i tangkas do disarihon jala diradoti Debata na tinompaNa i. alai ndada holan jolma disarihon Debata, angka na tinompa na asing i pe tong do diparmudumudu Debata (Pat. 1 Musa 1 :30; Psalmen 104:11-22; Mat. 26). Udut tusi tahaporseai do, parsuruon ni Debata tu jolma di 1 Musa 1:28; sahat do hinanghamna tu na mangaramoti angka na tinompa (alam). Alani i tapauliuli ma na tinompa ni Tuhan i, ala ido parsuruon ni Debata tu hita, molo uli portibi on, uli ma nang ngolunta, jala lam ulima panandaon nang pamujionta tu Debata. Amen.

Job 23 10-17

BAHAN SERMON PENDETA HKBP DISTRIK VIII - DKI JAKARTA-RAYA

SENIN, 27 SEPTEMBER 2021

TURPUK SIAN JOB 23:10-17

TOPIK: “DEBATA NA MANONTONG.”

PENDAHULUAN:

Angka aleale ni si Job (Elifas, Bildad, Zofar dohot si Elihu), na mewakili angka halak na memiliki fanatisme ugamo na sompit, manganggap si Job nunga mangulahon dosa dohot hajahaton na balga, alani gabe diuhum Debata ma ibana. Si Job na mewakili angka halak na porsea (ingkon songoni do singtongna) manganggap ia parsorion  na nialamanna i manang na nialaman ni halak na asing pe ndang melulu ala ni dosa dohot hajahaton na niulahonna. Dibagasan hata na asing dohonon ma, halak na daulat, burju jala tigor di adopan ni Debata pe, boi do mangadopi parsorion na songgop tu ngoluna (tabandingkon tu angka ngolu ni apostel di padan na imbaru).

Di angka sude tuduhan na dipasahat si Elifas, si Job naeng pasahathon holso ni rohana jala naeng memberontak huhut mengalualu tu Debata. Si Job sahat tu naeng pajumpang dohot Debata jala naeng membela diri diadopan ni Debata huhut naeng manangihon alus sian Debata. Alai gabe tarjolma do si Job paboa Debata na gok huaso do, Panompa jala siboto saluhut. Umbotoan do Debata jala mangantusi pardalanan ni ngolu ni jolma i. Manghilala do si Job, parungkilonna i sada ujian na boi mambahen ibana tampil jala marmulia bahenon ni Debata. Tung pe si Job merasa putus asa, ala songon na tinadingkon ni Debata ibana, mardalan di parsorionna i, alai tetap do ibana marsigantung tu Debata. Pos do rohana paboa Debata mangalehon haluaon dohot sabam ni roha tu ibana.

HATORANGAN:

1) AYAT 10-12: PARSORION I NDANG MAMBAHEN SI JOB RUAR SIAN DALAN NI DEBATA. Si Job manggombarhon pengalaman dohot ujian na nialamanna di ngluna songon sada proses na papitahon sere (ay. 10). Dirajumi ibana do ia ngolu on gok misteri do, termasuk ma i di fakta paboa Debata songon na hohom do di parungkilonna i. Disi si Job marsiajar marhaporseaon paboa Debata i na mangolu do jala dirina lagi diuji Debata.

Gabe songon na manghatai ma si Job tu angka alealena, "Ale Elifas, Bildad, dohot Zofar, tung pe ndang tarbahen ahu sahat tu habangsana, porsea do ahu na mangolu do Ibana jala diboto Ibana do pardalanan ni ngolungku. Diboto Ibana do dalanku. Porsea do ahu tu Ibana. Ndung salpu ujian on, pasintongan nama ahu, ala diboto Ibana do songon dia ahu mangolu di adopanNa. Timbul do ahu songon sere naung teruji marhite api pangunjunan i. Huhatindangkon do na huoloi angka dalanNa,  jala hataNa husimpan dibagasan rohangku". Di tingki si Job madabu tu bagasan pangunjunan, langka ni patna ingkon lobi hebat dope mangihuthon bogas dohot dalan ni Debata, jala ndang olo manirpang sian dalan dohot bogas ni Debata ala panghorhon ni pangunjunan na masa i. Molo di si Job pangunjunan manang parsorion i i ma tingki asa lam pasolhothon diri tu Debata do, ndang gabe tingki asa laho manadingkon Debata.

2) AYAT 13-15: AHA NAUNG DITOTOPHON DEBATA, PATUPAONNA DO.

Molo nunga ditotophon Debata ia si Job patut manjalo dohot mangadopi parungkilon i, ai mungkin do Debata olo paubahon pikkiranNa? Alai Debata ndang olo muba disi - ise na boi manundati Debata? Aha naung dihalomohon Debata, ulahononna do i. Mungkin do Debata gabe pangondingi di ibana? Ragam ni pingkiran dohot panghirimon na songon i mian di bagasan rohana mambahen ibana madabu tu hagodoron. Alai Debatanta i ma Debata na berdaulat. Ahape na niula ni Debata na dumenggan do i di hita. Asal ma setia ibana tu Debata, ala ndang hea muba holong dohot asi ni rohaNa tu naposoNa. Si Job patorangkon, molo nunga ditotophon Debata sada ulaon, ndang adong na boi manundati haputusanNa, jala saluhut naung dihalomohon Debata, ndang adong agia sada pe na boi mambatalhon lomo ni rohaNa i. Si Job nunga sahat tu kesadaran iman paboa laho mangadopi haputusan dohot lomo ni roha ni Debata i ma marhite ngolu na berserah dohot marsigantung tu Debata, ala molo lam mangalo jala manggunturi hita di haputusan dohot lomo ni rohaNa, gabe lam mambahen marhinamago dohot marhadangolan ngolunta sandiri. Kesadaran ni si Job di legalitas manang wibawa ni lomo ni roha ni Debata dohot haputusan ni Debata na absolut tarida do i sian pandohanna na mandok: “Mabiar do si Job mandapothon habangsa ni Debata, mabiar do ibana di panimbangion ni Debata” (ay.15). Panghilalaan ni si Job na mabiar tu Debata, ala si Job mabiar situtu tu Debata, manat situtu jala sangap situtu tu Debata, asa unang si Job mambahen hancit roha ni Debata, ala si Job marsitutu manghasiani dohot manghaholongi Debata. Mansai jaga do ibana di panghilalaan ni Debata, unang mambahen sahat tu na hancit roha ni Debata. Tudos do i songon hita na manghaholongi donganta, tontu biar do rohanta asa unang mambahen hancit roha ni donganta i.

3) AYAT 16-17: TUNG PE SI JOB MANDELE ALAI DI PARDALANAN NI NGOLUNA GABE MARSIGANTUNG TU DEBATA DO IBANA.

Parsorion ni ngolu di portibi on sipata mambahen jolma i tu pangalaho na salah mangantusi Debata (‘gagal paham’). Jala si Job marusaha do asa unang salah mangantusi Debata, di na mangadopi angka pangunjunan, dohot parsorion ibana di bagasan ngoluna. Tarida do i sian panindangion ni si Job sandiri na manopoti, paboa pangunjunan di ngoluna dihilala ibana sipata Tuhan i mambahen rohana gabe gale, magopu jala marpandelean. Jala sipata si Job manghilala Debata na sun hinagogo i mambahen dirina marhabiaran. Alai gabe tarjolma do si Job, paboa Debata na burju roha do, Debata ndang mangaripashon halak na burju roha dohot halak na tigor. Si Job mangapuli dirina muse, paboa saleleng ibana mangolu di bagasan hasintongan dohot hadengganon di bagasan Debata, di ujungna ngoluna gabe denggan do muse, Debata sumuangkon ngoluna muse. I do umbahen na  pos roha ni si Job, saleleng sintong ibana mangolu diadopan ni Debata,  ia holom ni pangunjunan i ndang boi maniaphon ibana, asal ma pardompahan ni si Job tongtong mangadop tu sinondang ni Debata, haholomon i ndang boi manghuphupi manang maniaphon ibana (ay. 17).

SIPAHUSORHUSORON:  

1. Topik ni minggunta i ma “Debata na manongtong”. Topik on sada barita na denggan do tu sude angka na mardosa di portibi on, boasa? Ala Debata ndang hea muba laho manghaholongi hita jolma pardosa on. Gabe sada barita las ni roha do on dohot ‘motor penggerak’ di hita jolma na mardosa jala na lea di portibi on, paboa sasintongna adong dope partingkian di hita laho marnampunahon ngolu na dumenggan, asal ma hita mangolu di Debata, asal ma hita hatop marhamubaon ni roha jala porsea tu Debata ala denggan ni basaNa dohot asi ni rohaNa na manongtong, i do alana boasa  di tongatonga ni pangunjunan na jorbut boi tahilala holong dohot pangurupion ni Debata Jahowa di bagasan parngoluonta. Ala Debata na manongtong do Ibana, aha pe parungkilon na taadopi, tabahen ma i laho lam pasolhothon dirinta tu Ibana jala unang hea tabahen pangunjunan dohot parsorion i  laho padaohon manang paholanghon dirinta sian Debata Jahowa.

2. Ringkot tasadari Paboa Debata do na berdaulat  di ngolunta. Ngolunta on milik ni Debata do. Ndang adong hakta atas ngolunta. Songoni do tong, molo dipaloas Debata hita mangadopi krisis, pos ma rohanta paboa sudena i dibagasan angka sangkapNa. Gabe sangkap na denggan do angka na masai asal ma tongtong holong hita tu Debata. Adong do hikmah dohot parsiajaran na uli di balik ni setiap perestiwa na taadopi. Sanggup do Debata paubahon angka na buruk dohot arsak gabe na uli di tingkina.  Amen.

2 Musa 17 1-7

BAHAN SERMON JAMITA TU MINGGU REMINISCERE, 8  MARET  2020

2 MUSA 17 :1-7 ”Manongtong do Asi ni Roha ni Debata tu BangsoNa”

Patujolo

Molo tatangkasi di padan narobi ngolu ni bangso Israel, jumpag hita do sada panindangion natangkas napaboahon isi ni haporseaon nasida, I ma sada panindangion napatuduhon ojahan dohot hajongjongan ni bangso natarpillit i. Marojahan di bagasan manang piga ulaon nabalga situtu napinatupa ni Jahowa, apala natimbul situtu jala nagabe pamusatan ni panindangion nasida. Angka ulaon I do tongtong dipujipuji nasida marhite angka psalmen I, jala ulaon natimbul I do tongtong di baritahon ganup marpungu nasida laho marsomba tu Debata. Parningotan di angkaulaon I tongtong diparatarata nasida asa hot panghaporseaon ni bangso i marsundutsundut. Ia ulaon ni Jahowa natimbuli, I ma “haluaon sian tano Misir dohot panogunoguon ni Debata di nasida jala namamboan nasida sahat tu tano nabadia I, malua sian parungkilon dohot di parmaraan di halongonan I, tarlumobi ma halongangan napinatupa ni Debata di laut rara I laho patariparhon nasida. Jala napaduahon parpadanon nanilehon ni Debata tu nasida di dolok Sinai. Angka on do ulaon natimbul nagabe isi ni panindangion ni bangsoi. Jadi ianggo turpukta saonnari I ma sebagian sian pengalaman nasida di Rapidim. Dung borhat nasida sian halongonan Sin, marguru tu pandokkon ni Jahowa pardalan nasida, gabe marsaro ma nasida di Rapidim; alai ndang adong aek siinumon ni bangso I di si jadi marungutungut ma halak Israel. Hamaolon di pardalanan nasida gabe parsiajaran mananda hagogoon ni Debata. Di pardalanan ni bangso Israel sian Misir laho tu tano Kanaan tung godang do angka pangunjunan dohot dalan namaol di bolus nasida. Dung malua nasida sian tangan ni raja Parao, marhite nataripar sian laut narara, marende do sude bangso I mamuji Debata. Dungi mardalan ma nasida toluari di bagasan halongonan I alai ndang jumpangan aek nasida. Di Mara jumping nasida do aek napaet. Marmungutmungut ma bangso I dompak si Musa mandok: aha ma siinumonnami? Alai dipatuduhon Debata do tu si Musa sada hau nanireongkonna tu aek i, jadi tonggi ma aek i. ndung salpu I marungutungut muse ma bangso Israel ala hurang sipanganon, gabe diparmudumudu Debata nasida marhite Lote dohot Manna. Diuduti nasida ma muse pardalanan nasida hombar tupandokhon ni Jahowa, gabe marsaro ma nasida di Rapidim. On ma turpuk di hita sadari on.

Hatorangan:

1. Hurangan aek siinumon bangso I gabe marungutungut nasida

Dibadai bangso I si Musa huhut didok: lehon hamu aek siinumon nami! Alus ni si Musa: boasa ahu badaan muna? Boasa unjunan muna Jahowa? Ungutungut ni bangso I dompak si Musa, ala uas nasida,pola ruar hata nasida mandok: boasa tung paruaronmu hami sian Misir laho mamunu hami dohot anakhon name ro di pinahan nami? Angka hata nakoras, na ingkon taonon ni naposo ni Debata, si Musa sipata mambahen ingkon mangangguhi ibana, mangalualu tu Debata. Ndang dirina sandiri di pangasahon ibana, alai tongotong do si Musa manukkun tu Debata, manang na aha naingkon patupaonna laho manogunogu bangso Israel i. 

2. Parenta ni Debata tu si Musa 

Asa mamolus Mangarahon sian jolo ni bangsoI deba sian angka sintua ni Israel donganna Mamboan tungkotna, na nilipathonona tu batang aek Dung I laho ma Ibana.

Nang pe naung didok Debata angka parentaNa, ndang dipasombu boti si Musa. Jongjong do Debata di si, di jolo ni si Musa, di atas ni sada dolok batu di Horeb. Dung I, di suru Debata ma, asa dilipati dolok batu I gabe ruar ma aek siinumon ni bangso i. tongtong do marhagogoon Debata patupa angka naringkot I di bangso Israel I, jala dipatupa do I di adopan ni angka sintua ni Israel. Marhite sian I dibahen ma goar ni hajongjongan I Massa (pangunjunan) dohot Meriba (parbadaan). Dibahen do goar I songon I ala bada ni halak Israel, jala ala niunjunan nasida Jahowa marhite hata namandok: di tongatongan ta do Jahowa ulaning manang ndang?

Sipahusorhusoron

1. Dibagasan pardalanan ni ngolunta pe jotjot do hita marungutungut ala so sai dapot songon na di bagasan rohanta i. Di paingot turpuk on do asa unang sai pintor marungutungut tarlumobi mangunjuni Debata. Ai di na so manghaporseai panarihon dohot pangaramotion ni Debata do tubu pangalaho na marungutungut.

2. Marnida pangalaho ni bangsona di halongonan I, taida do songon ima nang hajongjongan ni huria Kristen di portibi on. Songon pardalanan ni bangso natarpillit sian halongonan sahat tu tano Kanaan, suang songon I nang huria I di portibi on mardalan mamolus sian halongonan ni portibi on manuju tano na imbaru/ Kanaan na imbaru, songon nanidok ni Apostel Paulus di 1 Korint 10:1.

3. Si Musa partogi ni bangso Israel, nangpe ingkon manaon naporsuk ibana, sian ungutungut ni bangso I, tongtong do ibana pasahathon sasude tu Debata.  Ai holan Debata do naboi mangurupi jala haporusan di sude parsorion. Naeng songon I nang hita, tongtong ma marhaposan tu Debata asa Ibana mampargogoi jala paluahon hita.

4. Songon sada parsiajaran do panogunoguon ni Jahowa di bangso Israel di pardalanan nasida di halongonan i. Sada pokok bahasan nasida ima “haporseaon”. Ndada guruhonon I sian buku, alai pengalaman nasida di ngolu siganup ari. Ndang hea ditinggalhon Debata nasida, nangpe sai mura marungutungut nasida siala angka haporluan nasida isarana huranganaekinasida. MingguReminiscereManongtong do asinirohaniDebatatubangsoNa. Hita do bangsoNa I, jala hot do asinirohaNasiannarobi, sahattusalelengna. Alani manongtong ma panghaporseaionta tu Jesus Kristus i. Amen. 

Ende:

BE No. 4 : 1 – 3

BE  No. 575 : 1

BE  No. 182 :1 – 2

BE No. 177 : 1 – 2

BE  No. 221 : 1 + 3

BE No. 216 : 1………….

BE  No.503 : 1…………

Votum- Introitus : A.VI/B.2 – D.V/20

Patik  : V – X

M.Dosa : B.10 –C.10

Epistel  : Roma 5 : 1 – 11

Ev.  2 Musa 17 : 1 - 7