Lukas 23 44-48

BAHAN SERMON JAMITA DI HAMAMATE NI TUHAN JESUS, 2 APRIL 2021

LUKAS 23 : 44 – 48  

“Diseahon Jesus do HosaNa”

Patujolo:

Tubu dungi mate, ima patik na hot di hajolmaon dung madabu tu bagasan dosa. Jesus I pe songon ido,ndang asing. Ibana pe tubu dungi mate muse.  Ai di nasaluhut do ingkon dos Ibana dohot hahaanggina (Heber 4 : 15). Alai nang pe songon I adong do parasiangan ni jolma I tu Jesus. Ai natubu do jolma tupa pintor mate, ndang  tarpaboasa  aha pangkorhonna ro tu portibi on, ndang tardoksa aha naung nialamanna; jala ndang tarpatuduhonsa boasa dibolushon sambing parngoluon manopot tanoman.  Jala torop do nean jolma siganjang umur alai tung so adong do sada sitiopan na hot sian sude ngoluna. On do na gumodang; mate jolma manghokhop ngolu dagingna, alani dosana, alani angka na sobinotona. Otik do halak na mate humongkop na uli basa. Ima parasingan ni jolma sian Jesus Krustus.  Tutu poso do nian Jesus I mate, alai porngis do isi ni ngoluNa. Sian hatutubuNa sahat tu  partos ni hosaNa adong do sada program ni ngoluNa na tangkas, ima manean hamatean bahen tobus ni hajolmaon.

Hatorangan dohot aplikasi:

1. Namasa andorang so hamamate ni Jesus.

Hamamate ni Jesus di silang dang dos I tu hamamate ni angka na diparsilangkon ni Kaisar Rom (na di hambirang dohot na disiamun ni Tuhan Jesus). Adong do 2 na masa pataridahon parasingan I ima naparjolo masa haholomon saleleng 3 jom, pukkul 12.00 – tu pukkul 15.00 di sandok inganan na tarsilang Jesus. Diuji angka sejarawan dohot ahli perbintangan do manangkasi namasa i, diuji akka teolog do mangalapati dia nidok ni mataniari na mangholom i. Pangalapation na so pola padao hu na boi antusan ima : Gabe diboto luat Jerusalem dohot humaliangna ma parasingan ni panilangkonon ni Jesus. Na paduahoan: maribak hire-hire di bagas joro i. Somal do tabaritahon dia lapatan ni parribak ni hire-hire i,  ima : Hamamate ni Jesus mangungkap dalan na bungbung tu jolma I mamasuki habangsa parasian ni Debata, dang ingkon marhite angka malim songon na somal diantusi jala di ula songon na di PL. Jesus na mate tarsilang I ido gabe malim na padomu jolma pardosa dohot Debata na Badia.

2. Jesus mangadopi  hamamatena.

Adong do 2 na masa diula  Jesus andorang so hamamateNa mangihuthon turpuk on Ima : Na parjolo, marsoara na gogo Jesus joujou tu AmaNa. Na paduahon, pasahathon tondiNa tu Debata. Nadua na masa I patuduhon namanaon na hansit situtu do Jesus di silang I, pola joujou tu amaNa mardongan soara na gogo (phonesas phone megale). Hata I patuduhon dokdok ni sitaonon na diparsirangguthon ; patulusonna manang pasidingonna. Alai songon anak na marhaunduhon tu AmaNa, dijouhon ma mardongan soara na gogo asa sahat tu AmaNa I tondiNa. Tos hosa ni Jesus, asa torus do mangolu hita.  Jala sasintongna ndang mate Tuhanta I, ai dipasahat do TondiNa tu Debata. Marhite I  paltak ma tarida paboa Debata do hasahatan ni Jesus I, Debata do hasahatan ni Tondi. Asa ndang tu tangan ni sibolis alai tu Debata do. Jala tondi ni angka naporsea pe sahat tu Debata do.

3. Panindangion ni letnan  taringot tu Jesus na tarsilang.

Letnan nisordadu Rom na mamparsilanghon Jesus marnida sude na masa dipartos ni hosaNa. Dipanghilalahon letnan I ma haholomon ni mataniari, soara ni Jesus na joujou jala dipaujung dinaponasahathon tondiNa tu Debata sada peristiwa na so dung masa. Gabe didok letnan I ma “ tutu do on anak ni Debata”/tutu do on halak na tigor roha (dikaios). Ia lapatan ni dikaios di turpuk on ima na soadong dosa ni Jesus, tigor do Ibana di Jolo ni Debata, tigor satigor-tigorna. Alai apala na tigor songon ido na tarsilang i. I do parningotan na tapatupa, I do na tahaposi, dosanta do naditobus di silang i. 

4. Sikap ni natorop marnida Jesus na tarsilang i.

Manolsol I do nasida. Didok sude natorop masitompuk andora na, andorang so mulak nasida. Pandohan I patuduhon panolsolion; holan Alani hami mate tarsilang halak na tigor. On ma tong na ringkot tadok tu dirinta be marningot ari hamamate ni Jesus. Alani dosanta do umbahen na tarsilang Ibana. Ingkon udutanta do panolsolionta I dohot mangido hasesaan ni dosanta. 

Panimpuli:

Sada hataridaan ni holong ni Debata na ummarga ima songon natahamauliatehon marhite  parningotan di hamamate ni Jesus Kristus Sipalua i. Hamamate ni Jesus ima na gabe hamonangan, ndada hamagoan manang hataluon. Di napinasahat ni Jesus TondiNa tu AmaNa I – di namate Ibana di dolok Golgata, gabe mualni pangkirimon namangolu doi di hita angka naporsea, paboa naung digarar Tuhan I sude utang Alani dosanta, jala gabe partohap hita di haluaon dohot hangoluan na salelengnilelengna.  Pangkirimon na songon ima na gabe hagogoon di hita mangadopi ragam ni hamaolon dohot sitaonon di portibi on. Alani gabe lam margogo ma hita mangihuthon panjouon ni Tuhan I huhut mamaritahon harajaon ni Debata diportibi on. Amen.