1 Korint 1 1-9

BAHAN SERMON JAMITA TU MINGGU II DUNG EPHIPANIAS, 19 JANUARI 2020

“Asi  ni roha dohot dame na sian Debata di bagasan Kristus”

1 KORINT 1 : 1- 9

Patujolo:

Mamungka dung adong huria, tagamon nunga masa angka kelompok, masa parasalisian di angka huria I, songon na di Korint dohot di Pilippi. Dapot do I taboto  sian surat ni si Paulus na manosohon, “asa sada ma parrohahon hamu, sada ma haholongon muna, saroha sapingkiran ma hamu!” (Pilippi 2:2). Jala di turpuk on mandok “Asi ni roha dohot dame ma di hamu (ay.4) laos diuduti muse didok hot ma hamu binahen ni sada ni roha dohot sada ni pingkiran! (ay.10)”. Tagamon laos I do latar belakan penulisan ni 1 Korintus on  ima ala sahat tu si Paulus  sian anggota keluarga ni si Kloe  namasa parsalisian di huria na di Koritus, gabe adong disi kelompok kelompok.  Si Stepanus pe dohot dohot dua halak donganna diparhatutu do na masa i. Dungi adong muse barita na roa tu si Paulus I ma alana saor (bergaul) ruas ni huria I tu angka halak parmainan (orang cabul), i ma na terjadi di ruar ni huria. Alus tu angka sungkun-sungkun ni huria I ma ro surat ni si Paulus 1 Korint on. 

Hatorangan dohot aplikasi:

Sian 12 huria na pinajongjong ni apostel I, adong do keistimewaan ni huria Korint, dibasabasahon Jesus Kristus do karunia khusus tu huria I, ai naung gabe mamora do huria I di saluhutna, di sandok hata nang di pangantusion. Dibasabasa ni Debata na pinasahatNa tu huria I, jujur do apostel Paulus paboahon I tu nasida marhite suratna. Pola mandok mauliate ibana tu Debata marningot asi ni roha ni Debata naung nilehonNa tu huria I di bagasan Kristus  Jesus. Las ni roha ni apostel I di na mangihut ima, ala burju huria I marpanindangion taringot tu Tuhan Jesus Kristus raja ni huria I, sihophop jala sitobus hajolmaon. Uli marpanghuling, denggan dipangantusion jala haburjuon marpanindangion tung basabasa ni Debata do I tu huria. Asa nasa basabasa na pinasahat ni Debata tu huria, pangkeon ni huria I ma I dalan pauliuli parsaoran sama nasida bahen hasangapon di Debata asa marmulia Debata jala lam tamba bilangan ni angka siihuthon Jesus. Manontong do Debata ma masumasu jala marbasabasa, dipasu pasu do huria I, ruas nang parhalado, marbasabasa do Ibana manumpak angka naporsea asa satia marbarita nauli. Panumpahion ni Debata, sihamauliateon ni huria I ma I, molo dilehon Debata talenta khusus, pangkeon ni huria I ma I mangeahi hasadaon. Lam tu sadana ma huria , di padao ma partontangan, nang  parsalisian, , songoni nang ragam angka parbadaan, lam tu Ringgasna ma angka naposo ni Debata pasauthon lomo ni rohaNa, di tonga tonga nihuria i. Dia ma ulaon na tau palashon roha ni Debata, Jesus Kristus raja ni huria I, I ma dieahi, ima dipareak, I ma dihalaputi.  Ai ringkot do botoon ni huria, nunga dipasingkop Debata asi ni rohaNa, gabe ndang hurangan di haporluan siganup ari, donganan ni Debata do huria I jala togutoguonNa tongtong angka na badia I manomu ari ni Jesus Kristus. Sada do na tinujuna, asa unang adong nanggo sada sian nasida na hasurahan, dipanghation nang diparsaoran, ai haposan do Debata naung manjou huria I tu parsaoran dohot Anakna Tuhan Jesus Kristus i.  Tama marlas niroha huria dibasa basa ni Debata. Didongani jala di parbadia I do huria I tongtong di bagasan goar ni Anakna Tuhan Jesus Kristus. Antong,aha do sipareahon ni huria nuaeng, aha do ulaon ni angka naporsea di Jesus Kristus tu Tuhanta i.  Naparjolo : songon angka naung jinouNa, angka na pinarbadiaan ni Debata, diharingkothon ma marsaor di huria, unang olo marbolatbolat jala unang siula parbolaton,ai asi niroha ni Debata naumbalga ima manesa parbolatonta ala ni dosa I gabe dipasada jala dipadame hita tu hita jala hita tu Debata. Hinorhon ni I ingkon gabe angka pardame dohot namangolu di bagasan habadiaon di roha dohot  ma dipanghataion nang diparange. Napaduahon : songon angka naung manjalo basa basa ni Debata, marbasa basa ma, pantun ma dipanghataion, uli nang di pangantusion, ido dalan padimun dimun parsaoran di huria. Napatoluhon : songon halak naung sinesaan dosana, rade ma manesa dosa ni dongan nang musu, unang manjujur na salahalai ingkon rademanalpuhon angka na hurang, ai tu si do angka na porsea I dijou Debata, jala ala naung jumolo do disesa  Debata dosanta. 

Sai mian ma asi ni roha ni Debata dohot dame na sian Anakna Tuhan Jesus Kristus nang parsaoran naro sian Tondi Porbadia di huria i. margurasa ma holong ni roha di angka na badia I, ringgasma mulaulaon, marbisuk ma pamanathon saluhut namasa, I do dalan mameop parbinotoan jala pataridahon basa basa na sian Debata. Debata ma patauhon hita, sadarion, marsogot haduan,  ro di saleleng ni lelengna. Amen. 

Acara:

BE No. 569 : 1 – 3

BE No. 17 : 1 – 2

BE No. 72 : 1 + 5

BE  No.165 :1 -2

BE  No.262 : 1 – 2

BENo. 30 : 1………….

BE  No.792 :1………….

Votum – Introitus  : A.IV/A.3 – D.IV/13

Patik  :I dohot Lapatanna

M.Dosa : B.3 – C.3

Ep.  Pesalmen 40 : 1 – 11

Ev.  1 Korintus 1 : 1 – 9