5 Musa 26 6-10a

Minggu Invocavit, 6 Maret 2022

MALUA DO GANUP NA MANJOU GOAR NI TUHAN I

Epistel: 5 Musa 26 : 6 - 10a

Pdt. Jonni DS. Tambun, S.Th 

Mansai na ringkot do mamilangmilang i pambahenan ni Debata di ngolunta; dihatindangkon bangso Israel do na silehonlehon ni Debata do haluaon i, jala dung masuk nasida tu tano silehonon ni Debata, ingkon buaton nasida ma sian patumonaan ni sandok parbue ni tano i, na dapot nasida sian tanona, jala pamasuhon nasida ma i tu bagasan ampang. Dung i topoton nasida malim, jala lehononna ma tu malim i dung i buaton ni malim i ma ampang i, jala peakhononna i di adopan ni langgatan ni Jahowa, dung i dohononmu ma di adopan ni Jahowa : Halak Ram na mandaodao do anggo damang, dung i tuat ma ibana tu Misir, laos mardagangdagang disi, mardongan otik jolma, hape gabe bangso na bolon, na gogo, jala na torop bilanganna disi (ay. 1-5). Parjolo, dihirim Debata do sian bangsoNa i asa tongtong nasida satia marhaporseaon na paruarhon nasida sian parhatobanon Misir. Paduahon, dipaingot do bangso i laho rade diri songon bangso ni Debata laho mamasuhi tano parjanjian i. Tangkas marhaporseaon bangso i na mangalehon na hinirim ni roha nasida. Patoluhon, mangolu di bagasan roha mauliate tu Debata, dung masuk nasida tu tano parjanjian i, i ma pasahathon patumonaan sian na niula nasida tu Debata, ima tanda ni las ni roha nasida mandok mauliate dohot pataridahon ni haunduhon nasida tu Debata. Malua do ganup na manjou Goar ni Tuhan i; nunga dipalua Jesus Kristus i hita sian dosa nang hamatean i, "Ibana do patujolo ni arta siteanonta, bahen haluaon ni na hinophopNa i, asa tarpuji hasangapon Na i" (Epesus 1:14; 1 Petrus 1:18-19). 

Parjolo, Ditangihon Debata do soara ni halak na porsea. Diadopi bangso Israel do hamaolon sian halak Misir mambahen na so uhum, mangarupa jala mangampehon ulaon na borat. Songon i do nang na taadopi di parngoluon on, ragam do hamaolon saleleng di portibi on tu ganup halak na porsea; na ro sian duru dohot sian bagasan, laho manguji hadirion dohot mansege haporseaonta. Ndang tarpalua hita dirinta molo sian gogonta sandiri, tung sura laho hita tu na gogo ni portibi on na so marnosan i, ndang jumpang hita haluaon i. Alai dipangido sian hita asa tangkas hita mangalualu jala mangangguhi (berseru) tu Debata Jahowa, gabe ditangihon Ibana do soaranta. Marhite pandohan i suraon do pangantusion na mangihut on, i ma: parjolo, "ditangihon" (syema mendengar) Debata do soara dohot joujou ni angka na porsea, di hatiha targogot hita, talpe tu nasa ragam ni hamaolon na sonson di jolonta. Paduahon, jala "marpanatap" (melihat) rohaNa dipardangolan, hangaluton dohot hagogotan na taadopi. Sian i ma boi hatindanghononta, sai diurupi Debata do hita di ganup angka na taparungkilhon manang nasa ragam ni hamaolon dohot sahit na taadopi di tongatonga ni ngolunta on. Ala ni mansai ringkot hita, bagasta, hurianta dohot bangsonta manangihon Hata ni Debata na margogoihon hita di nasa gulmit ni ngolunta.

Paduahon, Ditogihon Debata do ruar halak na porsea jala dilehon basabasaNa. Pandohan "ditogihon" (membawa), ndada holan ditangihon dohot ditatap pardangolan ni bangsoNa, alai dohot do ditogiho ro do Debata tumopot bangsoNa mamboan haruar sian parhatobanon Misir. Dipatupa Debata panogihononNa di bangsoNa marhite na mangihut on, i ma: ditogihon do marhite tangan na gogo (kuat), margogo situtu do tangan ni Debata (2 Musa 3:19; 2 Musa 6:1). Didok do: "Ida ma, ndada na hurang ganjang tangan ni Jahowa laho mangurupi hamu; jala ndada marhapal pinggolNa, so marbinege" (Jesaya 59:1). Marhite sian botohon na toltol/lengan yang teracung (2 Musa 3:20; 2 Musa 7:5). Marhite sian hasonggoton bolon (kedahsyatan). Mardongan angka tanda dohot halongangan (2 Musa 7:3). Dunghon ni i diboan ma bangso i tu inganan naung dibasabasahonNa, i ma tano habaoran ni susu dohot situak ni loba. Ditogihon Debata do halak na porsea sian nasa ragam ni hamaolon dohot parungkilon na masa na taadopi jala na tabolus saleleng ni portibi on. Dipalua do hita sian ulaon haholomon dohot angka hajahaton na mangonggop hita. Jala diboan do hita tu ngolu hasonangan dohot las ni roha, diparade do angka na ringkot di tongatonga ni ngolunta. Jala diparade do inganan na sonang i ma surgo hasonangan i inganan ni angka na porsea di Ibana.

Patoluhon, Boan hamu ma patumonaan parbue ni haluaonmuna. Hataridaan ni haporseaon ni halak na porsea, naung pinalua ni Debata sian nasa ragam ni hamaolon dohot parungkilon i, i ma mamboan patumonaan ni parbue ni tano, na nilehon ni Debata. Dihaporseai bangso Israel do tano Kanaan habaoran ni susu dohot situak ni loba i ma na binasabasahon ni Debata tu nasida. Ndada sian gogo dohot pingkiran nasida umbahen boi bangsoNa i masuk tu tano Kanaan i. Alai silehonlehon ni Debata do i tu nasida, i ma tano, sinamot, arta na didapot nasida di inganan i. Tahaporseai do jala tahatindangkon do ngolu dohot parngoluon, tano, inganan pangulononta dohot ulaonta i ma silehonlehon ni Debata do i tu halak na porsea. Didok endenta i: "Sai sian Debata do nasa na adong, nang rihit sangkamata, nang laut, nang tano on. Tinompa ni hataNa do hau nang bulung i. Nasa uli basa ro sian Debata. I pe Ibana puji ma, huhut haposi da" (BE.373:2). Ala ni ringkot mangarajumi dohot mangauhon nasa na pinasahat ni Debata, pamatang nang tondinta pe marharoroan sian Ibana do. Ringkot tahamauliatehon i tu Debata hombar tu endenta 204: 2i; "Nasa na nilehonmi, tondi ro di pamatangku, hosa dohot gogongki, ro di saluhut artangku, Hupasahat i tu Ho, na so unsatonku do". Ndang adong na boi marsidalian manang ise pe, so ingkon pasahathon patumonaan ni na niulana tu Debata, ai sian Ibana do haroroan ni pasupasu partondion sian banua ginjang.

Hombar tu goar ni Invocavit, Jouonna ma Ahu, jadi alusanku ma ibana (Psalm 91:15a). Halak na joujou sian hurungan ni dosa i, i do paluaonNa. Halak naung pinalua ni Debata ingkon tangkas marningot na silehonlehon ni Debata do haluaon i jala ingkon manghamauliatehon saluhutna i tu Debata (Rom 12:1-2). Molo taparrohahon lam tu moruna haporseaon ni halak Kristen laho marsilehonlehon tu huriaNa tarlumobi mangurupi angka na pogos. Sipata adong deba halak na mangeahon na pinasahatna i. Hape didok apostel Paulus: "Ganup ma nionjar ni rohana, unang ma sian muruk manang sian na so tarjua; ai dihaholongi Debata do na las roha mangalehon" (2 Korint 9:7). "Pasangap ma Jahowa marhite sian hamoraonmu dohot marhite sian patumonaan ni sandok pangomoanmu. Jadi marsipinjot ma angka sopom, jala sirnip tuak anggur angka pangilanganmu" (Poda 3:9-10). Malua do ganup na manjou Goar ni Tuhan, halak na manjou Goar ni Tuhan i ingkon di bagasan uhum dohot hasintongan, ai ndang sidohonon Goar ni Debata ianggo so ture dalanna (patik patoluhon i). Ala ni pasangap ma Debata marhite haluaon, ngolum dohot hamoraonmu, ai silehonlehon ni Debata do saluhutna i. Amen.