Pilippi 3 17-21

Minggu Reminiscere, 13 Maret 2022

SATIA MANGIHUTHON DEBATA

Epistel: Pilippi 3:17.21

Pdt. Maruhum Simangunsong, M.Th 

Jamita na mangolu dohot ngolu na gabe jamita ni sahalak par-Barita na uli mansai marpanghorhon do i di panghobasion laho pahinsathon ngolu partondion ni angka na umbege jamita. Tiruan na sintong mansai marpanghorhon situtu do i lumobi molo boi diida jala dihilala, songon pandohan di hata na asing na mandok "action speak louder than words", marlapatan, tuminggil do soara ni parniulaan sian angka hata na nidok. Apostel Paulus pasahat hata apo apona tu huria Pilippi paandarhon parniahapan, par sorionna sangkap na nang uli sipareahan ni angka na porsea, atik pe di angka tingki na salpu mansai tangkas do diboto ibana garang ni rohana siala pangaleleonna maradophon huria i, naung paruntungan hian do i di ibana alai gabe harugian do (3:6-8). Rosu do parsaoran nasida, jala patar do nang haburjuon ni Huria i manarihon na ringkot di Apostel i, songon hapataran ni holong ni roha ni Kristus Jesus na mangolu di bagasan nasida. Diparhatopot apostel i do, rante dohot parsorion na niadopan ni Apostel i gabe barita na uli do i tu na humaliangsa jala sada gogo di ibana laho mangondolhon parsihohoton dohot parsitutuon ni huria Pilippi manghaholongi dohot mangihuthon Jesus, naung andul ummarga jala ummuli sian angka arta rodi hasangapon na di tano on (1:13-14). Parjumpangan ni Apostel i dohot Tuhan i mambahen ngoluna muba jala mian di hatiuron.

Huria ni Tuhanta, borhat sian turpuk on adong ma manang piga na naeng putihanta, laho mangurupi hita mangantusi lomo ni roha ni Tuhan i marhite panjouonna tu hita.

Maniru Apostel (ay 17), ngolu na gabe tiruan. Mangalehon tiruan na arga nunga tarida sian parsorion dohot las ni roha ni Apostel i laho pasauthon sangkap panjouon na tu ibana. Na rade ibana manaon songon Kristus na marsitaonon i, jala ndang dietong harugian mangihuthon Kristus Jesus, baliksa sabalikna do. "Ai hurajumi sitaonon na dihasiangan on hira so adong do martimbanghon hasangapon sipapataron tu hita sogot (Rom 8: 18). Sada hata na mangondolhon asa huria Pilippi pe maniru Apostel i naung mangolu di bagasan parsihohoton mangoloi Kristus Jesus. Parjumpangan ni si Paulus di dalan tu Damaskus, dung dipapatar diriNa na mamillitsa gabe suruan dohot sitindangi (UI Ap 26:16). Disosohon Apostel i do asa rap sitiru ibana nasida ganup. Adong dope tahe di tingki on na tertarik tu angka na mangihuthon isara ni tokoh-tokoh na tarbarita di Bibelta i? Molo jolma na di tano on sai jotjot do manghasiholi tokoh-tokoh na tarbarita ala ni hamaloon/hapistaran, ala ni perjuangan, parsitutuon mangalo angka panusai, mangalo angka penindasan, dna. Torop do halak na tarbarita na mambahen pengaruh na mansai balga tu hamajuon ni torop jolma. Lumobi ma di tiruan na pinatupa ni Tuhanta Jesus na patuduhon holongNa na mansai arga i tu portibi on lumobi tu hajolmaon. Nang apostel Paulus pe. ndada dirina be na gabe pamusatan ni Barita na uli na pinasahatna, alai Jesus Kristus i do. Jesus Kristus na gabe pamusatan ni ngolu ni halak Kristen, jala naung mangalehon tiruan na arga, mangalehon diriNa, hosaNa laho papatarhon holong Na tu sandok manisia nang portibi on.

Di tongatonga ni hamaolon na tabolus taida ma holong na so muba sian Jesus Kristus Tuhan i.

Jamot ma maradophon angka na targoar musu ni silang ni Kristus. Nasa pangalaho na so mamboan hita mangolu di bagasan Kristus Jesus, angka na paholang hita sian Ibana, masuk do i tu horong musu ni silang i. Mansai tangkas do diantusi Apostel Paulus balga ni hamaolon na niadopan ni huria di tingki i, pangalaho na mura munggil sian na mangihuthon Kristus gabe mangalo jala gabe musu ni Kristus i. Huria na imbaru, unang mura mimbar, hatop muba panghaposion dohot haporseaon siala pangalaho na doras sian duru. Pangalaho ni jolma boi do muba, atik pe nunga sanga dihuthon ibana Kristus di ngoluna, molo ndang togu marurat haporseaonna, molo orientasi/panatapanna holan marnida na ringkot di ngolu síganup ari, dohot angka na di tano on. Boha do tutu nang hita songon halak siihuthon Kristus Jesus di partingkian nuaeng on? Digodang ni angka pangela, hamaolon, ro di hasusaan na manggugai rohanta, gabe sai hira na gumogo do angka hasusaan i manegai rohanta gabe lam dao rohanta laho manghaposi Jesus Kristus Tuhan Sipalua hita. Dimara bolon na so marnamontok, siala pandemi Covid-19, na mambahen torop sian angka na hinaholongan tibu borhat, songgot laho manadinghon hita, jala singgip, talpe ngolunta tu parmaraan, tagamon saluhutna i mambahen roha sai lulululu diholong ni roha ni Debata. Pangontak ni pandemi on tu nasa parngoluon siapari, boi manegai parsaoran, pansamotan, na mambahen muba saluhut parange ni hajolmaon. Songon i nang hamubaon ni pangalaho (sikap) laho patuduhon dohot papatarhon dirina songon ruas ni huria pe ingkon muba, ala ni angka aturan na mangihuthon protokol kesehatan, jaga jarak, hindari kerumunan, rajin cuci tangan, pakai masker, jaga imunitas, dna.

Ndada na olo salpu na di tano on sambulonta. Salpu do angka na di tano on, ala ni i unang ma holan na di tano on tahirim, holan angka na niida ni mata sambing, ndada holan upa na di tano on sambing na tapaima, alai andul dumenggan sian saluhut na di tano on (patudos Rom 8:24,25, Kol 3:2, 1 Kor 15:19,

Hamagoan do di ujung ni ngolu na mura mimbar jala manadinghon Kristus Jesus. Jea ni halak na mardebatahon butuhana, sihailahononna dihasangaphon angka na di tano on di parrohahon (ay 19). Pangantusion na pejet, na holan mamereng angka na tarida diida mata, kepentingan sesaat, arta, pangkat, dohot angka lan na mangela rohanta gabe manghalupahon na rumingkot, i ma mangalului arta na so olo metep na ro di saleleng ni lelengna. Ndada olat ni portibi on pardalanan ni angka na porsea alai torus ingkon sahat manjalo ngolu na manongtong.

Di banua ginjang do sambulonta, sian i do tapaimaima Sipangolu hita, Tuhan Jesus Kristus i (ay 20). Panghirimon ni angka na porsea, upa ni angka na marsihohot tu asi ni roha ni Jahowa di bagasan Kristus ngolu na saleleng ni lelengna. Di bagasan Kristus i do hita dipauba jala dipaimbaru. Huria na pinauba jala na pinaimbaru marhite hagogoonNa na sun denggan i (ay 21). Di doras ni parbinotoan, tekhnologi informasi na so boi tarambati, baliksa sude jolma marsigulut laho mamangke angka temuan-temuan, inovasi tekhnologi laho pahinsat ngoluna. So tung madabu hita tu pangantusion na pejet mardebatahon hapistaran ni jolma, mangasahon rasionalisasi berpikir sambing, mardebatahon tekhnologi na olo salpu i. Sangkap hatuaon na umumuli do diparade Tuhan i tu hita ganup marsadasada.

Ay 21 Paubaonna do dagingta na lea on, gabe doshon dagingna na sangap i, hombar tu hagogoonna i, ai tarpatunduksa do saluhutna tu Ibana. Mansai arga do ngolu pardagingon, silehonlehon ni Debata do molo dilehon gogo dohot hahipason ni pamatang nang ganjang ni umur. Rumang ni pardagingon martingki do, hinauli, gogo dohot togos ni pamatang na so manongtong. Alai nang pe ingkon salpu jala marujung ngolu pardagingon, sada na mansai arga sihirimonta i ma songon na nidok na di surat na tu huria Korint: "Ai ingkon hatongtongon do manoluk na olo busuk on, jala hangongolu na manongtong do manoluk na olo mate on" (1 Kor 15:53). On ma apulapul tu hita huriaNa, ala ingkon do mangadopi parsirangan sian angka aleale, sisolhot na hinaholongan ala hamatean. Rumang ni arta sihirimonta ndada holan na di tano on na niida ni mata sambing, alai dohot do manean haheheon sogot, hangoluan na manongtong i. Ala ni i, tahaposi ma sangkap ni Debata, sangkap panjouon na sahat tu hita ganup. Sangkap panjouon dohot pamilliton i sangkap hatuaon do i paluahon hita sian hamagoan, jala Ibana sambing do na mangalehon gogo dohot mamboan hita taripar sian angka hamaolon, parungkilon na marragam i. Asa molo ditodo jala dipillit pe hita gabe angka naposoNa, ulaulaNa di tano on, manahan ma diangka ujian, hamaolon, jala tongtong ma marsihohot, siala upa na uli jala na ummarga sipasahatonNa tu hita. Tapasiding ma pangalaho na mangula na holan marpamusatan tu upa sinamot, gaji, pagukguk arta dohot lan angka rumang na arga na di tano on sambing. Lomo ni roha ni Jahowa ma na jumpang di ngolunta, sangkapNa ma na saut dohot tapatulus di ganup inganan dohot partingkian. Amen.