Markus 6 6b-13

Bahan Sermon Jamita Minggu V Dung Trinitatis, 04 JULI 2021

Ev : Markus 6 : 6b – 13 

“BORHAT MA HO JALA BARITAHON MA HATA NI TUHAN I”

Marhite tema minggu disungguli do hita mangulahon panindangion, mamaritahon barita nauli tu sandok liat portibion. Ojahan i parsuruon i ima parenta ni Tuhan Jesus tu siseanNa andorang so manaek Ibana tu banua ginjang, na mandok: “Gabe sitindangiKu ma hamu di Jerusalem dohot di sandok Judea dohot di Samaria, sahat ro di ujung ni tano on UL Ap 1 : 8. Pandohan sitindangi di salin sian hata “martus” di hata Gorik lapatanna sahalak na marnida fakta kejadian. Di suru hita marsaksi, manghatahon hasintongan na taida jala tahaporsea i. Na niida dohot na pinarhatutu i mangonjar pamanganta manghatahonsa tu na asing. 

Manguduti pangajarion ni Jesus di huta hatubuanNa, di jou Tuhan Jesus siseanNa na 12 i, jala disuru mamaritahon barita nauli. Domu tu parsuruon i di pasahat tu sisean i strategi dohot pedoman sipatupaon ni sisean i mangulahon parsuruon i. Diorai sisean i mamboan hajut, roti, hepeng ro di hohos. Oraora i manuanton pos ni roha tu Jesus na marsuru nasida mangula ulaon i. Diorai nasida mamboan hajut, ala di tingki i somal do malim ni parbegu mamboan hajut inganan ni bohal di pardalanan, roti, dohot na asing. Hajut disalin sian hata Gorik “pera” lapatanna hajut papunguhon. Di tingki i di namardalani angka malim ni parbegu , dibahen do hajut nabinoanna i inganan ni pelean na pinapungu nasida tu dewa nasinombana. Alani gabe diehet ma nasida perampok saleh. Unang ma songoni sisean ni Jesus. Diorai nasida mamboan hajut asa pos roha nasida dipanarihonon ni Debata di na mangula ulaon marbarita nauli. Manghangoluhon panarihonon ni Debata, ido ojahan i panghobasion ni sisean i. Disuanhon di roha ni siseanNa, pos ni roha dipanarihon dohot pandonganion ni Tuhan i. Hasomalan ni jolma di Timur Tengah di tingki ni turpuk on, lambok, basar maradophon tamue. Molo sorang sahalak tu sada huta, kewajiban ni parhuta i do paradehon inganan di tamue halak na ro i. Alani ndang pola pingkiran ni sisean i taringot tu inganan nasida mamaritahon barita nauli. 

Ay 9, Alai denggan do marsipatu hamu. Marsipatu ima tanda ni haringgason mandalani. Ringgas lapatanna hiras, hinsa jala hobas. Molo so adong hinsa ni roha mangula siulaon, ro ma losok. Molo losok roha godang ma sidalian. Ala godang abatabat mamaritahon barita nauli i, diigil haringgason. Ringgas martangiang mangido gogo sian Tuhan i, ringgas mamangke tingki dohot silehonlehon napinasahat ni Tuhan i. Tanda ni haringgason pinarade roha, tingki, gogo mangula ulaon parsuruon i Tuhan i. Ringgas marsiajar, manjaha hata ni Debata

Dilehon Tuhan i do tu angka sisean huaso mamaritahon barita nauli. Ay 7, Disuru nasida duadua halak, boasa? Molo adong 2 halak saksi di sada parkaro sah ma panindangion i 5 Musa 17 : 6. Molo dua halak sisean i manghatindanghon barita nauli i, sah ma i jaloon ni na umbegesa. Alai na umbalga lapatan ni pandohan marduadua, asa boi masitungkolan, ai godang parungkilon siadopanna di ulaon i. Ala maol do ulaon i, ingkon masiurupan masitungkolan nasida. Ay 13, marhasil do sisean i mangulahon parsuruon i ala masiurupan jala masitungkolan nasida. Galatia 6 : 2 didok, Masiurupan ma hamu mamorsan na dokdok i, ai ido dalan mangaradoti patik ni Kristus. Ngolu na masiurupan ni do hataridaan ni haporseaon di Jesus. Marhite na marsiurupan boi hita marsihothot mangadopi sitaonon dohot parungkilon. 

Molo sorang sada halak tu sada huta, kewajiban ni parhuta i do paradehon inganan di tamue na sorang i. Alan i didok Tuhan Jesus, molo ditulak ndag ditangihon nasida, ingkon pirpirhononna orbuk ni huta i na lohot di pat ni sisean i ay 11. Mangihuthon rabbi ni Jahudi ramun do orbuk ni huta ni sipelebegu (kafir). Alani molo sorang halak sipelebegu di Palestina, ingkon jolo dipirpirhon orbuk na binoanna i asa diloas bongot tu huta ni halak Jahudi. Ido umbahen ndang marsaor halak Jahudi tu sipelebegu. Alani molo ditulak sisean i, ingkon rajuman ni sisean i ma na manulak nasida i songon pangarajumion ni halak Jahudi di halak sipelebegu. Molo ditulak nasida ima patuduhon na ditulak nasida hata ni Debata. 

Ay 12-13, dibaritahon na marparbue do ulaon ni sisean i. Torop sibolis dipabali nasida, torop na marsahit dipamalum. Jamita ni sisean i mandokhon paubahon roha. Dibaritahon sisean i Tuhan Jesus Mesias ni Debata na sinuru ni Debata. Lapatanna hasintongan ni hata ni Debata dibaritahon nasida. Dipaingot angka natinopot nasida asa paubahon roha jala manjanghon Jesus sipalua i. Nang hita disuru Jesus i mangarahon jolma asa paubahon rohana dohot mangarahon nasida manjalo ngolu na manongtong i. Hombar tuTema minggu ‘Borhat ma ho jala baritahon ma hata ni Tuhan i’. Amen.