1 Musa 15 1-6

 

Sermon Minggu Reminiscere, 13 Maret 2022

MARGURU TU LOMO NI ROHA NI DEBATA (1 Musa 15 : 1-6)

I. Patujolo

Ndang sala marpangidoan molo adong, nahinirim ni rohanta, boi do i pasahatonta tu manang ise natatanda isara ni sahalak ianakhon di tongatonga ni jabu, jotjot do pasahathon pangidoanna tu natorasna, jala hak do i songon ianakhon. Nda tung tu halak an ibana mangido pangidoanna i tontu tu natorasna sandiri do. Alai naeng do botoon ni dakdanak i paboa saguru di natoras i do pangidoanna i. Dioloi manang ndang. Ndang boi paksaonna natoras i asa dilehon pangidoan i. Alai nuaeng on, nunga gumodang anakhon mamaksa natorasna asa dioloi pangidoanna. On do na jotjot masa di ngolu ni keluarga, ala so dioloi natorasna pangidonna i ujungna mardandi ma ibana, ndang olo mangan manang ndang olo lao marsikola dohot angka sidalian na asing ala so dioloi pangidoanna i. Ujungna gabe marbada ma ama dohot ina ala ni pangidoan ni dakdanak i. Ro amanta i, “lean ma pangidoanna i daripada mardandi annon anakta i” ninna tu inanta i. Ro inanta i, "ndang gabe ibana mangatur natuatua, ingkon saguru hita do natuatua mangoloi pangidoan i"

Sada tudosan do on laho mangantusi jamitanta sadari on. Ima taringot tu naung leleng diparsinta si Abraham parianakhonon sian Debata. Alai dung pe di hatutuana asa dilehon Debata i tu ibana pangidoanna i.

II.Hatorangan 

Ganjang do barita ni si Abraham ditaringoti di buku nabadia i, ndada holan di padan narobi alai dohot do nang di padan naimbaru. Ndada holan parbungkasna sian tano hagodanganna alai dohot do angka naung hea binolusna. Sude angka namasa tu si Abraham paingothon hita do i di hasatiaon ni Dabata tu jolma. Jala gabe parsiajaran di ngolu ni parhuriaonta dohot parsaoranta dohot Debata. Sian ima tarida paboa sude angka nataparsinta dohot na tahirim ingkon saguru tu lomo ni roha ni Debata. Disi ma hinasintong ni bagabaga ni Debata tu si Abraham. Tongtong do Debata marningot di angka naung hea nidokna tu si Abraham uju dijou Debata ibana bungkas sian tano hagodanganna (1 Musa 12:1-9). Ndada songon jolma Debata na so marningot janjina manang hata nanidokna. Sada sian barita ni si Abraham ima bagabaga ni Debata tu si Abraham, ima gabe bangso na bolon do ibana ima marhite sian anak natinubuhonna muse, ima si Ishak. Maralus do pangidaon, tangiang, pangidoan ni si Abraham tu Debata asa dilehon Debata di ibana ianakhon.

Parjolo, laho pasauthon bagabaga i ma nueng ro Debata marhite alatan tu si Abraham, na mandok: "Unang ho mabiar ale Abram, Ahu do lombulombu, upam mansai balga. Hira na diboto si Abraham do aha nanidok ni alatan na ro tu ibana i, ima taringot tu naung leleng dipaima ibana, ima ianakhon.

Paduahon, ninna si Abraham ma mandok Debata: “Oe ale Tuhan Jahowa, aha ma lehononMu di ahu? Sai na punu do ahu, si Elieser na sian Damaskus na ma sitean bagashu." Ndang hinata so dohonon ni si Abraham songon i tu Debata, marningot di hatuatuaonna. Ndang mungkin be di rohana. Hape anggo di Debata na boi do tarpatupa Ibana di luar ni pingkiran ni jolma. Alai dialusi Debata ma ibana: "Ndang ibana tumean ho (Elieser naposona i), na ruar sian butuham, ibana do (Isak) tumean ho".

Patoluhon, dipapos Debata ma roha ni si Abraham dinanidok ni Debata tu Ibana: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: songon i ma pinomparmu sogot.” Dungi pe asa pos roha ni si Abraham ala nunga langsung Debata paposhon rohana. Tutu maralus do pangidoan ni si Abraham i di pudian ni ari. Gabe dilehon Debata ma tu ibana anak ima si Isak gabe panean di pudian ni ari. Jumpang do nahinirim ni roha ni si Abraham. Gabe di bagabagahon Debata do tu ibana ianakhon haholonganna. Komunikasi na denggan tongtong dibahen si Abraham maradophon Debata di sude pardalanan ni ngoluna huhut mangadopi angka namasai. Nian anggo di roha ni si Abraham ndang tagam be rohana dapotan parianakhonon. Alai disima sangkap dohot lomo ni roha ni Debata. Mangolu di bagasan panghirimon dohot haporseaon na marsitutu tu Debata.

Dibagasan haporseaon na songon i nanaeng jumpang di halak Kristen di partingkian sinuaeng. Olo marsomba tu Debata satia i, narholong roha jala pardenggan basa i. Pasahaton ni Debata ma tu hita na tapangido i molo jmpang tongtong haporseaon. Alai tong ma ingotonta tung saguru di lomo ni roha ni Debata do sude pangidoanta. Ala ni ingkon mangolu di bagasan hasabaron do hita tongtong paimahonsa. Ndang tarbatas Debata tu partingkian ni jolma. Manang sadihari pe dibuhul Debata pasahathon pangidoanta i tung saguru di Ibana do sude. Ido umbahen ingkon sabar do hita na mangolu on. Unang hatophatop ganggu rohanta. Asa boi manongtong marlas ni roha.

III. Sipahusorhusorhon

Alai nang pe songon i dipangido Debata tong saguru di Debata nasa napinangidoanta. Sude nasa tahirim dohot na tasangkapi i tung saguru di Debata do. Manang boha pe tabahen gogonta dohot huasonta, ndang tuk i laho pasauthon natasangkapi i. Ido joujou ni turpuk jamita sadari on tu hita. Alai hamu angka dongan taringot tu anga pangidoanta i, molo so pintor jumpang hita natasangkapi dison do hita dipangido asa tongtong sabar. Ai hasabaron i do sada sinjata laho patoguhon haporseaonta tu Debata. Isara ni angka napaimahon si rongkap ni tondina pe ingkon sabar.

Ndang hasigatan asi ni roha ni Debata. On ma panindangion ni angka naporsea i. Ndang hasuhatan angka bogasna. Tutu ma hata ni Debata na pinasahat ni Panurirang Jesaya tu bangso Israel uju tarbuang nasida di huta Babel: “Ai ndada pingkiranHu pingkiranmuna i, jala ndada dalanmuna angka dalan Hu” (Jes 55:8). Laos ido nanidok ni Apostel Paulus manghatindanghon hagogoon ni Debata laho paposhon roha ni huria Rom di pambahenan ni Debata: "Bagasna i antong hamoraon, hapistaran dohot parbinotoan ni Debata! Na so hasigatan do angka uhumNa jala na so habogasan do angka dalaNa" (Rom 11:33). Antong tapasahat ma ngolunta tu Debata asa ibana na tongtong mangaramoti hita ganup pardalanan ni ngolunta dohot di angka ragam ni anga pangidoanta. Sandok marpos ni roha tu Debata parasiroha jala padenggan basa i. Ido kunci ni ngolunta di portibion. Amen.

Cal.Pdt. Frido Nainggolan