Jesaya 7 10-16

Minggu Advent IV, 19 Desember 2021

EV : Jesaya 7:10-16

Topik : IMMANUEL : DONGANTA MA DEBATA

1. Patujolo

Tung jotjot do hita jolma mangasahon gogo ni pingkiranta lao pasidunghon sada parsoalan di tongatonga ni ngolunta nang pe nunga tangkas naso tolapta be mamingkiri i. Jala molo ro pe donganta laho mangurupi hita, ndang olo hita diurupi, ala naung tapangke hďalihalinta jumolo manjongkali haboion ni donganta i. Pesimis mangadopi parsoalan, sai hira naso adong be na boi mangurupi, mabiar jala martabuni nama.

Songoni ma na masa di parngoluon ni si Ahas, raja ni Juda dihatiha so masa dope habuangan Babel. Bonsa jala lomos do si Ahas dung ro musu nasida si Resin raja ni Aram dohot si Peka raja sian Israel laho marmusu dompak nasida. Mabiar jala bukbak ma nasida mamingkiri i songon hau di tombak na humutur binahen ni alogo (7:1-2). Di tingki i ma ro Panurirang Jesaya hombar tu parsuruon ni Jahowa laho paingothon jala patoguhon si Ahas.

Diboto jala ditanda Jahowa do si Ahas na naung ganggu roha dohot pingkiranna alani na masa i, gabe pola dipasahat kesempatan tu si Ahas laho mangido tanda sian Jahowa asa tung tangkas diboto si Ahas hagogoon ni Jahowa. Ulaon ni si Jesaya paingothon si Ahas asa tongtong porsea tu Debata Jahowa sambing, jala asa unang dipangasahon huaso dohot gogo ni bangso Assur na naeng mangurupi nasida mangadopi si Resin dohot si Peka. Ai nunga mangido pangurupion tu bangso Assur si Ahas hatiha i.

2. Hatorangan ni Turpuk

Ayat 10-12 - Si Ahas dipanghulingi Jahowa marhite panurirang Jesaya di ganggu ni rohana mangadopi musu nasida. Dipasahat panurirang Jesaya do asa dipangido ibana sada tanda sian Jahowa Debata. Tanda sian banua toru manang sian banua ginjang sahali pe taho. Tanda i laho pahothon haporseaon ni raja Ahas di na mangadopi musu ni bangso na ginomgomanna ima Juda. Tanda na patangkashon na holan Debata na tuk gabe pangalualuan di biar dohot ganggu ni roha. Alai nang pe nunga dihatahon panurirang Jesaya hata ni Jahowa i, ditulak si Ahas do i, di na didok na naso unjunanna Jahowa. Ndada na denggan haputusan ni si Ahas i, ala ndang na diharingkothon ibana be tanda huaso ni Jahowa i.

Ditulak si Ahas hata ni panurirang Jesaya i na patuduhon naso olo ibana marsigantung tu gogo ni Jahowa laho mangadopi parporangan i. Umporseaan ibana di gogo ni bangso na niidana ima bangso Assur, na tergolong bolon jala marhuaso hatiha i. Dipasahat si Ahas do haoloon dohot haunduhonna tu gomgoman ni Assur. Di 2 Raja 16:10-18 tangkas boi tajaha na dipaolooloi si Ahas do pambahenan ni raja Assur i, pola sahat tu na mambahen langgatan pamelean, na gabe inganan parsombaonna. Ndang be dihaporseai si Ahas Debata Jahowa na sun gogo nampuna bangso i. Nunga dililuhon hagogoon ni portibi ibana. Pikkiranna nama na gabe donganna mamutushon parsoalan i. Pola gabe marsaor ibana tu hagolapon manomba sumansuman ala na pos rohana disi.

Ayat 13-16  -  Dung ditulak si Ahas hata ni panurirang Jesaya i, gabe dipasahat ibana ma lumbalumba paruhuman na naeng manghonai nasida sian Jahowa. Uhum sijaloon nasida di hurang ni haporseaon ni si Ahas i. Lumbalumba paruhuman i laos paingothon nasida bahwasana Jahowa sandiri nama na mangalehon tanda tu nasida. Tanda i na gabe bukti na Jahowa parhuaso bolon i tuk patupahon angka na so hea tupa di portibion gabe tupa.

Molo pe ndang olo si Ahas mangido pandonganion ni Jahowa, Jahowa sandiri na ma na patupahon pandonganion I tu nasida. Marhite sahalak namarbaju na tumubuhon sada anak. Anak i ma na gabe sipatupa hamonangan tu nasida. Alai ndang magira dope masa i, Alana di ayat 16 tangkas didok jolo tarulang ma tano i. Na mandok, jolo masa ma sitaonon tu bangso i na mambahen gabe tarulang tano nasida, asa pe diboto anak i mamillit na denggan.

Lumbalumba haluaon di pandonganion ni Jahowa i dang hadodoan dope sadiharina, alai tangkas ma marhitehon i dipasahat na rade do Jahowa mandongani nasida, bangso na niasianNa i. Immanuel, ima na gabe goar ni dakdanak i. Goar i marlapatan Jahowa ma donganta. Goaron boi do on palumbahon haroro ni sada raja na manggomgomi bangso Juda dibagasan hadengganon na mamboan haluaon. Alai laos martudutudu do i tu haroro ni Jesus na gabe Sipalua ni ganup jolma na di portibion.

3. Sipahusor husoron.

Di masa ni minggu Advent on, di naung masuk hita tu Advent na paopathon, sahat ma nang lumbalumba on tu hita. Palumbahon haluaon na manontong na sian Jahowa tu angka jolma na olo jala rade manjalo pandonganion ni Jahowa. Na sai unduk marsomba jala marpos ni roha tu Ibana sitompa nasa na adong.

Godang do angka sitaonon na taadopi di ngolunta sinuaeng on. Di na mamolus taon 2021 on hita, nunga songon dia ganggu ni rohanta nasailaon! Tu ise do hita marpos ni roha jala manjalo pangurupion? Di tingki masa angka hamaolon tontu olo do sipahata hita laho ro tu Debata. Alai marhite turpuk on diajar ma hita tung mansai balga do holong ni roha ni Debata, songon si Ahas na dianju Debata laho mangido tanda tu Ibana alai alani jungkat ni rohana jala umpos rohana tu bangso Asyur, gabe maol ibana mangantusi holong ni roha ni Debata. Taingot ma patik I dohot lapatanna, jala taing9t ma Mateus 7:7 i 0angid9 ma sai lehononNa do. Tamakmai jala.taparade ma tongtong roha dohot pingkiranta laho manomunomu ari hatutubu ni Tuhan Jesus Kristus, Sipalua i. Selamat Advent jala selamat manomunomu ari hatutubu ni Tuhanta Jesus Kristus, Sipaluanta i. Amen.