Lukas 13 1-9

SERMON HKBP RESSORT NAULI DANOHORBO; MINGGU OKULI, 20 MARET 2022

TOPIK: MARHAMUBAON NI ROHA ASA UNANG MAGO

(BERTOBAT SUPAYA TIDAK BINASA) (EV: LUKAS 13:1-9)

PATUJOLO

Mansai jotjot do tatangihon pandohan na mandok: Sude do jolma mardosa di portibion, ndang adong na singkop di portibion. Tutu ma pandohan i paboa sude do jolma mardosa mamungka dosa ni jolma na parjolo na tinompa ni Debata, ima si Adam dohot si Hawa. Aha do lapatan ni dosa? Dosa ima pangalaho, pingkiran nang hata na maralo manang na so unduk tu hata dohot patik ni Debata. Jala hombar tu haporseaonta, mamungka sorang jolma tu portibion nunga mardosa. Ima na nidokna Dosa warisan/dosa keturunan (konfessi Pasal 6, hlm.59-60). Alai marpamuati do Debata, jala sai ungkap do Ibana manjangkon angka pardosa i, asa jaloonna haluaon na sian Debata marhitehite Jesus Kristus.

HATORANGAN

Adong do sada hasomalan umum di halak Jahudi ujui, na menghubungkan penderitaan dohot dosa. Molo pogos sasahalak sian hatutubuna sahat tu hamamatena, olo do didok alani dosana do i. Molo marsahit sasahalak jala mansai leleng situtu ndang marnamalum, didok do alani dosana do i (pat.Job 4:7; 22:4-10). Molo sorang sasahalak di bagasan tihas (difabel/cacat fisik), didok do alani dosa ni natorasna do i (pat.Joh.9:2). Jala molo adong jolma na mate secara ndang wajar manang mengerikan didok do i alani dosana. Jala pingkiran sisongon on ma na tarida marhitehite pangalaho ni halak Jahudi di bagasan turpuk jamita on. 

Di sada tingki, adong ma sian halak Jahudi na ro tu Jesus jala paboahon taringot tu angka halak Galilea na didurushon si Latus mudarnasida gabe saor tu na pinelehonnasida. Sasintongna aha do na masa? Hea do di sada tingki dibunu si Latus halak Samaria na maporus tu dolok Gerisim, ima inganan parsombaon ni halak Samaria. Alai di bagasan turpuk on, halak Galilea na binunu ni si Latus ima siihuthon kelompk Judas Gaulonita manang didok Judas halak Galilea (pat.Ulaon ni apostel 5:37) ima na so mengakui huaso ni kesar dohot na manulak manggarar upeti/pajak tu kesar. Angka halak Galilea on ma na didurushon si Latus mudarnasida gabe saor tu na pinelehonnasida. Boasa pola dipabotohon nasida barita taringot tu halak Galilea naung binunu ni si Latus i? Ndada holan pasahathon barita sambing nasida disi, alai adong do tujuan ima asa diboto jala ditanda halak songon dia pangulaon dohot huaso ni si Latus, asa diorom Jesus borhat tu bagas joro nang tu parguruan laho pararathon barita nauli. Alai marhitehite alus ni Jesus di bagasan turpuk on, diboto Jesus do tujuan ni na pabotohon i ima laho patuduhon paboa halak Galilea na mate secara tragis i patuduhon pardosaonnasida songon pemahaman na somal di halak Jahudi hatiha i. Na ingkon mate do parjahat i ala ni dosana, jala dijalo angka pardosa ido upa na hombar tu pangalahona. Marhitehite alus ni Jesus di bagasan turpuk on, pabotohon tu hita:

Saluhut do jolma mardosa (ay.1-2)

Tahatindanghon do paboa saluhutna do jolma mardosa. Tongon do di bagasan hajahaton do ahu tubu (Psalmen 51:7. Alai ala holong ni roha ni Debata na balga i, marpamuati do Debata mida hita jolma pardosa on. Jadi, saluhutna do jolma mardosa. Alai sahit, hamatean, tihas, hasusaan dohot na suman tusi ndada dipasahat Debata tu jolma i songon uhuman ni dosana. Molo marsahit pe jolma, jumpang hasusaaan dohot angka habot ni roha di parngoluonna siganup ari, boi do dipaloas Debata masa angka i dalan patanghon haporseaon ni jolma manisia, ndada asa mago jolma i, alai asa marhamubaon ni roha do. Ndang jadi jolma i patimbohon dirina sian donganna, manghilala dumenggan pangalahona sian pangalaho ni donganna jolma. Molo masa sisongon i digoari ma i kesombongan rohani. Taingot ma sada umpama na binahen ni Jesus taringot tu sahalak Parise dohot sijalo beo pardosa i. Di na rap martangiang nasida nadua di bagas joro, halak Parise martangiang songon on, dipadirgak ma jongjong huhut didok: Mauliate ma ah utu Ho, ale Debata ala so dos ahu dohot halak na leban, angka panamun, pargeduk, pangalangkup manang sijalo beo an. Alai ianggo sijalo beo na gok dosa i, mandaodao do ibana jala ndang barani manaili dompak ginjang. Martangiang do ibana huhut ditompuk andorana mandok: Asi rohaM, ale Debata di ahu pardosa on! Jadi sasintongna saluhut do jolma mardosa di bagasan ngoluna.

Dijouhon Tuhan ido asa marhamubaon ni roha angka pardosa i (ay.3-5)

Diboto Jesus do na di roha ni halak Jahudi na pasahathon barita na masa i tu ibana. Diboto Jesus do marhitehite barita i naeng dohononnasida tu Ibana jorbut ni panghorhon ni dosa, sahat tu na ingkon mate posi diae halak Galilea i dibaen si Latus. Alai dialusi Jesus do pandohannasida i: Anggo so muba rohamuna, laos songon ido hamu mago muse (Luk.3:3). Angka halak na so olo marhamubaon ni roha tu hamagoan do jambarna. Alai halak na olo marhamubaon ni roha tu hangoluan do jambarna. Sai dipaima Debata do hamubaon ni roha angka pardosa i. Songon sintong na mangolu ahu, ninna Tuhan Jahowa tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadinghon dalanna i, asa mangolu ibana (Hes.33:11).

Dilehon Tuhan ido tingki parasian tu saluhut jolma pardosa (ay.6-8)

Dipasahat Jesus do sada umpama di bagasan turpuk on, ima taringot tu hau ara na sinuan di porlak anggur. Hau ara ima sada hau na denggan, disuan asa boi do haunai gabe parlinggoman ni jolma, jala tarsar do na boi parbuena panganon ni jolma. Hape di bagasan turpuk on, ro ma nampunasa porlak i mangalului parbuena, alai ndang adong jumpang parbue ni hau i. Gabe didok ma tu siula porlak i asa ditaba hau i ala nunga tolu taon lelengna nampunasa porlak i mangalului parbue ni hau i laos ndang jumpang. Alai na mangelek ma siula porlak i tu tuanna nampunasa porlak i asa loasonna tubu dope sataon nari hau i. Berusaha do siula porlak i mamangkur humaliang bona ni hau i laos mamupuk, ala manghirim dope ibana boi marparbue hau i di bagasan sataon nari. Jadi diloas nampunasa porlak ima. Umpama on marlapatan; Dilehon Debata do hape tingki parasian tu hita jolma pardosa, asa marhamubaon ni roha, tubu jala tang di bagasan haporseaon di Jesus i. Tingki parasian ima tingki laho marhamubaon ni roha, dipaima Debata dope hita marhamubaon dohot marparbuehon na denggan di bagasan ngolunta di portibion.

Tabaonna do saluhut hau na so marparbue, songon jolma na so olo marhamubaon ni roha (ay.9)

Dung salpu tingki parasian na pinasahat ni Debata, molo ndang adong hamubaon ni roha di jolma pardosa i, tabaonna ma dung i sampakhononna ma tu api asa ditutung, ai so marguna be hau i molo so adong marparbue. Jadi, tarjou do halak Kristen mangolu, mangula jala marparbue na denggan di tingkina. Tarjou do nang halak Kristen laho marhamubaon ni roha asa unang mago, alai asa mangolu jala manjangkon asi ni roha dohot denggan basa ni Debata di bagasan ngoluna. Amen.

Pdt.Reni Nainggolan, S.Th