Sepania 3 14-20

 

Bahan Sermon Evangelium Minggu Advent III, 12 Desember 2021

HKBP Ressort Panai Hillir

MARLAS NI ROHA MA, DI TONGATONGA TA DO DEBATA

 (Sepania 3:14-20)

Patujolo  

Baga-baga ni Debata do turpuk on tu ganub halak na prosea, jala di bagasan turpuk on ma tarida songon dia holong ni roha ni Debata tu hita ganub jolma na porsea di portibion. Nang pe jotjot jolma i mangulahon dosa jala manimbil sian dalan ni Debata, alai tongtong do Debata mandongani jala  manghaholongi hita jolma na porsea di Ibana. Hot ro di saleleng ni leleng na do asi dohot holong ni roha ni Debata tu hita halak na porsea. Suang songoni na diulahon halak Juda (Bangso Israel) dibagasan turpuk on. Bangso na tangkang do nasida jala na so marhabiaran tu Debata dohot marsomba tu debata sileban (ganaganaan). Dipasahat Debata do lumbalumba tu bangso i marhite si Josia na gabe raja ni bangso Juda uju i dohot naposona si Sepania, asa marhamubaon ni roha bangso i, marhite mulak marsomba jala marhabiaran tu Debata. Alai dang di olo i bangso i, jala tungki do nasida, ndang dipardulihon nasida parenta ni raja Josia dohot lumbalumba na pinasahat ni panurirang Sepania. Alani i, gabe hona uhum Debata ma bangso i tu bagasan habuangan di Babel. Alai nang pe songon i, sai marpamuati do roha ni Debata laho manghaholongi bangso i. Dilehon Debata ma muse, tinggki na mangihut asa marhamubaon roha nasida dungkon mandalani uhuman i (paulihon parsaoran nasida tu Debata), jala ido na gabe ojahan ni turpuk jamita Sepania 3:14-20 on, ima taringot asi dohot holong ni roha ni Debata tu bangso Juda na tangkang i, nang pe dohot tu hita jolma na porsea di portibion. Aha ma I ? tabereng ma marhite hatorangan turpuk jamita on.    

Hatorangan

Sian Debata do haroroan ni haimbaruon I (inisiatif Allah)

Molo ta jaha sian ayat 9-12, tangkas ma ta bereng haimbaruon i sian Debata sandiri do harorona, ndang sian bangso i. Alani i, dibuka ayat 14 on ma pandohan “Mariaia ma ho ale boru Sion”. Lapatanna, Sion ima gombaran parmianan ni Debata, jala boru Sion i ma bangso ni Debata. Disuarahon do asa mariaia bangso ni Debata, ala songgop haluaon sian Debata. Salpu ma uhuman i sian nasida (mulak sian habuangan Babel), jala paulionNa ma Jerusalem. Debata sandiri do na patupahon i (inisiatif Allah), Debata pargogo na so hatudosan i, Debata parasi roha jala parholong roha i. Ndang diripashonNa bangso i (PamateonNa), alai sai mulak do roha ni Debata laho paulion bangso i. Ido pambahenan ni Debata na jotjot tarida di bagasan holong ni rohaNa. Paubahon na buruk gabe imbaru, dipadenggan do naung segai ndang gabe diambolongkon buti. Suang Songoni ma tong dihita halak na porsea sisonari on, nang pe godang dosa ta, jala jotjot hita manimbil sian dalan ni Debata, alai ndang dipasombu Debata hita na niasianNa i, hot do asi dohot holong ni roha ni Debata tu hita jolma na porsea di portibion, nang pe di bagasan sitaonon manang haporsuhon hita. Alani i, nda ingkon mariaia ma jala marolopolop hita jolma di portibion di pambahenan ni Debata i ?

Dilehon haimbaruon ni tu bangso Israel

Debata sandiri do na patupahon haluaon i tu bangso na tangkang i, alai ndang jumpang bangso i haluaon ni, molo so olo nasida manjangkon haluaon ni marhite marhamubaon ni roha manang mulak marsihohot marsomba tu Debata. Songon na tarsurat di ayat 15-17 i, diunsat Debata uhum, disiaphon musum, jala di tongatonga do Debata. Lapatanna, ro pe uhum jala adong musu ni bangso i, alai molo Debata hot do mandongani nasida. Nang pe bangso na takang nasida na dipinabali Debata, alai tongtong do Debata ditonga-tonga nasida laho marporang maralohon angka bangso na asing. Alani I di dok, “Unang ho mabiar ale Sion ! Unang palenduk tanganmu !”, Ai Jahowa Debatam do di tonga-tongami, ulubalang mangalehon tua do Ibana (Ay. 17). Di son ma taida, na dipaimbaru ni Debata, ima angka naung dibolongkon i do, jala tanda ni halak na manjangkon haluaon ni, tarida ma sian ngolu na marhamubaon ni roha mulak marsihohot marsomba tu Debata. Sasintong na dang suman (layak) be bangso i laho manjalo haluaon i, alai holan ala asi ni roha Debata do umbahen na dipauli Debata bangso i. 

Arsak ni roha gabe Las ni roha.

Sian Debata do haluaon ni. Ndada holan haulaon na dilehon tu bangso i, alai huhut do nang dipauli bangso I (pemulihan) mulak tu huta Jerusalem. Dilehon Debata muse hasonangan (jaminan) di na manginani huta Jerusalem i nasida. Lapatanna, na sian panguhuman hian bangso i, alai di lehon Debata tinggki tu nasida laho marhamubahon roha jala dipaimbaru Debata ma nasida. Sian arsak ni roha hian, gabe las ni roha ma na gabe jaminan na dilehon Debata tu bangso i, molo marhamubaon ni roha nasia. Suang songon i tu hita halak na porsea sonari on, dipalua Debata do hita marhote Kristus Jesus, jala dilehon do tu hita hangoluan na saleleng ni leleng na. Nuaeng songon lumbalumba na si Sepania tu bangso i, pilit ma na naeng sipatupahon ta, hamagoan do manang hangoluan ni do siulahonon ta ? Gari songon i na maol na masa tu bangso i, tarbahen Debata do paluahon nasida. Lam ma tu hita di partingkian sinuaengon, molo porsea hita di Debata, tarpaluaNa do hita sian angka ragam ni hamaolon na taadopi. Ai Debata si paluai do Kristus Jesus na ro tu portibion. PaluaonNa ma hita angka na olo paubahon roha na jala  manjangkon paimbaruhon na sian Debata dibagasan parngoluon ta. 

Sipahusor-husoronta

Tongon parmingguon ta sadarion, masuk ma hita tu Minggu Advent III. Somalna, digoari ma Minggu Adven III on, Minggu marlas ni roha. Marhite i, dibagasan turpuk jamita ta on pe, disoarahon do tu hita asa marlas ni roha, ala dilehon Debata tu hita tingki laho marhamubahon ni roha, tinggki asa marhaimbaruon ngolu ta. Nunga tung lea hita diadopan ni Debata, alai hinorhon asi dohot holong ni rohaNa, adong ma panghirimon di hita na so ambolongkonon ni Debata hita sian adopanNa, gariada rade do Depaba sandiri laho paulihon hita angka naung sega i. Paulihon hita jolma pardosa na lea on, asa gabe marlas ni roha hita. Jala ido na tatagam jala tahirim di Minggu Adven III on, ima di masa penantian haroro ni Sipaula I, haroro ni Debata na naeng paluahon portibion sian saluhut dosa dohot mangalehon hangoluan na saleleng ni leleng na di angka halak porsea i di portibion. Alani do, disoarahon turpuk on tu hita asa marlas ni roha, mariaia jala marolopolop hita. Ala mian do Debata tu tongatonga ta, Debata parholong roha i, na sai marpamuati i, jala pargogo na so hatudosan i. Na so mansohot do asi dohot holong ni rohaNa tu hita jolma na porsea di Ibana. Alani I, ta jangkong ma haluaon na sian Debata, jala “Marlas Ni Roha Ma Hita, ala Di tongatonga ta do Debata”. Amen.