Lukas 2 1-7

BAHAN SERMON HKBP DISTRIK I TABAGSEL-SUMBAR

PESTA NATAL I, Sabtu Tanggal, 25 Des’ 2021, Ev. Lukas 2 : 1 - 7

Topik:   “JESUS SIPALUA PORTIBI ON” (Yesus Juru Selamat Dunia)

I. Patujolo

Haroro ni Mesias na pinaimaima ni halak Jahudi i ma sian sada tanda, na gabegabean sian sada na marbaju, jala bahenonna goarna: Immanuel (pat. Jes. 7:14; Mat. 1 : 23). Sian sada keluarga ni si Daud, ruar sada tunas sian tungko ni si Isai (pat. Jes. 11:1). Jala tubu di Betlehem Eprata, huta na metmet (pat. Mika 5:1). I ma hata panurirangon na di Padan Na Robi, jala i do na dibaritahon (digenapi) di turpuk Lukas bindu 2 on. Hatutubu ni Tuhan Jesus marasing do sian hasomalan na masa. Ala, hatutubu ni Tuhan Jesus Sipaluai, i ma laho pasauthon sude naung dibagabagahon, jala ingkon saut do i. Ai tubu Sipalua i, laho mamboan pardamean ni jolma tu Debata dohot manesa dosa ni portibi on. Naeng dohononna i ma, haluaon na ni lehon ni Debata tu bangso Jahudi marhite Tuhan Jesus, gabe haluaon ni sandok portibi on do i. Dibaritahon do Debata naung tutu patuduhon jala papatarhon holongNa dohot denggan basaNa tu portibi on marhite na marsuru Jesus Kristus Sipalua portibi on. Bulus do dibaritahon si Lukas taringot tu hatutubu ni Tuhan Jesus di turpuk on.

II. Hatorangan ni Turpuk

Andorang so tasigati turpuk on, porlu do botoonta, ise do si Josep? Mangihuthon profesina, sahalak tukang hau do ibana, jolma na biasa, na so adong bercampur tu hubungan sexual (pat. Mat. 1 : 18). Parroha na ias jala na bonar, parhaporseaon dohot partondi na girgir manangihon soara ni Debata (pat. Mat. 1 : 20; 2 : 13). Parunduk ni roha maradophon Debata, dohot pangoloi do ibana hata ni surusuruan i (Mat. 1 : 24).

Ise do si Maria? I ma sisolhot ni si Elizabeth, sian suku Levi, pomparan ni raja Daud marhite inana na sian Betlehem. Natorasna si Joakhim sian Nazareth dohot Anna sian Betlehem. Marpariban dohot si Salome, isteri ni si Zebedeus, ina ni si Jakobus dohot Johannes. Si Maria i ma sahalak na ias roha, jala boruboru parhaporseaon. Jadi, lomo ma roha ni Debata di ibana, ala partondi, parunduk ni roha dohot na ringgas marhobas dohot mamuji Tuhan.

1) Di ay. 1-3. ‘Hatutubu ni Tuhan Jesus i ma Barita Haluaon na dihubungkon tu sejarah ni portibi on’. Asa ndada holan tu sejarah ni halak Jahudi i, ala uju i digomgomi pamarenta Rom do halak Israel, alai ndang adong kebebasan di nasida. Ndang adong ‘kebebasan beragama’, so holan persetujuan ni Kesar. Herodes ma songon Raja hatiha i na diktator di wilayah Yerusalem, na solhot tu Kesar Agustus (Goar aslina: Gaius Julius Caesar Octavianus. Nama gelar ‘Agustus’ adalah nama yang diberikan sebab dialah kaisar yang besar memerintah di kerajaan Romawi). Raja Herodes, sahalak na kejam do i na mamarenta ‘pembunuhan’ posoposo na marumur 2 taon tu toru (pat. Mat. 2 : 16-18). Di zaman on Kesar Agustus ma na manggomgomi sandok ‘liat portibi on’ (ay. 1 ‘portibi na niinganan ni saluhut jolma’). Ido umbahen ‘dipasangap’ Kesar songon “debata” (dewa), jala dianggap songon ‘sipalua portibi on’. Asa dipaadophon (diperhadapkan) si Lukas do Kesar Agustus tu JESUS. Na naeng dohononna i ma, di tingki panggomgomion ni Kesar Agustus na sangap i, tubu do sipalua na tutu situtu. Asa dipangke Debata do Kesar Agustus mamarentahon angka jolma laho pasurathon dirina tu bona ni pinasana/ tano hatubuanna (ay. 3). Antong tarida ma sian turpuk on: 1) Tung rampak do dipaadophon Kesar Agustus dohot Jesus, paboa “Sipalua portibi on” i ma Jesus na laho tubu i, ndada Kesar Agustus. 2) Dipangke Debata do Kesar Agustus gabe ulaula ni tanganNa, naeng pabotohononna taringot tu Jesus na ro paluahon portibi on (Juruselamat dunia), IBANA ma na sasintongna, jala harajaonNa i mangatasi nasa harajaon dohot negara na adong di portibi on, ala hot do harajaonNa i ro di salelenglelengna (pat. Ps. 2 : 7, 10; Ulaon 17 : 7 ‘sude nasida mangalo patik ni Kesar; ai didok do, adong raja na asing, i ma JESUS i’). 

2) Di ay. 4-5 “Josep na sian pomparan ni si Daud, pasurathon dirina rap dohot si Maria, oroanna i (tunangannya)”. Tung warga negara na burju jala na unduk do si Josep (pat. Mat. 1 : 19 ‘ala parroha na bonar si Josep’). Na pasti, ganup na pasurathon dirina molo naung marhajabuan, ingkon mangihut do tunggane boruna tu sinondukna asa masuk disurat. Dihilala panurat Lukas on do, asa ringkot do patorangkon sikap ni halak Kristen tu pamarenta, asa unduk dibagasan roha na tangkas (sikap kritis dan keinsafan), paboa haunduhon i adong do batasna (pat. Ul. 5 : 29 ‘ingkon oloan do iba di Debata asa di jolma’). Borhat si Josep sian Galilea, sian Nasaret, nangkok tu luat Judea, tu huta Betlehem (ay. 4). Nasaret di Galilea jala Betlehem di Judea, huta na metmet do na dua on, na di goari “huta ni si Daud”, ala disi do tubu si Daud (pat. 1 Sam. 16 : 1-13). Alani i ma ingkon tu Betlehem do si Josep pasurathon dirina, ala sian pomparan ni si Daud ibana. Adong do + 80-90 mil dao ni Betlehem sian Nasaret. Leleng ni mardalan pat nasida + 4-5 hari, di halojaon ni si Maria naung gabegabean i (sedang mengandung/ hamil tua). Lam tangkas ma ia JESUS songon anak di si Josep i ma pomparan ni si Daud. Jala mangihuthon tradisi Jahudi, JESUS anak ni si Josep resmi (sah) do pomparan na sian raja Daud. Maria i ma oroan (tunangannya) si Josep. Mangihuthon Injil Lukas, molo tradisi di halak Jahudi ‘nunga sajabu nasida na dua’, alani i nunga dianggap/ dietong ‘parsaripeon na gok’ nasida (pat. Luk. 1 : 26-27, si Josep “manopot sada anak boru”). Pangantusion di hita, ia di halak Jahudi, molo naung sadalanan di pardalanan nunga dianggap nasida ‘na saripe’, nang pe ndang masitandaan (mengadakan persetubuhan) nasida (pat. Mat. 1 : 25 “Alai laos so ditanda, paima tubu buhabajuna i; i ma Jesus”). I do asa rap laho do si Josep dohot si Maria tu Betlehem, pasauthon parenta ni Kesar Agustus i. Antusanta ma, lebih dulu mereka mencatatkan nama (catatan sipil), dung i pe asa pabogashon/ marbagas. Jelas, tradisi di HKBP, na parjolo do melengkapi data-data (administrasi) manang di goari “martumpol/ tunangan”, asa manjalo ruhut pardongansaripeon/ pamumasuon. Dungi, dang hatinggalhonon ni si Josep be si Maria, ai tagamon tubu nama posoposo i, alani i do dibuat si Josep do haputusan na so sirangkonononna si Maria. 

3) Di ay. 6-7, “….gok ma ari ni hangoluanna. Ditubuhon ma anak buhabajuna….”. Manang dungkon piga minggu/ sadia leleleng nasida (Josep-Maria) di Betlehem, laos disi do ‘gok ari hangoluanna’ (bulanna/ waktuna), ditubuhon ma anak buhabajuna na i (seorang anak laki-laki, anaknya yang sulung). Asa ndada anak sasada (anak tunggal), ala diparsaripeon ni si Josep-Maria ditubuhon dope angka anakhonna, i ma anggina/ anggimu (pat. Luk. 8 : 19-20; Mat. 13 : 55). Jala ‘anak buhabaju’ mangihuthon patik ni Jahudi, i ma sipasahaton tu Tuhan, gabe ‘hadohoan ni Tuhan goaron’ (Luk. 2 : 22-23). 

Molo pe didok: “diborhos, dipeakhon tu bagasan panggagatan”. Lapatanna, dibungkus di bagsaan lampin, songon na somal dipangke posoposo na imbaru tubu. Na naeng ondolhonon ni si Lukas dison i ma, ‘perhatian tu angka na pogos do’, ai inganan panggagatan (palungan) ma hape inganan hasosorang ni Jesus i. On ma na gabe “partanda” muse tu angka parmahan (gembala-gembala) na laho marnida Jesus i (Luk. 2 : 12, 16). Dipaboa surusuruan i do tu angka ‘golongan na lea’ i ma angka parmahan i jala sian pamangan ni parmahan i do (na so diperhitungkan i/ kaum marginal) na pasangap jala papujipuji Debata (Luk. 2 : 20). Na naeng idaonta sian na masa on, i ma “Sipalua portibi on” ndang sorang di istana (di rumah sakit), alai di bagasan panggagatan do (na sederhana, bukan kemewahan), ala so adong inganan na asing parmianannasida (tidak ada tempat bagi mereka di rumah penginapan, ay. 7). Sada na tangkas siparateatehononta na nidok ni si Lukas dison i ma, ‘ala so adong inganan’ (tidak ada tempat). Lapatanna, adong do inganan i/ penginapan i, alai ndang laho inganan hasosorang ni Jesus i (tidak dikhususkan bagi Juruselamat yang lahir itu, bnd. Luk. 9 : 58 ‘ndang adong hapeahan ni uluNa’). I do hape, mamungka sian mulana pe nunga maol jolma i manjanghon Jesus Sipalua portibi on, sahat tu partingkian on, sai torop dope jolma na so manjalo Jesus Kristus siboan haluaon di portibi on. Hape nunga dirumari Ibana diriNa jala disolukhon rupa hatoban, jala dipatutoru diriNa asa suman tu jolma i, alai sai tong dope jolma i mandaodao sian Tuhanta I (pat. Plp. 2 : 7-8).

III. Sipahusorhusoron

1) Topik Minggu didok: “Jesus Sipalua Portibi on” (Yesus Juruselamat Dunia). Di tingki parpudi on, molo dipatupa Pesta-pesta Natal, jotjotan nama holan marrumang ‘seremonial’, ala lam tu pejelna haporseaon ni jolma i tu Debata. Terbukti sai adong dope sungkunsungkun ni jolma i mandok: ‘boha do parjadina Tuhan gabe jolma’? Sian on, naung gumodang nama jolma i ‘sibuk’ di gadget (HP) sandiri gabe maol ma jolma i manghaporseai Jesus. Didok di Poda 4 : 23 “jaga roham, ai sian i do ruar angka mual hangoluan”. Tangkas ma taboto, perayaan Natal, i ma ‘las ni roha bolon’ na mangalehon ‘semangat’ ni partondionta, ai didok: “dame ma di tano on/ damai sejahtera di bumi…” (Luk. 2 : 14). Alani i, tajangkon ma Jesus siboan haluaon i. Peristiwa Natal hendak menegaskan bahwa nilai atau makna sukacita kita, bukanlah ditentukan oleh seberapa banyak yang kita miliki, tetapi ditentukan oleh seberapa besar kita menyambut Yesus sebagai Juruselamat dunia.

2) Pangoloion tu Debata. Adong ma nian di hita ‘pangoloion’. Taida ma, na mangoloi do si Josep dohot si Maria di parsuruan ni Debata marhite na olo pasurathon dirina (mardalan sian Nasaret tu huta Betlehem di bagasan na gabegabean/ hamil tua). Rade do nasida (Josep-Maria) mamolus hamaolon dohot sitaonon i. On ma hataridaan, na manggohi sangkap ni Debata Jahowa, di oloi si Josep-Maria panjouon ni Tuhan i. Songon i muse do pangoloion ni Tuhan Jesus tu AmaNa, na olo Ibana patutoru diri asa suman tu jolma i, alai dipatimbo Debata muse jala goarNa sumurung sian nasa goar na adong. Beha do ia hita nuaeng on, tapillit jala taoloi dope panjouon ni Debata di ngolunta? Naeng ma nian unduk hita mangulahon hataNa dohot lomo ni rohaNa asa tanda halak naung manjangkon Jesus Sipalua portibi on. Amen.

(Dipersiapkan oleh : Cal. Pdt. Andri Daniel Siboro, S.Si)